یهودا نامه 1 - کتاب مقدس به زبان تالشي - گویش مرکزی

¹ یهودا طَرفیکا کن عیسی مسیح وَزییَر و یعقوبی برا اَ، اَیِنیرا کن صَلاشون ژَیَه و خدای دَدَ دلَکا خاجَتی اینَه، و عیسی مسیح خونِه اَیِنِشون غَم هَردَیه:

² رحمت و صلح و سلامتی و موحبت، فِرَوون شمَرا ببو.

دِروعه معلیمِن

³ اَی خاجَتی اِن، اَگَم چِه بَرکَه ایشتیاق داریمَه تا اَ نیجاتیکا کن گرد اَیکا رَسَت دارَم شِمَرا بنوِسم، ولی لازمم ویندَ اِم چن گِلَه خط نوشتِنَه، شمَکا بپیام، اَ ایمانی کا کن ایکَرَ اوزونیرا موقدسَه آدَمون دست دوعَشونه تقلا بکرَ.

⁴ چون آدَمِنی کن گِذَشتَکا چَوون مَحکومیَت تَیین آبَه یه، نونَکِه شمه دلَکا نِفوذ کردَشونَه. اِمِن بی دینِنی هِستینه کن چَمَه خدا فیضی عَیّاشی تبدیل بَکَنَه، و چَمَه تاکَه سرور و خداوند، عیسی مسیح حاشا بَکَن.

⁵ با اِمکن شمه ایکرَ، اِمون گِردیکا باخبَر آبیرون، بَپیمَه یاد آفَنم کن خداوند عیسی، قام اسرائیلی ولَتِه مصریکا نیجاتِش دوعَه، ولی دییَرَ کَرَ را اَیِنی کن ایمان نِدارینَه، نیفیت آکردِش.

⁶ اَ، فرشتَه اِنی کن اِشتَن زاکیندارَ جگا کا نِمَندین، بَسکم اِشتَن دِرِستَه جِگا آهَشتِشونه، زَیرونه زِنجیلونکا آبَستِش و اَ یالَه روجی دِلَه موحاکیمَه کردِرا، ظلَماتیکا غَمِش هَردیَه.

⁷ هنترَکه، سُدوم و عَمورَه و چَوون اَطرافی شهرِن، کن هنتَه چَوون شیوار بی عیفتیشون کردَ و هرزَگی ایی کن تنیرا غَیر طبیعی بَه دومله شین، زیرونه آرا کا موجازات بَبین، تا گِردیرا درس عیبرَت ببون.

⁸ گردِ اِمونَّه، اِم آدَمِن نی خاوِنی کن بویندینه خونِه، اِشتَن تَنون جیفینین آنَّکرد و زاکینی رَد بَکَن و آستامونی یالَه چییون کفر باتین.

⁹ ولی وقتی اَ، اَعظَمه فرشتَه، میکائیل، اَموقه کن اِبلیسینه موسی مَییتی خونه گَه بَه گَه اَدَریَه، جورعتِش نِکردَ کن اِشتَن، چَی ایهانت کردِ خونه بَی محکوم بکرِ، بَسکم تاکَه واتِش: «خداوند بَتِه توبیخ بکرِ!»

¹⁰ ولی اِمِن اَ چیی ایی کن اَی آنینَّموست ایهانت بَکَن، اَیِن بی شوعورَ خَیونون شیوار، هر چیی ایی غَریزَکا بفَهمِستین، هَه چَوون نیفله آبِه باعیث ببیَه.

¹¹ برامِه چَوون حالیرا! اِمی خونه کن قائِنی راه دوملَه شَه اینَه و اِشتَن بَرَ بَردِ خونه، بَلعامی سَفَه راه دِلَه دگِنِستین و قورَح شورشیکا نیفلَه آبَه اینَه.

¹² اِمِن، بی اِمکن بتَرسِن، شمَه پور موحبتَه مِیمانیکا، بَشِمَنه بَردین و بِنتین، ولی اَیِن هنتَه نون آبَه کازَمَغارِنی شیوارین کن آوی بِنیکاینَه و اوون نییَب ویندِ؛ اَیِن شونَه اِنی هِستینَه کن تاکَه اِشتَن فِکریکاینَه؛ هِنتَه بی کِلاکَه خِرونی شیوارین کن وا اَوون بَرَندییَه، پایزی آخِری بی میوَ دارِنی بَمَندین، کن دِ کَرَ مَردَین و ریشَکا پِوَجیستین.

¹³ اِمِن هنته دَیرا یالَه موجون شیوارین کن اِشتَن بدَ اعمالی، پِتی شیوار بَنَّورد و سرگَردونَه اِستَرَ اِنی شیوارین کن زَیرونه ظِلَمات چَوونرا تَیین آبیَه.

¹⁴ خَنوخ کن، آدَمی بَه دوملَه هفتومین اودوم بَه، اِم چییون خونه پیشگوییش کردَ، کن: «بوین، خداوند، اِشتَن هَزاران هَزار گلَه موقدسونَّه آ

¹⁵ تا گِردی سَردِرِ دیوون بکرِ و بی دینون گِردی، چَوون گردِ آوشرَ کارون خونه کن اِشتَن بی دینی دلَکا کَردشونه، و گردِ بدَ گفونی کن بی دینَه گناخکارِن چَی زِرَبَرا واتَشون، محکوم بکَرِ.»

¹⁶ اِمِن غور غور اَکَر و ایراد اَگِرین و اِشتَن گناخ کارَ مِیلون دوملَه این، اَیِن یالَه نارگیرینَه گف بَژَن و اِشتَن نفعیرا مردومی دلَکا فرق نَرِن.

صَلا ژِ و آمبست مندِ

¹⁷ ولی شمَه اَی خاجَتی اِن، چَمَه خداوند، عیسی مسیح پَیغَمبرون پیشگویی یاد آرَفنَه

¹⁸ کن بشمَه واتَشون: «آخیرَ زمانِن، دسپَر چیی اِنی آن کن اِشتَن آوشرَ هوا هوَسی دوملَه اینَه.»

¹⁹ هِمِنین کن شمه دلَکا جدایی دَنَّفند و دِنیا اییَه آدَمِنین و خدا روحِشون نییَه.

²⁰ ولی اَی خاجَتی اِن شمَه، وِرَ موقدسَه ایمانیکا بَشتن بنا بکرَ و خدا موقدسَه روح نه دِوا بکَرَ

²¹ و هَه حالیکا کن چَمه خداوند عیسی مسیح رحمتی مونتَظیریرون تا بشِمه زَیرونه زندگیرا هیدایت بکرَ، بَشتن خدا موحبتیکا غَم برَ.

²² بعضیون سَردِرِ کن چیمه میمَه بَکَن، رحیم ببَه؛

²³ بعضیون آرا دلَکا بروَرَ و بروازونَه؛ و بعضیونرا ترسینه، رحمت آمونَه. ولی حتی چَوون شندِرِنیکا کن هوا و هوسینه جیفینینه، نیفرت بدارَ.

²⁴ ایسَه اَیرا کن قادِرَ بشمَه لِسکیستِه کا غَم برِ و بی عَیب و پتلمه یالَه خَشینه اِشتَن شکوه و جلالَه حِضوریکا حاضیر آکَرِ،

²⁵ چَیرا کن چَمَه نیجات اَدَر و چَمه تاکَه خدا اَ، چَمَه خداوند، عیسی مسیح واسیطنَه، جلال و شکوه و سلطنت و زاکین ببو. اَ کن شِروو کا هِست بَه، و ایسَه هِستَه و زَیرون بَمندییَه. آمین.