مَرقُس 16 - کتاب مقدس به زبان تالشي - گویش مرکزی

عیسی زندَ آبِه

¹ وَقتی موقَدسَه شنبه روج گِذَشتَه، مریم مَجدَلیَه و یعقوبی نَنَه مریم وسالومِه، عَطرینَه روعَن خِریشونَه تا بِشون و عیسی مَیتی عطر بژَنن.

² پس هَفتَه اَولین روجیکا، سوکَه خون، آختاوی پِرمِه موقِه تِربَرا شین.

³ اَیِن کایبین یَندِ واتِه: «کی اَ کازی کن، تِربَه دَهَنَکار چَمَرا گِلِل آکَرِ و کَنار بِژَنِه؟»

⁴ اَمّا وَقتی اَ جِگارا آرَستین، ویندِشون کن اَ کاز کن خَیلی یال بَه، تِربَه دَهَنَکا کَناریرا گِلِل آبَیَه.

⁵ وَقتی تِربَه دِلَه دَشینَه، جَوانی ویندِشون کن راستَه طَرَفیکا نِشت بَه و ایسبیَه رَدایی دَکَردَش بَه. ژِنِن چَی ویندِ خونه تَتَّه وَسَّکا دَگِنِستین.

⁶ اَ جوان ژنِنِش واتَه: « تَتَه وَسَّه دَنِگِنَه. شمَه عیسای ناصِری دوملَه بَگَردِستیرون کن بَی صلیبی سَردِرِ مِخه کو کَردِشون. اَ زندَ آبَیَه؛ اِم جِگاکا نییَه. جِگایی کن چَی مَیتی آنوعَشون بَه، بِوینَه.

⁷ ایسَه، بشَه وچَی شاگِردون و پِطروسی بِواجَه کن عیسی شِمَکا به نَه وِلَته جَلیلیرا بَشیَه؛ هَتَه کن چیمی به نَه شِمَش واتَه بَه، اَجگاکا بَی بَویندیرون.»

⁸ پس ژِنن بِرِن بَرمین و تِربَکا ویریتین، اِمی خونه کن چَوون جَندَک تَرسیرا کایبَه لَرزِستِه و حَیروون بینَه. اَیِن هیچ کَسیرا چیی نِواتِشون، چیرا کن اَتَرسینَه.

⁹ وَقتی عیسی هَفتَه اَولَه روجی سوکَه خونیرا زند آبَه، اَولیکا مریم مَجدَلیَه را کن اَیکا هَف گِلَه پَریان بِرِن بَرکَردَش بَه، اَیر آبَه.

¹⁰ مریم نی، شه و عیسی یارونرا کن عازیَه اَکَرینَه و و کایبین بِرَمستِه خَبر داشَه.

¹¹ ولی اَیِن وَقتی دَرستِشون کن عیسی زِندَ آبَیَه و مریم بَی ویندَشَه، باوَر نِکَردِشونَه.

¹² چَی بَه دومَله، عیسی دییَرَ نِمودینَه، دِ نَفَریرا اَوونکا کن ایلَه آوادی ایرا کایبین شِه، اَیر آبَه.

¹³ اَ دِ نفَر ویگَردِستینَ و بَقییَه اِ شاگِردِنِشون اِم ایتفاقیکا خبر دوعَه، ولی اَیِن اَ دِنفری گفی نی باور نِکَردشون.

¹⁴ چَی بَه دوملَه عیسی اَ یانزَّ گِلَه شاگِردیرا، هَتَه کن اَیِن کایبین غذا هَردِ، اَیرآبَه و اَیِنِش، چَوون بی ایمانیرا و خوعَه دِلیرا تشَر ژِشَه، اِمی خونه کن اَیِن اَ کَسونی گَفی کن عیسیاشون زندَ آبِه بَه دومَله ویندَشون بَه، باوَر کَردَشون نِبَه.

¹⁵ و اَیِنِش واتَه: «دِنیا اِم سَر اَ سَریرا بِشَه و خدا پادیشایی خَشَه خَبری، گِردِ خَلایِقیرا اییلام بکَرَ.

¹⁶ هرکَس ایمان بوعَرِ و غَسل تَعمید بیگِرِ، نیجات بَگتی. ولی هَر کَم ایمان مَوَرِ، مَحکوم بَبیَه.

¹⁷ اَیِنی کن بَمن ایمان بَوعَرن، اِم نِشونَه اون و موعجیزَاون اَنجوم دَرِن: اَیِن چمن نومینَه پَریانون آدَمونکا بِرِن بَنَّکَرد و جَدیدَ زَبانونَّه گَف بَژَنَه.

¹⁸ اَیِن نَلَتییون اِشتَن بالینَه بَگَتینَه، و اَگَم اَکِشَه زَهری نی بِنجن، اَوون هیچ چیی نییَبن، و اَیِن اِشتَن بالون آزارییون سَردِرِ بَنان و اَیِن نی شفا بَگَتینَه.»

¹⁹ پس بعد اِمکن خداوند عیسی اِم گَفِنِش، چَوونرا ژِشَه، اَش آستامونیرا بَردَ و خدا راستَه بالی طَرَفیکا نِشتَه.

²⁰ شاگردن بِرِنیرا شینَه وگِردِ جِگا اونکا آموج اَدَرینَه. خداوند اَوونَّه کار اَکَریَه و خداوند نِشونه اِن و موعجیزَاِنی نَه کن شاگردن انجون اَدَرین، چَوون پَیغومی ثابیت اَکَریَه.