یوحنا 16 - کتاب مقدس به زبان تالشي - گویش مرکزی1 «اِم چییون بَه شمَه واتمَه تا شمَه ایمانیکا مَلِسکَه. 2 عیبادَتگا اونکا شِمَه ایخراج بکَنَه و حتی زمانی آرَرَست کن هر کم شمَه بکشِه، فکر بکَیَه کن خدا خیدمت کردشَه. 3 اَیِن اِم کارون بَکَنَه، اِمی خونه کن نه آستامونیهَ دَدَ آزنِستَشونَه، نه بَمن. 4 ولی اَز اِم چیون بَه شمَه واتمَه تا وقتی کن چَوون اَنجوم بِه وَقت آرَرَست، شمَه یاد آرَفنه کن اَز اِم چییون بَشِمَه واتِم. اَز اِم چییون هَه اَولیکا بَه شمه نِواتِم، اِمی خونه کن شمنَه دَرِبیمَه. 5 «اَمّا ایسَه اِشتَن رَونَه آکَری وَر بَشیمَه، و هیچ‌کم شِمَکا دَنیَه پَرسِست کن، ”کرم جگارا بَشیشَه؟“ 6 بَلکَم اِمی خونه کن اَز اِم چییون بَشِمَه واتِم، شمه دل غورصَنه پَتلَمَه آبَه یَه. 7 با اِم حال، اَز حَییقتی بَه شمَه باتیم، کن چمن شِه بَه سودِ شِمَه یَه. اِمی خونه کن اَگَم نِشوم، اَ دیفا اَکَر شمه وَرنیام؛ ولی اَگَم بشوم اَی شمَه وَر رَونَه آمَکرد. 8 وَقتی اَ با، دِنیا قانع بَکَیَه کن، گِناخ و عیدالت و دیوون کَردِ خونِه، مَحکوم بَکَیَه. 9 گِناخی خونه، اِمی خاطر کن بَمن ایمان نینَّورد. 10 عیدالتی خونِه، اِمی خاطر کن دَدَ وَر بَشیم و دِ بَمن نینَّویند. 11 و دیوون کَردِ خونه، اِمی خاطر کن اِم دِنیا رَئیس کن شَیطونه محکوم آبَه یَه. 12 «هنوزَنی خَیلی گفِن دارم کن شمَرا بواجم، اَمّا ایسَه چَی دَرَستِه اینجاری نِدارَ. 13 وقتی کن روح راستی کن هَه خدا روحَه با، اَ بَشِمَه بَه گِردِ حَقیقت هیدایَت بَکَیه؛ اِمی خونه کن اَ اِشتَن بَسَر گَف نیَژ، بَلکَم اَچیی کن دَرَرست باتیَه و اَ چیی ایکا کن آیَندَکارَ و اَنجوم بَه نی بَشمَه باخَبر بَکَیه. 14 اَ چمن جلالی دیار آرَکَرد، اِمی خونه کن اَ اَچیی ایی کن بَمنکا هِستَه ویرَگَت، و بَه شمه اییلام بَکَیَه. 15 هَر چیی ایی کن دَدَ شِنَه، چمن شِنَه. اِمی خونه کن واتِمَه اَ اَچیی کن بَمنکا هِستَه ویرَگَت، و بَه شمه اییلام بَکَیَه. 16 « ایی تَلَکه زمانی بَه دوملَه دِ بَمن نینَّویند، ولی ایی تَلَکه زمانی بَه دوملَه هَنی بَمن بَویندیرون» 17 اَموقه بعضی عیسی شاگردِن یَندِ نَه واتِشون: «چَی منظور ام گَفیکا چِچی بَه کن، ” ایی تَلَکه زمانی بَه دوملَه دِ بَمن نینَّویند، ولی ایی تَلَکه زمانی بَه دوملَه هَنی بَمن بَویندیرون؟ “ یا اِمیکا کن باتیَه، ”اِمی خونِه کن دَدَ وَر بَشیم؟