یوحنا 14 - کتاب مقدس به زبان تالشي - گویش مرکزیعیسی، راهَه و حَییقتَه و زندَگییَه 1 عیسی واتِشه: «شمه دل تَتَّه وَسَکا مبو. خدا کا ایمان بدارَ؛ بَمن نی ایمان بدارَ. 2 چمن دَدَ کَرا وِرَ چَمَه هِستَه. اَگَم اِنتَرَ نِبَه بَه شمَه اَواجیمَه، بَشیمَه تا جگایی شمَرا آمادَ بکَم. 3 و اَموقه کن شیمَه و جگایی شمه خونه آمادَ آکَردِمَه، هَنی بومَمَه و شمَه اِشتَن وَر بَبَردیمَه، تا اَجگاکا کن اَز هستیمَه شمَه نی ببَه. 4 جگایی کن اَز بَشیمَه شِمَه چَی راه بَموستیرون.» 5 توما عیساش واتَه: «آقا اَمه نِزنَم کِرَم جگارا بشیشَه، پس چِنتَرَ بَشامون راه آزنستِه؟» 6 عیسی بَی واتِشَه: «اَز راه و حَییقت و زندَگی هِستیمَه. هیچ‌کَسی غَیراَز چمن واسیطۀ نَه دَدَ وَر نیام. 7 اَگَم بَمن آزنیرون، چمن دَدَ نی آزنیرون؛ چیمی بَه دوملَه اَی آزنَه و اَی ویندَرونَه.» 8 فیلیپُس عیساش واتَه: «آقا، آستامونیَه دَدَ چمرا آمون، کن هِم چمَرا وَسَّ.» 9 عیسی بَی واتِش: «فیلیپُس، خَیلی وَقته کن شمنَه دَرِ ایمهَ و تِه هَنوزَنی بَمن آزنِستَر نیَه؟ هَر کَم کن بَمن ویندشَه، آستامونیهَ دَدَ نی ویندَشه؛ تِه چِنتَرَ بَشاشَه واتِه ”آستامونیَه دَدَ اَمه آمون“؟ 10 باور نیشَکَرد کن اَز دَدَ دلکامَه و دَدَ چمن دلَکا؟ اِم گَفِنی کن اَز شمَرا باتیمَه اِشتَن بَسَر نِموات، بسکَم دَدَ کن چمن دِلَکا بَمندیَه، اِشتَن کارون اَنجوم دَرِ. 11 چمن اِم گَفی باور بکَرَ کن اَز دَدَ دلَکامه و دَدَ چمن دلَکا؛ اَگَم باور نینَّکرد، اَ کارون خونِه، اِمی باور بکَرَ. 12 «حَییقتا بَه شمَه باتیمَه، هَرکم بَمن ایمان بِدار، اَ نی، کارِنی کن اَز بَکَم، بَکَیَه، و حتی کارِنی اِمونکا یالتَر بَکَیَه، اِمی خونه کن اَز دَدَ وَر کایمَه شِه. 13 هر چیی ایی کن چمن نومینَه بِپییَه، اَز اَی اَنجوم آمَدا، تا دَدَ جلال، زوعَه دلَکا اَیر آبو. 14 اَگَم چیی ایی چمن نومیکا بَمنکا بِپییَه، اَز اَی اَنجوم آمَدا. عیسی خدا موقدسَه روح وَعَدَ دَرِ 15 «اَگَم بَمن رَی بِدارَ، چمن حِکمون اَنجوم بَدارون. 16 واَز دَدَ کا دَرخواست بکَمَه و اَ دییَرَ دیفا اَکَری بَه شمَه آرَدا تا اوزون شمَه نه دَرِ ببو، 17 اَ دیفا اَکَر، روح حَقیقَتَه کن خدا روحَه. دِنیا نیَشا اَی قِبول بکَرِ، اِمی خونه کن نِه اَی بویندی و نِه بَی آزنِه؛ ولی شمه اَی آزنَه چیرا کن شمَنَه بَمندیَه و اَ شمَه وِجودیکا بَبیَه. 18 «بَشِمَه بی کس نمَشت؛ شمَه وَر بومَمَه. 19 کَمه زَمانی کن دَیوَرِ دِنیا دِ بَمن نیویند اَمّا شمَه بَمن بَویندیرون، اِمی خونه کن اَز زِندَایمَه، شمَه نی زندَگی بَکَرون. 20 اَروجیکا، بَموستیرون کن اَز دَدَ دلَکامه و شمَه چمن دلَکا و اَز شمَه دلَکا. 21 اَ کن چمن حِکمون دارِ و اَوون اَنجوم دَرِ، هَیَه کن بَمن رَی دارِ. اَکَن بَمن رَی دارِ، چمن دَدَ اَی رَی بَداشتیَه و اَز اَی رَی بَداشتیم، و بَشتَن چَیرا اَیر آمَکرد.» 22 یَهودا اسخریوطی نِه اَیلَه یهودا عیساش واتَه: «آقا، چِنتَرَ یَه کن تِه بَشتن چمَرا اَیر آشَکَرد، ولی بَشتن اِم دِنیا آدَمونرا اَیر آنیشَکَرد؟» 23 عیسی جواب داشه: «اَگَم کَسی بَمن رَی بدارِ، چمن گَفون اَنجوم دَرِ، و چمن دَدَ اَی رَی بَداشتیَه، و اَمه چَی ور بومَمون و اَینه بَمَندیمون. 24 اَ کن بَمن رَی نِدارِ، چمن گَفون اَنجوم نییَدا؛ و اِم کلام کن کاینَه درَستِه چمن گَف نیَه، بَلکَم دَدَ کن بَمنِش عَندَیَه چَی گَفَه. 25 «اِم چیون وقتی بَه شمَه واتمَه کن هَنوزَنی شمَنه درِایمَه. 26 ولی اَ دیفا اَکَر، یعنی خدا موقَدَسه روح، هَه کن دَدَ چمن نومینَه رَونَه آرَکَرد، اَ گردِ چییون بَه شمَه آموج آرَدا و گِردِ اَ چییونی کن اَز شمَرا واتِمَه، شمَه یاد آرَفند. 27 شمَرا صلح و سلامتی بَنام؛ اِشتَن صلح و سلامتی بَشمَه دَرِم. اَچیی کن اَز بَه شمَه دَرِم، اَچیی ایی شیوار نیَه کن دِنیا بَه شمَه دَرِ. نِه بَرزَ شمَه دل تَتَّه وَسَّکا ببو و نِه بتَرسَه. 28 دَرَستِرون کن اَز بَه شمه واتِم، ”اَز بَشیمَه، اَمّا شمَه وَر بومَمَه.“ اَگَم بَمن رَی داریرون، اِمی خونه کن اَز دَدَ وَربَشیمه خَش آرَبیرون، اِمی خونه کن دَدَ بَمنکا یال تَرَ. 29 ایسَه اِمی، چَی اَنجوم بِه بَه نَه شمَرا واتمه، تا وَقتی اِم اَنجوم بَه شِمَه ایمان بوعَرَ. 30 دِ شِمَنه گَف ژِرا فرصَتی مَندَ نی، اِمی خونِه کن اِم دِنیا رَئیس کن شَیطونه کا آمِه. اَ هیچ زِبقی چمن سَردِرِ نِدارِ؛ 31 ولی اَز کاری بکَمَه کن دَدَ بَمن حِکم کردَشَه، تا دِنیا بِزنِه کن اَز دَدَ رَی دارم. پِبَه، اِم جِگاکا بشَم. |
@ 2024 Korpu Company