نامَه فیلیمونیرا 1 - کتاب مقدس به زبان تالشي - گویش مرکزی

¹ پولوسی طَرفیکا، مسیح عیسی زیندانی، و چَمه برا تیموتائوسی طرَفیکا، بَه چَمه خاجَتیَه همکار فیلیمون،

² چَمه خالا آپفیا و چَمه هم رَزم آرخیپوس، و کلیسایی کن اِشتِه کَکارَ:

³ فیض و صلح وسلامتی چَمَه دَدَ خدا، و خداوند عیسای مسیح طرَفیکا شِمَرا ببو.

فیلیمونی موحبت و ایمان

⁴ اَز اِشتَن دِوا اونکا بَته یاد آمَفند، و اوزون اِشتَن خدا شکر بَکم،

⁵ اِمی خونه کن اَز اِشتِه موحبَت و ایمانی خونه کن خداوند عیسی و گِرد موقدسَه آدَمون سَر بَداشتیشَه، کام درَستِه.

⁶ و دِوا بَکم کن اِشتِه ایمانی شریک بِه، کمک بکَرِ کن هر چاکَه چیی ایی کن چَمَه دلَکا دَرِ، مسیح خونِه، ایلَه کامیلَه شیناخت، بَرَ بدَرِ.

⁷ اَی برا اِمی خونه کن اِشتِه موحبت بَرک بَمن خَش آکردِش و آلاویستیم، اِمی خاطر کن موقدسه آدَمون دل، اِشتِه خونه تازَ جانِشون گَتَه.

پولوسی خاشتو خاز اونِسیموسی خونه

⁸ اِمی خاطر، هر چَنَه مسیح دلَکا اِم جورعتی بَداشتیمه کن بَتِه، اَ چیی ایی کن لازِمه اَنجوم بِدَری، حِکم بِکَم،

⁹ اِم حالیکا، موحبتی خونه صلاح بَموستیم کن بَتِکا خاشتو خاز بکَم: اَز، پولوس، کن پیرَ مِردی هِستیم و ایسَه نی مسیح عیسی زیندانی ایمه،

¹⁰ چمن بَلَه اونِسیموسی خونه کن زیندانی دلَکا چَی دَدَ آبَه ایمه، بَتِکا خاشتو خازِمه.

¹¹ اَ گِذَشتکا تِرا دَدارَ آدَمی بَه، ولی ایسَه هِم مِرا و هِم تِرا مِفَته.

¹² اَز اِشتَن جیگر گوشَه اِشتِه وَر رَونَه آمکَرد.

¹³ اَز خَش آرَبیمَه کن بَی اِشتَن وَرغَم بَرم تا اَ زمانی کن اِنجیلی خونِه زیندانیکامَه، اِشتِه جِگا بَمن خیدمت بکرِ.

¹⁴ ولی صلاح زونِستم بی اِشتِه ریضایت کاریم کردَ مَبو، تا اِشتِه چاکی کردِ اِشتِه مِیلینه ببو نِه دیم پِنوعِه نَه.

¹⁵ شاید اِمی خونه کن، تلَکه زمانی بَتکا تاک آبَه تا اوزون اِشتِه وَر ویگَردِ،

¹⁶ ولی دِ نِه وَزییَری شیوار، بَسکم وَزییَریکا کَفاتَر، هنتَه خاجَتییَه برا ایی شیوار. بَخِصوص مِرا، ولی خَیلی ویشتَر تِرا، هِم جندَکیکا و هِم خداوندیکا.

¹⁷ پس اَگَم بَمن اِشتَن رَفِق بَموستیشَه، بَی هَتَه کن بَمن قبول کردِرَ قِبول بکَه.

¹⁸ اَگَم بدی ایی اِشتِه سَر کردَشَه، یا چیی ایی بَته بدِکارَ، اَی چمن حیسابیکا بوعَه.

¹⁹ اَز، پولوس، اِشتَن بالینه بَنوِشتیم: اَز جوبران بَکمه، اَلبت لازم نییَه بواجم کن ته حتی اِشن جانی نی بَمن دَین داری.

²⁰ ها اَی برا، بَپیمه خداوندی دلَکا بَرَ ایی بَتِکا بَمن آرَسِه. چمن جانی مسیح دلَکا تازَ اَکَن.

²¹ اِمی خونه اِمی بنوِشتیمه کن اِشتِه فرمون بَردِکا ایطمینان بَداشتیم و بَموستیمَه کن حتی چمن واتَه گَفیکا نی ویشتَر، اَنجوم آشَدا.

²² ضیمنن، ایلَه اوتاق مِرا آمادَ بکه، اِمی خونه کن اومید بَداشتیمه کن خدا شمه دِوا اون قِبول بَکَی و بَمن اِشتَن لوطفینه شمَه وَر آرَگاردِنست.

²³ اِپافراس کن، مسیح عیسی خونه بَمِنه زیندانی دلَکارَ، بَتِه سلام آرَدا.

²⁴ هنترَکه چمن همکارن، مرقوس، آریستارخوس، دیماس و لوقا تِرا سلام آنَّدا.

²⁵ خداوند عیسای مسیح فیض شمه روح نَه دَرِ ببو.