مَتّی 28 - کتاب مقدس به زبان تالشي - گویش مرکزیعیسی زنده آبهِ 1 موقَدَسَه شَنبَه روجی سَوسَه، کن هَفتَه اَوَلین روج بَه، سوکه خون مریمِ مَجْدَلیّه و اَیلَه مَریَم تِربه ویندِرا شینَه. 2 ایکَرَایی بَرکَه بومه لَرز ایی آمَه، اِمی خونه کن خداوندی ایلَه فرشتَه آستامونیکا نازل آبَه و تِربه طَرَف شَه و اَ کازی چَی نَ کا قِرَقیرا گِلِل آکردشَه وچَی سَریکا نِشتَه. 3 اَ فرشتَه صَفَت آستامونی بَرقی شیوار شَپَق اَژنی و چَی شندر وَری شیوار ایسبی به. 4 نیگَبانِن چی ویندِ خونه تَرسیرا جیپَرکیستین، و مَرد اون شیوار آبین! 5 اَموقه فرشتَه ژِنون واتِشَه: «تَتَه وَسَّه دَمَگِنَه! بَموستیم عیسای مصلوبی دومله هِستیرون. 6 اَ اِم جکا کا نیَیه چون هَته کن واتش بَه، زندَ آبَیَه! بِرَ و جگایی کن عیسی مَیتی نوعَشون بَه بِوینَه، 7 چَی بَه دوملَه جَخت بشه و چَی شاگردون بِواجَه کن عیسی مردِ به دوملَه زندَ آبَیَه و اَ شمه کا نارتَر وِلَته جَلیلیرا بَشیَه و اَجگاکا اَی بَویندینَه. دیسَه ایسَه بَشمَه واتِمَه!» 8 پس ژِنن تَرسینَه یاله خَشینَه جَخت تِربَکا رَونَه بین و شاگردون وَر شِرا تاویستین تا اِم ایتفاقی اَوون خبر بِدَرن. 9 ایکَرَایی عیسی اَوونَّه سَر آسَر آبَه و واتِش: «سلام بر شمه!» ژِنِن نَ آمینه و چَی لنگون سَر برگنستین، واَی پرستش کَردشونه. 10 اَموقه عیسی اَیِنِش واتَه: «مَترسه! بشَه و چمن برا اون بِواجه کن ولَته جلیلیرا بشون. اَجگاکا بَمن بَویندینَه.» نیگَبانون خَبَر بَردِ 11 هَنگومی کن ژِنِن را کا بین، کاولَه ایی نیگَبانونکا شَهریرا شینَه، و گردِ اِم ایتفاقون سران کاهینونرا خَبَر داشون. 12 سران کاهینن ایسبیَه ریشونَّه جَم آبین و گَفَه ژَنِه بَه دوملَه، سربازون وِرَ پولی آداشون و 13 واتِشون: «پی مردومیرا بواجه کن ”چَی شاگردِن شوانه آمینه و هَنگومی کن اَمه خاویکا بیمون چَی مَییِتی پتاریشون.“ 14 و اَگَم اِم خبر والی گوش آرسِه اَمه اِشتَن اَی راضی بَکَمون تا شمه را مُشکلی مَبو.» 15 پس اَیِن پولی ویگَتشونه و چَوون واتَه گَفی اَنجوم آداشون. و اِم داستان تا اومروج یهودیون دلَکا مَندَیَه. یالَه مأموریت 16 عیسی یانزَ گِلَه شاگرد وِلَته جَلیلیرا، هَه کوهی سَردِرِ کن عیسی اَیِنِش واتَه بَه، شینَه. 17 وَقتی اَجگاکا عیسی بَویندینَه، اَی پرستش کَردِشون. اَمّا بعضیِن چیمه میمه اَکَرین. 18 اَموقه عیسی نِزِک آمَه و اَیِنِش واتَه: «گردِ زاکین، آستامونیکا و زَمینی سَردِرِ چمن دَست آدوعَه آبَیَه. 19 پس بشَه و گِردِ میلَّتون چمن شاگرد آکَرَ و اَوون دَدَ نومینَه و زوعَه نومینَه و خدا موقدسَه روح نومینَه غُسل تعمید بِدَر، 20 و اَوون آموج بِدَر کن، گِردِ چییونی کن بَشمَه فرمون آدوعَمَه اَنجوم بِدَرِن. دَیسه اَز، اوزون تا اِم دِنیا آخیر شمَنه دَرِایمَه!» |
@ 2024 Korpu Company