یعقوبی نامَه 5 - کتاب مقدس به زبان تالشي - گویش مرکزیثیروتمندون خونه هوشدا 1 ولی شمَه اَی ثیروَتمَندِن بِبرَمَه و بِرامِه بکرَ، اِمی خونِه کن مُصیبَتِن شِمَه اینتِظاریکارَ. 2 شِمَه مالو منال پوستَه و شِمَه شِندِرون پِتی ژَیَه! 3 شِمَه طِلِه و نِقرَ اون ژَنگی ژَیَه و چَوون ژَنگ شِمَه زِرَ برا شاهیدی آنَّدا و هِنتَه آرا شیوار، شِمَه جَندَکی گوژدی بَردییَه. شمَه آخِرین روجونکا مالو مَنال گِرد آکَردَرونَه! 4 ایسَه اَ کاریگَرِنی کن شِمَه زمینونکا دورنوستَشونَه، و شِمَه حیلَنَه چَوون مِژدی آنِدارون، شِمَه زِرَبَرا لَسَّه بَژَن. و اَدورنون لَسَّه، لَشکَرون خداوندی گوش آرَستَه یَه. 5 شمَه زَمینی سَردِرِ ناز و نیعمت و هَردِ و هِنتِه کا زندَگی کَردَرونَه، و اِشتَن دِلون کُشتارَ روجیرا قِبرَق آکَردَرونَه! 6 شمَه اَ صالِحه مِردی مَحکوم کَردِرون و کِشتِرون. اَ شمَه ناریکاش مقاومت نِکردَ. غرَّی دِلَکا صبر کردِ 7 پس اَی برا اِن، تا خداوندی آمِه روج صَبر بکَرَ. دَیسَه کن چِنتَه کَشاوَرز مونتظیر بمندی تا زَمین اِشتَن با اَرزِشَه اَکینی بدَرِ؛ چِنتَرَ صَبر بَکَی تا پایز و باهارَ کِلَاک زَمینی سَردِرِ بِوارِ. 8 پس شمَه نیی صبر بدارَ و دِلی زِبق غَم بَرَ، اِمی خونه کن چَمَه خداوندی آمِه، نِزِکَ! 9 برا اِن، یَندِ زِرَبَرا غور غور نِکرَ، تا شِمَه سَر نی دیوون مَبو، بوینَه داوَر بَرَنگا سَریکا پا مَندَ. 10 برا اِن، پَیغَمبَرونیکا کن خداوندی نومیَه گَف اَژَنینَه، صَبر و موصیبتی درسی آموج بیگِرَ. 11 ولی خشی اَیِنی حالیرا کن صبرِشون کردَ و تاو وردِشون. شِمَه اَیوبی صَبر و تاو وَردِ خونِه دَرَستَرون، و بَموستیرون کن خداوند آخیر بَسَر بَینَه چِش کَردَ، اِمی خونه کن خداوند، بی حَد و حیساب مِربان و بَخشندَیه. 12 چمن برا اِن، ولی گِردیکا مُهیمتَراِمه کن قَسَم مَرَ؛ نِه آستامونی سَر، نِه زَمینی سَردِرِ و نِه هیچ دییَرَ چیی ایی سَر. بَسکم بَرزَ شِمَه ها هَه ها ببو و شِمَه نِه هَه نِه، نِکَرِ کن مَحکوم بِبَه. دِوا ایمانینَه 13 شمَه دلَکا کییَه کن کا عَذاب کَشتِه، برزَ دوا بکَرِ؛ شمَه دِلَکا کی خَشی بَکَی، برزَ حَمد و ستایشی سِرودی بوخونِه. 14 شمه دلَکا کی آزاریَه، برزَ کِلیسا ایسبیَه ریشون خِلِه بکَرِ و اَیِن چَیرا دِوا بِکَن و خداوندی نومینَه، روعَنینَه بَی مسح بِکَن. 15 ایمانینَه دِوا کَردِ، آزاریَه آدَمی نیجات دَرِ و خداوند بَی راست آرَکَرد، و اَگَم اَ آدَم گناخی کَردَش ببو، بخشیدَ آرَبن. 16 پس یَندِ وَر اِشتَن گِناخون ایتراف بکَرَ و یَندِرا دِوا بکَرَ تا شفا بیگرَ. صالحه آدَمی دِوا، برکه زبقینه عَمَل بَکَی. 17 ایلیا اِ پیغمبَر نی هِنتَه چَمَه شیوارَ اینسانی بَه، ولی اِمی خونِه کن گِردِ اِشتَن وِجودینَه دِوا کَردِشَه کن کِلاک مَوارِ، سه سالو نیم کِلاک زَمینی سَردِرِ نِوارِستَه؛ 18 و اَموقه کن هَنی دِوا کَردِشَه، آستامونیکا کِلاک وارِستَه و زَمین اِشتَن اَکینی پِروَردِش. 19 چمن برا اِن، اَگَم کَسی شِمَکا حَقیقَتیکا رَت آبو، و دییَری بَی آگاردِنِه، 20 اَ آدَم بِزنَه کن هَر کَس کن ایلَه گِناخکاری، گُمراهیکا آگاردِنِه، چَی جانِش نیجات دوعه یَه و وِرَ گِناخون پوشامنیَشَه. |
@ 2024 Korpu Company