یوحنا موکاشیفَه 11 - کتاب مقدس به زبان تالشي - گویش مرکزیدِ گِله شاهید 1 چَی بَه دوملَه ایلَه درازَ چوو ایی بَمِنِشون دوعَه کن مِترا کَرَ چو اَمونیَه و بَمِنِشون واتَه: «پِب و خدا مَعبد و قربونَه جِگا اندازَ بِژَن و اَیِنی کن اَجگاکا پَرستش بَکن بَشمَر، 2 ولی بِرنی سِرا نَه کاریر مَبو و اَی اندازَ مَژَن، اِمی خونه کن اَ جِگاشون میلتون دست آدوعَشونه و اَیِن موقدسَه شهری چِلو دِ ماه پا پِکو بَکنَه. 3 و اَز اِشتَن دِ گلَه شاهیدی زاکین دَرِم تا باشلاق دَکَن و هَزار ودِویست و شِصت روج پیشگویی بِکَن.» 4 اَیِن، هَه دِگِلَه زَیتونَه دارین و هَه دِ گلَه چراغدان کن زَمینی خداوندی حِضوریکا پا بَمَندین. 5 اَگَم کَسی بِپیا اَوون ضرر بژَنه، چَوون گَویکا آرا بِرِن بَژَی و چَی غَنیمون بَسوتییَه و خاکَه پَش آرَکَرد. پس اَگَم کَسی بخا اوون ضرر بژَنه، اِمَه چَوون چنترَ مَردِ. 6 اَیِن اِم زاکینی دارِن تا چَوون پیشگویی کَردِ روجونکا، آستامونی دبَستِن تا کلاک نِوارِ و بَشانَه آوون هنته خونی شیوار آکَردِ و هر چَن کرَ کن بَپیشونَه و هر مودیل غَرّی زَمینی سَردِرِ بوعَن. 7 هنته کن اَیِن اِشتَن شاهیدی تَمون آکَن، اَ اَشیا کن هاویَه چالیکا بِرِن آ، اَوونَّه بَجنگِستی و چَوون سَردِرِ پیروز بَبی و اَوون بَکِشتیَه. 8 و چَوون مَییتِن اَ یالَه شهری دِلَه جَدَ اونکا، کن کَنایَه ژِ خونه سَدوم و مصر باتین، زَمینی سَریکا بَمندییَه؛ هه شَهری کن چَوون خداوند نی هَه جِگاکا مصلوب آبَه. 9 سِه روج و نیمی اندازَ، بعضی آدَمِن هر میلَت و هر طایفَه و هر زبان و هر قامیکا چَوون مَییتون تَمشا کردِرا بشین و نینَّشت اَوون چال بکَن. 10 اَیِنی کن زَمینیکا بمَندین چَوون مَردِ خونه خَشی بَکنَه و جشن بگَتین و یندِرا خَلا رونَه بکَن؛ اِمی خونه کن اَ دِ گلَه پیغمبَر، زَمینی سری اَمونون عَذابِشون دوعَه به. 11 ولی سه روج و نیمی بَه دوملَه، خدا طرَفیکا زندَگی نَفَس چَوون دِلَه دشَه و اَیِن راست آبین. و برکَه یالَه ترسی چَوون تَمشا اَکَرون گتِشه. 12 چَی بَه دوملَه درَستِشونه کن تَتَّه لسَه ایی آستامونیکا اَوون اَواجیَه: «اِم جِگارا کفا بِرَ» و اَیِن ایله خِری دلَکا آستامونیرا شین و چَوون غَنیمِن کایبین اَوون دَیشتِه. 13 جَخت هَه ساعَتیکا، بَرکه یالَه بومَه لَرزَ ایی آمَه و شَهری یَک دَهوم ویریستَه و هف هیزار نفر اَ بومَه لَرزَ کا مَردین و اَمونِن بَرک ترسِستین و آستامونون خِداشون شکوه جلال دوعَه. 14 دِوومین «بِرامِه» گذَشته. بوین، سوومین «بِرامِه» خَیلی زو پی با. هفتومین زرنا 15 چَی بَه دومله هَفتومین فرشتَه اِشتَن زرناش فو دَکردَ؛ برکه لَسَّه ایی آستامونیکا دَخَنیستَه کن اَواجییَه: «دِنیا پادیشاهی، چَمه خداوند و چَی مسیح شِن آبَیَه. و اَ، تا ابد و تا ابد سلطنت بَکیَه.» 16 و اَ بیستو چار گلَه پیر کن خداوندی حِضوریکا تختی سَر اَنِشین، اِشتَن صَفتی خاکی سَردِرِ آناشونَه و خداشون پرستِش کردَ، 17 واتشون: «اَی خداوند، مطلقه قادرَ خدا، بَتِه شِکر بَکمون، اَی تِه کن هِست بیشَه و هِستیش. اِمی خونه کن تِه اِشتِه یالَه زبقی، بالیکا گتَرَ و سلطَنتی شِروو کردَرَ. 18 میلّتِن آسرَنگَه بینَه، ولی اِشتِه غَضَّب آرَستَه، مردَ اون دیوون کردِ روج آرسته یه، واَ وقت آرسته یه کن اِشتِه پاسَرییِن، پَیغَمبَرِن، و موقدَسه آدَمِن و گردِ اَیِنی کن اِشتِه نومی حورمتی غَم هردَشونه، گِچ تا یال، پاداش آشَدا، و اَیِنی کن زَمینِشون نیفیت آکَردَ، نیفلَه آشکرد.» 19 چَی بَه دوملَه خدا معبد آستامونیکا آج آبَه؛ و خدا عَهدی صِندوخ چَی معبدی دِلَکا دیار آبَه؛ و ایکَرَ ایی گِرّ و آستامونی برق و لَسَّه و گرَخونَه سَس و بومَه لرزَ و بَرکه تَرک کایبَه آمِه. |
@ 2024 Korpu Company