“» 18 پس شاگردِن یَندِ اَواجینه: «اِم ”تَلَکه زمان“ کن باتی چِچیه؟ چَی گَفیکا چیی ایی سَر آنِگِنیمون؟» 19 عیسی بَموستی کن اَپیشونه اَیکا سؤال بکَن؛ پس اَیِنِش واتَه: «اِمی خونِه یَندِ نَه گَفه ژَنه اَکَریرون کن واتمَه، ایی تَلَکه زمانی بَه دوملَه دِ بَمن نینَّویند، ولی ایی تَلَکه زمانی بَه دوملَه هَنی بَمن بَویندیرون؟ “ 20 حَییقتا بَه شمَه باتیم، شمه برَمِه و عازیه بکَرون، ولی دِنیا خَشی بَکَیَه؛ شمه بَرضخ بَبیرون، اَمّا شمه قورصَه خَشی ببیَه. 21 وقتی کن اِیلَه ژِنی زَندِ وَقت آرَرَست اَ ژِن داج بَکَشتی، اِمی خونه کن چَی زَندِ وَقت آرَستَه یَه؛ ولی ایلَه اینسانی دِنیا آمِه خَشی خونه دِ اَ عَضابی یاد نیَوَرد، . 22 هنتَرکِه، شمه ایسَه بَرضَخینه؛ ولی اَز هَنی شمه بَویندیمَه و شمَه دل خَش آرَبن و هیچ‌کَس اَخَشی شمه کا وینیَگَت. 23 اَ روجیکا، دِ چیی بمنکا درخواست نینَّکَرد. حَییقتا بَه شمَه باتیمَه، هر چیی آستامونیَه دَدَ کا چمن نومینَه دَرخواست بکَرَ، اَی بَه شمَه آرَدا. 24 تا ایسَه چمن نومینه چیی خواسترون نی؛ بِپیه تا بَشَمه آدوعِه ببو تا شمه خَشی کامیل آبو. 25 «اَز اِمون میثالینهَ شمَرا واتمَه؛ زمانی کا آمِه کن اَز شمَنه دِ مَثَلینه گَف نِمَژ، بَلکَم آشکارا دَدَ خونِه شمَرا گَف بَژَم. 26 اَ روجیکا، چمن نومینَه درخواست بکَرونَه. شمَرا نِمَوات کن اَز شمه طَرَف دَدکا دَرخواست بکَمَه، 27 چیرا کن دَدَ اِشتَن شمه رَی بَداشتی، اِمی خونه کن شمه بَمن رَی دارَ و ایمان وَردَرونَه کن اَز خدا طَرَفیکا آمَه ایمه. 28 اَز دَدَ طَرَفیکا آمیمهَ و اِم دِنیا دِلَه دَرمَه ایمَه؛ و ایسَه اِم دِنیا بَنامه و دَدَ وَربَشیمَه.» 29 چَی شاگردِن واتِشون: «ها، ایسَه کایشَه آشکارا گَف ژِ، نِه مَثَلونَّه. 30 ایسَه دِ بَموستیمون کن گردِ چیونکا خَبَر داری و حتی نِپیستِشه کَسی بَتکا سوال دَپَرسِه. اِمی خاطرَ کن اَمه، ایمان دارَم کن خدا طَرَفیکا آمَه ایشَه.» 31 عیسی اَیِنِش واتَه: «ایسَه ایمان دارَ؟ 32 زمانی کا آمِه، وایسه آرَستَیه، کن شمَه ولاخ بَبیَنه و هر کم اِشتَن کَه زِندَگیرا بشیَنه و بَمن تاک بَنارون؛ اَمّا اَز تَنخا نیمَه اِمی خونه کن آستامونیَه دَدَ بَمنَه دَرِ. 33 اِمون شمرا واتمَه تا چمن دلَکا صلح و سلامتی بدارَ. دِنیا دِلَکا شِمَرا ایذَت و آزاربَبیَه؛ ولی دلْی زبق غَم بَرَ، اِمی خونه کن اَز دنیاسَردِرِ پیروز آبَه ایمَه.» |
@ 2024 Korpu Company