یعقوبی نامَه 2 - کتاب مقدس به زبان تالشي - گویش مرکزیفرق نوعه گِناخ 1 چمن برا اِن، شمه کن چَمَه خداوند عیسای مسیح، اَ شکوه و جلالی خداوندیکا ایمان دارَ، نِباید آدَمون سَردِرِ فرق بِنَرَ. 2 چون اَگَم کَسی طِلِنینَه اَنگِشتِلِه نَه و خاصَه شِندِرینَه شِمَه مَجلِسی دِلَه دَرا و ایله گیدَلیی نی کَنَه شِندِرینَه دِلَه دَرا، 3 و اَگَم شمَه بَی کن خاصَه شِندِر دَکَردَشَه ویشتر تَوَجه بکَرَ و بَی بِواجَه: «بِه و سَرَنگاکا بِنِش،» ولی گیدَلی بِواجَه: «هَه جِگا کا پا بومون!» و یا: «اِم جِگاکا چمن لَنگون بِن، زَمینی سَردِرِ بِنِش،» 4 مَگَم شمه، اِشتَن دلَکا فرق نوعَرون نی و بَدَ فِکرینَه قیضاوَت کَردَرون نیه؟ 5 خاجَتیَه برا اِن، گوش آکَرَ! مَگَم خدا اِم دِنیا گیدَلیون اینتخاب کَردَش نیَه تا ایمانیکا قودور بِبون و اَ پادیشاهیی میراث بِبَن کن خدا، اَیِن کن بَی رَی بَداشتین وَعدَ آدوعَشَه؟ 6 اَمّا شمَه گیدَلیون بی حرمتی کَردَرونَه. مَگَم ثیروَت مَندِن نینَّه کن بَشِمَه ظِلم بَکَنَه و بَشِمَه مَحکمَرا بَبَنَه؟ 7 مَگَم اَیِن کَسِنی نینَّه کن اَ شَریفَه نوم کن شِمَه سَریکاشون نوعه یَه، کِفر باتین؟ 8 اَگَم واقیین شمَه، شاهانَه شَریعَتی، موقدسه نوشته اون اِم واتَه گفی اَنجوم بدَرَ کن باتی: «اِشتِه خَمسوعَه هِنتَه اِشتَن جانی شیوار رَی بِدا،» چاکَه کاری بَکرون. 9 اَمّا اَگَم فرق بِنَرَ گِناخ کَردَرونَه و شریعت، بَشِمَه تغصیرکار بَموستی و بَشِمَه محکوم بَکَی. 10 چون اَگَم کَسی گِردِ شَریعَتی اَنجوم بدَرِ ولی تاکَه ایلَکا کم کاری بکَر، اَ تمام شریعتی کا گناخکارَ. 11 اِمی خونه کن اَ خدایی کن واتشَه: «زینا مَکَ» هِنتَه نی واتَشَه: «آدَم مَکِش.» تِه اَگَم زینا نِکَری، اَمّا اَگَم آدَم بِکِشی، شَریعَتی چاکِنِستَرَ. 12 پس هِنتَه کَسِنی گَف بِژَنَه و عمل بکَرَ کن بَموستین آزادی شَریعتی طبق، چَوون سَردِرِ دیوون بَبیَه، 13 اِمی خونِه کن دیوون اَ کَسیرا کن رحم کَردَش نیَه، بیرحم بَبیَه. رحم، دیوونی سَردِرِ حریف بَبیَه! ایمان بی عمل مردیَه 14 چمن برا اِن، چِه بَرَ ایی دارَ اَگَم کَسی اِیدعا بکَرِ کن ایمان دارِ، ولی اعمال مَدارِ؟ اِنتَرَ ایمانی بَشایَه بَی نیجات دوعِه؟ 15 اَگَم برا یا خالاایی اِشتَن روجَه هَردَ چیی و دَکَردَ چی دَس دَریس ببو 16 و کَسی شِمَکا اَوون بِواجِه: «بِشَه بَسَلامَت، و گَرم و سیر آبَه،» ولی چَوون جَندَکی نیازون نِدَرِ، چِه فایدَ ایی دارِ؟ 17 پس تَیَه ایمان اَگَم اعمالینَه دَرِ نِبو، مَردَ یَه. 18 ایسَه ایمکان دارِ کَسی بِواجِه: «تِه ایمان بَداشتیشَه و اَز اَعمال بَداشتیم!» تِه اِشتِه ایمانی کن بی اَعمالَه بَمن آمون و اَز چمن ایمانی چمن اعمالینه بَتِه آمونم. 19 تِه باور بَداشتیش کن خدا ایلَه یَه. چاکَ بَکَش! حتی پَریانِن نیی اِنتَرَکِه باوری بَداشتین و تَرسیرا بَلَرزِستین! 20 اَی نادون، اَپیرَ بِزنی چیرا ایمان بی اعمال بی بَرَ یَه؟ 21 مَگَم چَمَه بابا ابراهیم، اَعمالی خونِه صالح بَه حیساب نامَه، اَموقه کن اِشتَن زوعَه ایسحاقی مَذبَح سَریکا تقدیمِش کَردَ؟ 22 کاش ویندِ کن چَی ایمان و چَی اَعمال، یَندِنَه کار اَکَرینَه، و چَی ایمان چَی اعمالینه کامیل آبَه. 23 و توراتی اَ نوشتَه اَنجوم بَه کن باتی: «ابراهیم خِداش ایمان وَردَ و اِم چَیرا صالح بِه بَحیساب آمَه،» و ابراهیم، خدا رَفِق خِلِه آبَه. 24 پس بَویندیرون اَعمالینَه یَه کن اینسان صالح بَه حیساب آ، نِه تاکَه ایمان داشتِنه. 25 هِنتَه نی مَگَم راحاب فاحیشَه اَعمالینَه صالح بَحیساب نامَه، اَموقه کن قاصیدونِش پنا داشَه و اَیِنِش دییَرَ راهینَه عَندِشَه؟ 26 هَتَه کن تن روحکا تاک آبو بَمردی، ایمان نی بی اعمال مَردَیَه. |
@ 2024 Korpu Company