مَرقُس 3 - کتاب مقدس به زبان تالشي - گویش مرکزیشِلَه مِردی شفا دوعِه 1 عیسی ایکَرَ دییَر یهودیون عیبادَتگا دِلَه دَرمَه. اَجگا کا مِردی بَه کن چَی ایلَه بال لَم بَه. 2 فَریسیون فرقَه عالیمِن عیسی زیرنَظر دارین تا بوینن کن موقَدَسَه شنبَه روجیکا اَ مِردی شفا دَرِ یا نِه، تا اِنتَرَکِه عیسی موتَهم کردِرا رِقی پَیدا بکَن. 3 عیسی اَ مِردی کن چَی بال لَم بَه واتِش: «اِم جِگاکا پا بِمون.» 4 اَموقه اَوونکا دَپَرسِستَه: «موقدَسه شنبَه روجیکا شَرعا چاکی کَردِ دِرستَه یا بَدی کَردِ؟ کَسی جانی نیجات دوعِه یا اَی کِشتِه؟» ولی اَیِن دَمِریستین. 5 عیسی، غَضَّبینَه اَیِنی کن چَی دوور بینَه دَیَشتِشَه و چَوون خوعهَ دلی خونِه برضَخ آبه. چَی به دوملَه اَ مِردی واتِش: «اِشتِه بالی دراز اَکَن.» اَ مِرد اِشتَن بالی دراز آکَردِشَه و چَی بال سِی آبَه. 6 فَریسیون فرقه عالیمِن بِرِن بَرشینَه و جَخت هیرودیسی طَرفدارونَّه توطئه کَردشونَه کن چِنتَه عیسی نیفیت آکَرن. یالَه جماعتی عیسی دوملَه بشین 7 چَی بَه دوملَه عیسی اِشتَن شاگِردونَّ دَیراچَه کناریرا شَه. یالَه جَماعَتی نی وِلِتِنِه جَلیل و یَهودیکَا، 8 شهر اورشَلیمیکا، وِلَتِه اَدومیَه کا، اوردونی رباری اَوَریکا و منطَقه اِنِه صور وصیدونی اَطرافیکا، عیسی دوملَه رادَگِنستین. اَ یالَه جَماعت وقتی گِردِ عیسی کارِنشون دَرَستَه چَی وَر آمین. 9 اِمی خونه کن یالَه جماعتی جَم آبَه بین، عیسی اِشتَن شاگِردنِش واتَه لاتیکَه ای چَیرا آمادَ بکَن، تا نِکَرِمردوم هَروریکا بَی دَچِکن و فشار بوعرن. 10 اِمی خونه کن عیسی خَیلیِنِش شفا دوعَه بَه، آزاریِن گِرد هَر وَریکا بَی دَچِکِسته بین تا اَی دَست آسا بِکَن. 11 هر موقِه شیطونیَه روحِن عیسی اَوَینینَه، چَی نَ کا زَمینی سَر بَرگنین و لَسَّه اَژَنین: «تِه خدا زوعَه ایشَه!» 12 ولی عیسی تاکیدینَه اَوون فِرمون اَدَریَه کن کَسیرا نِواجن اَ کیَه. دانزَ گِلَه رسول 13 عیسی کوهی سَرپِشَه و اَیِنی کن اَپیش بَه، اِشتَن وَر خِلِه کَردِشَه و اَیِن چِی وَر آمین. 14 عیسی دانزَ نَفَری اینتخاب کَردِش و چَوون نومِش رَسولِن پِناشَه، تا بَینَه دَرِ بِبون و اَوون رونه آکَرِتا مردومی آموج بدَن، 15 و اِم زاکینی بِدارِن کن پَریانون آدَمونکا بِرِن بَرکَرن. 16 اَ دانزَ نَفری کن اینتِخابِش کَردَ اِمِن بین: شَمعون کن چَی نومی پطرس آناشه؛ 17 یعقوب زِبِدی زوعَه و یعقوبی برا یوحنا کن چَوون نومی ’بوآنِرجس‘ آناشَه ’یعنی گِرّی زوعَه اِن‘؛ 18 آندریاس، فیلیپُس، بَرتولْما، مَتّی، توما، یعقوب حَلْفای زوعَه، تَدّای، شَمعون وطن پرست، 19 و یهودا اَسْخَریوط کن عیساش خَیانت کردَ. عیسی و بَعَلزِبول 20 چَی به دوملَه عیسی کَرا شَه وهَنی جماعتی گرد آبینَه، اَنَ کن عیسی و چَی شاگِردِن حتی نِشاستشون غَذا بَرِن. 21 وَقتی عیسی خانوادَ اِمی دَرَستِشون، شینَه تا عیسی پِگِرن و اِشتَنَه بِبَرن، اِمی خونه کن اَواجینَه: «اَ اِشتَن عقلی ازدست دوعَشَه.» 22 توراتی معلیمِن نی کن اورشلیمیکا آمَه بینَه اَواجین: «بِعَلزَِبولی چَی جِلدیکا دَشَیه» و «پَریانون رَئیسی کاریَرینَه، پریانون بِرِن بَرَکَرد.» 23 عیسی اَیِنِش اِشتَن وَر خِلِه کَردَ و چَوونرا مَثَلِنی وَردِشَه و واتِش: «چِنتَه مومکینَه شَیطون، شَیطونی بِرن بَرکَرِ؟ 24 اَگَم مَملَکَتی اِشتَن زِرَبَرا تقسیم ببو اَ مَملکت نییَشا پا برجا مندِ. 25 واَگَم کَه ایی اِشتَن زِرَبَرا تقسیم ببو، اَ کَه نییَشا پابرجا مَندِ. 26 و اَگَم شَیطون اِشتَن زِربرا قیام بکَرِ و تقسیم ببو، نییَشا پا برجا مندِ، بَلکَم نیفیت بَبی. 27 هیچ کَس نیَشا قودورَ مِردی کَه دِلَه دَرا و چَی اَموالی پِتارِ، مَگم اِمکن اَولیکا اَ قودورَمِردی دَبَستِه. چَی بَه دوملَه حییقتا بَشایَه چَی کَه پِتارِستِه. 28 «حییقتا بَه شمَه باتیمَه کن اینسانی گردِ گِناخِن و هر کِفری کن بواجِه بخشیدَ بَبی؛ 29 ولی هر کَم خدا موقَدسَه روح کفر بواجِه هرگزبخشیدَ آنیَبن، بَلکَم تا اَبد چَی گناخ چَی ملیکارَ.» 30 عیسی اِم گَف اِمی خونِه بَه کن اَواجینَه: «عیسی را شَیطونیه روح هِستَه.» عیسی نَنه و برادران 31 عیسی نَنه و برا اِن آمینه. اَیِن بِرِنیکا پامَند بین و ایی نفری عَندِشونه تا عیسی خِلِه بکَرِ. 32 جماعتی کن عیسی دووریکا نشت بینَه، بَی واتِشون: «اِشتِه نَنَه و برا اِن بِرنیکا مَندینَه و اِشتِه دوملهَ بَگَردِستین.» 33 عیسی جواب آداشَه: «چمن نَنَه و برا اِن کییِنینَه؟» 34 اَموقه، اَیِنی سرکن چَی دووریکا نشت بینَه، دَیَسی کَردِشَه و واتِش: «اِمِنین چمن نَنَه و برا اِن! 35 اِمی خونه کن هر کَم خدا ایرادَ اَنجوم بدَرِ، چمن برا و خالا و نَنه یَه.» |
@ 2024 Korpu Company