نامَه فیلیپی کلیسا را 3 - کتاب مقدس به زبان تالشي - گویش مرکزی

مسیح ایمانی راه کا صالح بِه

¹ اَی چمن برا اِن آخِریکا، خداوندی دِلَکا خَش بِبَه! گردِ اَ چییِنی کن شِمَرا بنوشتیم مِرا زمَتی نِدارِ بَسکَم شِمَه اَمنییَتیرا یَه.

² اَ عِسبَه اونکا رَت آبَه! اَ گناخکارونکا رَت آبَه! اَیِنی کن سِنَت کردِ را جندَکی دَنَّبیرد، رَت آبَه!

³ چون اَیِنی کن سِنَت آبَه اینَه اَمه ایمون کن خدا روح دِلَکا پرستش بَکَمون، و چَمَه ایفتخار مسیح عیسا اَ و اینسانیَه ایفتخارون تَکیَه نِکَرَم

⁴ هَر چَنَه اَز اِشتَن جندَکی تَکیَه کَردِ را دلیل بَداشتیم. اَگَم کَسی فکر بَکَیَه کن جَندَکی سرتَکیَه کَردِرا دلیل بداشتی، اَز ویشتَر بداشتیمَه:

⁵ هَشتومَه روجیکا سِنَت آبیمَه، اسرائیلی قامیکا، بِنیامینی نَتاجیکا، عِبرانیَه خِردَن، عِبرانیَه نَنَه و دَدَ کا؛ شَریعَتی طبق فَریسی؛

⁶ غَیرَتی طبق کِلیسا اَیذَت آزار اَکَر؛ صالِح بِه ایی کن شرَیعَتی کا آ، طبق، بی عَیب.

⁷ ولی هر چیی کن مِرا بَرَ ایی داری، اَی مَسیح خونِه ضَرَر بَحیساب وَردِم.

⁸ حَییقَت کن اَز گِردِ چییون چمن خداوند مَسیح عیسی آزنِستِه کا کن هَمه چیکا کفاترَ، ضَرَر بَموستیم. چَی خونِه گِردِ چییون از دَست آدوعَمَه و اِمون گِردی هیچ بَحیساب بوعَردیم، تا چمن منفعت مسیح ببو.

⁹ و چَی دِلَکا پَیدا آبوم، نِه اِشتَن صالح گیری نَه کن شَریعَتیکا آ، بَلکَم اَ صالح بِه ایی نَه کن مَسیح ایمانی راه کا بَدَست آ، هه صالح بِه ایی کن خدا کارَ و ایمانی طِبقَه.

¹⁰ تا مسیح و چَی زندَ آبِه اینجاری آزنِم و چَی عَذابونکا شَریک آبوم، چَی مَرگی دلَکا، هنته چَی شیوار آبوم،

¹¹ تاهَر جوری کن بَبی مَردَ اون دِلَکا زندَ آبِه، بَدَست بوعَم.

هَدَفی آرَستِرا تقلا کردِ

¹² نِمَه وات هِم ایسَه اَوون بَدَست وَردَمَه یا کامیل آبَه ایمَه، بَسکم بَشتَن نَرا بَبَمه تا اَیی بَدَست بوعَم، اِمی خونه کن مَسیح عیسی بَمِنِش اِشتَنرا بَدَست وردِش.

¹³ برا اِن، گَمون نِمَکَرد هَنوزَنی اَی بَدَست وَردَم ببو؛ اَمّا ایلَه کار بَکَم، و اَ اِمکن اَ چیی کن پِشتیکارَ یاد بَمَکَرد و اَ چیی ایی خونه تقلا بَکمَه کن نَکارَ،

¹⁴ هدفی آرَستِه را تَقلا بَکَم، تا جاییزَ ایی بَدَست بوعَم کن، خدا چَی خونِه بَمن مَسیح عیسی دِلَکا کَفا را خِلِه کَردَشَه.

¹⁵ اَیِنی کن چَمه دلَکا یالَه شخصینَه، پی اِنتَرَ فِکر بکَن؛ و اَگَم موضوعی خونِه دییَر فِکر بَکَرون، اِمی نی خدا شِمَرا دیار آرَکَرد.

¹⁶ اَمه پی هر چیی ایی بَدَستِمون وَردیَه، هنته چَی شیوار رَفتار بِکَرم.

¹⁷ اَی برا اِن، یَندِنَه بَمِنکا سَرمشق بیگِرَ، و شمَه چَم کَسِنی طَرَف ببو، کن هَتَه کن اَمَکا سورَغِرونَه، رفتار بَکَنَه.

¹⁸ چون چَن کَرَ بَشِمَه چَوون خونه واتِم وحتی ایسَه نی اِشتَن اَسِرگینَه جیگیر بَکَم، خَیلیِن هِنتَه مسیح صَلیبی غَنیم، رَفتار بَکَنَه.

¹⁹ اِنتَرَ آدَمون آخیر نیفلَه آبِه یَه. چَوون خدا چَوون لَوَیَه وشرم آوَرَ چییون طَرَف بَشین، و اَیِن زمینییَه چییون خونه فکر بکنَه.

²⁰ ایسَه اِمکن اَمه آستامونی شِنیمون و خداوند عیسای مسیح اینتظاریکامون کن ایلَه نیجات اَدَرَ.

²¹ اَ، اَ خِنَرینَه کن بَی زبق آرَدا تا گردِ چییون اِشتَن فِرمون آکَرِ، کن چَمَه ذلیلَه تَنی، عَوَض آرَکَرد تا هنته چَی شکوه و جلال گَتَه تَنی شیوار آبَم.