یوحنا موکاشیفَه 14 - کتاب مقدس به زبان تالشي - گویش مرکزیوَرَ و صد و چِلو چار هَزار نفر 1 چَی بَه دومله دَیشتِمه و بوین، اَ وَرَ صَهیونی کو سَریکا پامند بَه و اَینَه صَد و چِل و چار هَزار نفر کن چَی نومی و آستامونیَه دَدَ نومی اِشتَن پوشنو کا نوشتَشون بَه، دَرِ بین. 2 و اَز آستامونیکا سَسیم درَسته کن هنته لَیسی شِرشِری شیوار؛ و گِرَخونَه سسی شیوار بَه. اَ سَس کن اَز درَستِمه چنگ نوازون چنگ ژِ موقه سَسی اَمونییَه. 3 و تازَ سِرودی اَ تختی ناریکا و اَ چار گلَه زندَ مخلوق و اَ پیرون حِضوریکا خَندِشون. و هیچ کَس غَیراَز اَ صدو چِلو چار هَزا نفر کن اَیِنشون زَمینی آدَمونکا خِرییَشون بَه، نَشایَه اَ سِرودی آموج گَتِه. 4 اِمِن هه کَسِنین کن بَشتن ژِنونَّه جیفینین آنِکَردِشون، اِمی خونه کن اِم مِردِن باکِرَ اینَه. اِمِن، هَر جِگارا کن وَرَ بشو، چَی دوملَه بَشینه. اِمِنِشون آدَمون دلَکا ایی کرَ دییَر، خِرییَشونَه تا خدارا و وَرَ را نوبَر ببون. 5 چَوون گَویکا هیچ دِرویی پَیدا آنیَبِن. اِمی خونه کن اَیِن بی عَیبینَه. سه گِله فرشتَه پَیغوم 6 چَی بَه دوملَه دییَرَ فرشتَه ایی ویندِمه کن کایبَه آستامونی وَسَطیکا پَر گَتِه و اِشتَنَه زَیرونَه اِنجیلی پِرِش بَه، تا اَی زَمینی سری اَمونونرا، هر قام و طایفَه و زبان و میلَتیکا کن ببون اییلام بکرِ. 7 اَ تَتَّه لَسَّنه واتِش: «خداکا بتَرسَه بَی شکوه و جَلال بدَرَ، اِمی خونه کن چَی دیوون کَردِ ساعت آرَستَیَه. اَ کن آستامونِن و زمین و دَیرا و خونییِنِش خَلق کردَیَه پرستش بکَرَ.» 8 و ایله دییَرَ فرشتَه یعنی دوومین فرشتَه، اَوَّلنَه فرشتَه بَه دوملَه آمَه و واتش: «ویریستَه، اَ یالَه بابل ویریستَه، اَ کن اِشتَن زیناکاری شَراویکا گِردِ میلَتِنِش هِنجامونیشَه.» 9 چَی بَه دومله دیَرَ فرشتَه ایی اَ دِگلَه فرشتَه بَه دوملَه، یعنی سوومین فرشتَه آمَه و لَسَّنَه واتِش: «اَگَم کَسی اَ اَشیا و اَ موجسمَه پرستش بکَرِ و اِشتَن بالیکا یا پوشنوکا چَی نشونَه بژَنه، 10 اَ آدَم نی خدا آسرَنگِستِه شَراویکا کن ایسَه پور مایَه و خالیصه و چَی غَضَّبی قَدرَکاشون ویکردَیه، بِنتییَه. اَ، موقدسَه فرشتَه اون وریکا و وَرَ حِضوریکا، آرا گتَه گوگِردینَه عذاب بَکشتیَه. 11 و چَوون عذابی دو تا اَبد تا ابد کفارا بَشییَه. اَیِنیرا کن اَ اَشیا و اَ موجسمَه بَپَرستین و اَیِنیرا کن چَی نومی نشونَه قبول بَکن، نِه شَویکا و نِه روجیکا نه آلاوین.» 12 و اِم موقدسون آمبست بِه بَپیشَه، اَیِن کن خدا حِکم و مسیح کا ایمان بَداشتین. 13 اَموقه سَسی آستامونیکا درَستِم کن اَواجیَه، «اِمی بنوس: خَشی اَیِنی حالیرا کن چیمی بَه دوملَه خداوندی دلَکا بَمَردین.» و خدا روح واتش: «واقیین اَیِن اِشتَن زَمَتونکا آلاوین، اِمی خونه کن چَوون اعمال چَوون دوملَه بومَیَه.» زَمینی اَکینی دورنوسته 14 چَی بَه دوملَه دیَشتِمه و بوین، ایله ایسبیَه خِری و اَ خِری سَریکا ایی نفر کن اینسانی زوعَه اَمونیَه و اِشتَن کَلَّکا طِلِه اینَه تاج و بالیکا تیرینجَه اورَقی داری، نِشت بَه. 15 اَموقه دییرَ فرشتَه ایی معبدیکا بَرمَه بِرِن و خِری سَردِرِ اَنِشیش لَسَّه نَه واتَه: «اِشتَن اورَقی پِگِه و بودورن، اِمی خونه کن دورنوستِه ساعت آرَستَه یه و زَمینی اَکین، کامیل رستَه یه.» 16 پس اَ کن خِری سَریکا نشت بَه اِشتَن اورَقی زَمینی سَریکا گاردانِستِشَه و زَمینی دورنوستِش. 17 چَی بَه دوملَه دییَرَ فرشتَه ایی مَعبدیکا کن آستامونیکا بَه، بِرِن برمَه و اَ نی تیرینجَه اورَقی اِشتَنَه داری. 18 و هَنی دییَرَ فرشتَه ایی قربونَه جِگاکا برمَه بِرون، کن آرا سَردِرِ زاکین داری و اَ فرشتَه ایی کن تیرینَجه اورَق اِشتَنَه داری، لَسَّنه بَش واتَه: «اِشتَن تیرینجَه اورَقی پِگِه و اَنگِرَ جومبورَاون، زَمینی اَنگِرَ داری کا آچین، اِمی خونه کن زَمینی اِنگِرِن رَستَه اینَه.» 19 پس اَ فرشتَه اِشتَن اورَقی زَمینی سَردِرِ گاردانِستِش و زَمینی اَنگِرون گِرد آکَردِشَه وشراوی یاله حووضیکا کن خدا غضَّب بَه ویکردِش. 20 و اَنِگِرِن اَ شراوی حووضی دلَکا کن شهری بِرنیکا نابَه پا پِکو بین و اَ حووضیکا خون شِرشِر دَرمَه و خون تا اَسبون جِلَبیرا کفا آمَه و چَی درازی سِصَد کیلومتر به. |
@ 2024 Korpu Company