یعقوبی نامَه 4 - کتاب مقدس به زبان تالشي - گویش مرکزیدِنیا پرستی خونه هوشدار 1 چِه چیی ایی شِمَه دِلَکا جَنگِستِه و ژِژِ راست آبِه باعیث بَبی؟ مَگم شِمَه هوا و هَوسون خونه نییَه کن شمَه وِجودی دِلَکا کاینَه جَنگِستِه؟ 2 چی ایی طَمارزو دارَ، ولی وقتی کن اَی بَدَست نینَّوَرد آدَم بَکِشتیرون. طمع بَکرون ولی وقتی نینَّشا اَی بَدست وردِ، جَنگِستِه و ژِژِ راست آکَرَ، شمه نِدارَ، اِمی خاطِر کن دَرخواست نینَّکَرد! 3 اَموقه نیی کن درخواست بَکَرون، وینینَّگت، اِمی خونِه کن بَدَ نِیَّتینَه بَپیرون تا اِشتَن هوا و هَوَسیرا ایستفادَ بکَرَ. 4 اَی زیناکارِن، نینَّزنی دِنیا نَه رَفِق گیری، خدا نَه عَدابَت کَردِ یَه؟ پس هَر کَم دِنیا نه رفق گیری دوملَیه، بَشتَن خدا غَنیم بَکَی. 5 یا اِمکن فکر بَکَرون موقدسه نوشتَه دَدار واتَشَه: «خدا، روحی کن چَمه دلکاش نوعه یَه سَردِرِ، بَرک غَیرتیَه؟» 6 ولی خدا ویشتَر فیض بَبَخشِستی. اِمی خاطِر باتی: «خدا یالَه نارون نَکا بَمَندی، اَمّا فروتَنون فیض بَبَخشِستی.» 7 پس شمه خداکا ایطاعت بکرَ. ابلیسی نَ کا بومونَه، و اَ شِمَکا بَوریتی یَه. 8 خِداکا نِزِک آبَه، و اَ نی شِمَکا نِزِک آرَبن. اَی گِناخکارِن، اِشتَن بالون پاجا آکَرَ، و اَی شمَه کن دو دل هِستیرون، اِشتَن دِلون پاجا آکَرَ. 9 بَه حالِ زار دَگِنَه و عازیَه و بِرَمِه بکَرَ. شِمَه خوروستِه عازیَه ببو، و شِمَه خَشی قورصَه. 10 خدا حِضوریکا بشتن فروتَن آکرَ کن اَ بَشِمَه سرفراز بَکی. 11 اَی برا اِن، یَندِ کا بَد نواجَه. هَرکَم اِشتَن برا زِرَبَرا بَد بِواجِه و یا اِشتَن برا دیوون بکرِ، شَریعَتی زرَبرا بَد واتَشَه و شَریعَتیش دیوون کردیه. ولی اَگَم تِه شَریعَتی دیوون بِکَری، تِه شریعتی داوریشَه، نِه اَ کن شریعتی اَنجوم آرَدا! 12 تاکَه ایی نفرَ، کن شریعتِش دوعَه یه و داوَرَ، اَ هَیه کن بَشایَه نیجات بدَرِ و نیفلَه آکَرِ. پس تِه کییشَه کن اِشتَن خَمسوعَه دیوون بِکَری! سَو سَرا ایفتخار کردِ 13 ایسَه شمَه کن باتیرون: «اُمروج یا سَوسَه اِم شهریرا یا اَ شَهریرا بَشیمون و ایسال اَ جِگاکا بَمَندیمون و تَیجارَت بَکَمون و بَرَ بَبَمون.» 14 اِم حالینَه شمَه حتی نینَّزنی سَو سَه چِه بَبیَه. شِمَه زندَگی چِه چیَه؟ هِنتَه آلاوی شیوارَ کن ایی لحظَکا اَیر آرَب وچَی بَه دوملَه نیفیت آرَبن. 15 پس پی اِنتَرَکِه بِواجَه: «اَگَم خداوند بِپیا، زِندَ بَمَندیمون و اِم کار و اَ کاری بَکَمون.» 16 انترَ کن دیارَ، شمَه اِشتَن یالَه نار گیری خونَه ایفتیخار بَکَرون. اِنتَرَ ایفتخارِن گِرد بَدینَه! 17 پس، هَر کَم بِزنِه کن چِه کاری دِرِستَه و اَی اَنجوم نِدَرِ، اِم اَ آدَمیرا گِناخ بَحیساب آ. |
@ 2024 Korpu Company