یوحنا موکاشیفَه 1 - کتاب مقدس به زبان تالشي - گویش مرکزی

شِرو

¹ عیسی مسیح موکاشیفَه، کن خدا بَی آداشَه تا اَ چییِ اِنی کن پی زو ایتفاق دگِنِه، اِشتَن وَزییَرون آمونِه. و اَش، اِشتَن فرشتَه، اِشتَن پاسَری یوحَنا وَر عَندِنَه، دیار آکردِش.

² و اَ، هر چیی ایی کن ویندِشه، یعنی خدا کلام و عیسی مسیح شاهیدی سَردِرِ، شاهیدی داشَه.

³ خَشی اَ کَسی حالیرا کن اِم پیشگویی کلَامی بَخندی و خَشی اَیِنی حالیرا کن اَی دَنَّرست و هر چیی ایی کن چَی دلَکا نوشتَه آبَیه، اَنجوم درِن؛ اِمی خونه کن اَ وقت نِزِکَه.

پَیغوم هفت گِله کلیسارا

⁴ یوحنا طَرفیکا، هَف گلَه کلیسارا کن ولَتِه آسیا کا هِستین: فیض و صلح و سلامتی اَ کَسی طرَفیکا کن، هِستَه و بَه و بومَیَه، شِمَرا ببو، و هف گلَه روح طَرَفیکا کن چَی پادیشاهی تختی ناریکاینَه،

⁵ و عیسی مسیح طَرَفیکا، اَ اَمینَه شاهید کن اولین کَسی بَه کن مردَاون دلَکا زندَ آبَه و دِنیا سَردِرِ پادیشاهون حاکیمَه. اَ کن اَمه رَی بداشتی و اِشتَن خونینَه، اَمَش چَمَه گِناخونکا اَراخِمونیَشَه،

⁶ و اَ، اَمش ایله مَملَکت و کاهینِنی اِشتَن دَدَ خدارا، آکردش، تا ابد شکوه جلال وسلطنت چَیرا ببو، آمین.

⁷ بوینَه، اَ، خِرونَّه آ، هر چَمی بَی بَویندییَه، حتی اَیِنی چَم کن اَشون نیزَنَه ژَ؛ و زَمینی سَردِرِ گِردِ طایفَه اِن چَی خونِه عازیَه بَگَتین. واقییَن کن اِنتَرَ بَبییَه. آمین.

⁸ خداوند خدا باتی: «”الف“ و ”ی“ اَزیمَه؛ اَزیمَه اَ مطلَقه قادِر کن هِستَه و بَه و بومَیَه،

اینسانی زوعَه رویا

⁹ اَز شمَه برا یوحنا، کن عَذابونکا و پادیشاهیکا و آمبَست بِه کا کن عیسی دلَکارَ، شمَنه شَریکیم، و خدا کلام و عیسی شاهیدی خونه، ایله جزیرَکا بیم کن بَی پاتموس اَواجین.

¹⁰ خداوندی روجیکا، خدا روحکا پتلمه آبیم، و تَتَّه لسَه ایی کن هنته زِرنا سَسی شیوار بَه، پِشت آکَریکا درَستِم

¹¹ کن اَواجیَه: «اَ چیی ایی کن کاش ویندِ ایلَه کیتاویکا بنوِس و هف گلَه کلیسا اِنِه اِفِسُس، اِسمیرنا، پِرگاموم، تیاتیرا، ساردِس، فیلادِلفیِه و لائودیکیَه را بَینِنن.»

¹² اَ موقه پِشتیرا آگَردِستیم تا دیَسِم کن سَس اَدَر کییَه کن بمِنَه گَف دَرِ؛ و هنتَه کن آگَردِستیم، هف گلَه طِلِه اینَه چراغ دانِم ویندَ،

¹³ و اَ چراغدانون دلَکا ایی نفرِم ویندَ کن هنتَه «اینسانی زوعَه» اَمونیَه. اَ دِرازَ ردایی دکَردَش بَه و طِلِه اینَه سَرِخی چَی سینَه دووریکا بَه.

¹⁴ چَی ذِلفِن هنته گوسندَ پَشمَه شیوار و وَری شیوار ایسبی بَه، و چَی چَمِن هنته کولوستارَ آرا شیوار بین.

¹⁵ چَی لِنگِن هنته برنجی شیوار بین کن کورَکا خالیص آبَیه و شَپَق بَژَی و چَی سَس هنته برکَه یالَه سَیلاوون سَسی شیوار اَمونیَه.

¹⁶ و اِشتَن راستَه بالیکا هف گلَه اِسترَ داری و چَی گَویکا تیرینجَه دِ دَمه شمشیری بِرِن آمَه بَه، و چَی صَفَت هنته آختاوی شَپقی شیوار بَه کن گردِ اِشتَن زبقینه دَتاوییَه.

¹⁷ هنته کن بَی ویندِم ایلَه مَردَ شیوار چَی پا بِن ویگِنستیم. ولی اَ اِشتَن راسته بالی چمن سَریکا ناشَه و واتش: «مترس، اَز اول و آخِریمه؛

¹⁸ اَز، کن زندَایمَه. مَردَ بیم، ولی ایسَه دیَس زیرون زندَایمه و مَردِ و مردَ اون دِنیا اَچَرِن بَمِنکارَ.

¹⁹ «پس اَ چیی ایی کن ویندَرَ، و اَ چیی ایی کن ایسَه هِسته و اَ چیی ایی کن چیمی بَه دوملَه بَبیَه بنوِس.

²⁰ اَ هف گله اِسترَ کن چمن راسته بالیکا ویندِرَ و اَ هف گلَه طِلِه اینَه چراغدانی راز اِمَه: اَ هف گلَه اِسترَ، هف گلَه کیلیسا فرشتَه اینَه، و اَ هف گلَه چراغدان نی هه هف گله کیلیسا اینه.