یعقوبی نامَه 1 - کتاب مقدس به زبان تالشي - گویش مرکزی1 خدا و خداوند عیسی مسیحی وَزیَر، یعقوبی طَرَفیکا، دانزَ قامیرا کن دِنیا کا وِلاخ آبه اینَه. سلام! شِمَه ایمانی ورداوَرد کردِ 2 چمن برا اِن، هَر موقه کن مُختَلِیفه وَرداوَردونَّه سَراسر بَبیرون، اَوون گِردی یاله خَشی بِزنه! 3 اِمی خونِه کن بَموستیرون وقتی شِمَه ایمان وَرداوَرد ببو، صبر و تحمل اَکین آرَدا. 4 پس بَرزَ صبر و تحمل اِشتَن اَکینی کامیل بدَرِ تا بی عَیب و کامیل آبَه و چیی ایی کم مدارَ. 5 اَگَم کَسی شِمَه دِلکا حیکمَتِش نییَه، اَی خدا کا بپیا، هَه خدایی کن بی اِمکن چَمای بکَرِ دستودیل بازینه گِردی بَبَخشِستی، بَی نی، آرَدا. 6 ولی اَ آدَم پی ایمانینَه و بی اِمکن چیمه میمَه بکَرِ بِپیا، چون کَسی کن چیمه میمَه بکَرِ، هِنتَه دَیرا موجی شیوارَ کن وا بَی هر طرفیرا دَرَراکنِست. 7 اِنتَرَ آدَمی گمون نِکَرِ کن خداوندیکا چیی ایی ویرَگت، 8 چون اَ دو دِلَه آدَمیَه کن هیچ کِرم اِشتَن راهونکا ثوباتِش نییَه. 9 برا ایی کن گیدَلیی اَ اِشتَن سربلندی سَردِرِ ایفتخار بکَرِ، 10 و ثیروَت مَند اِشتَن فروتنی سَر ایفتخار بکرِ، اِمی خونه کن اَ هِنتَه وَیاوونی گُلی شیوار نیفیت بَبی. 11 هَتَه کن آختاو اِشتَن اَسوجونَه رَندینَه پِرَرا، واشی خِشک آرَکَرد و چَی گُل ویرَبِن و چَی خاص گیری نیفیت بَبی، ثیروَتمندَ آدَم نی اِشتَن کَسب و کاری موقِه نیفیت آرَبن. 12 خَشی اَ آدَمی حالیرا کن وَرداوَردونکا صبر تحمولینه تاو بوعردی، اِمی خونه کن وَقتی وَرداوَردیکا سربلند بِرِن با، اَ تاجی کن زندَگی بَبخشِستی، و خدا اَیِنی کن بَی رَی بداشتین وَعَدَ آدوعَشَه، ویرَگت. 13 هیچ کَم اِمی خونه کن وَس وَسَه بَبیَه نِواجِه: «خدا اَ کن بَمن وَس وَسَه بَکَی،» چون خدا هیچ بَدی اینَه وَس وَسَه آنیَبِن، و کَسی نی وَس وَسَه نییَکرد. 14 ولی هَنگومی کن کَسی وس وسه بَبیَه، چَی هَوا هَوسَه، کن بَی گول بَژَی و بَی دوم دَرَفَند. 15 چَی بَه دومله وقتی کن هوا هَوس گون آرَبن، گِناخ بَزَندی و گِناخ نیی وَقتی کامیلا یال آبو، مَردِ دِنیا بوعردی. 16 چمن خاجَتیَه برا اِن، گول مَرَ! 17 هَر چاکَه خَلا و هر کامیلَه خَلا ایی آستامونیکارَ، و نورون دَدَ طَرَفیکا آ، کن اَیکا نِه تَغییری هِستَه و نِه هیچ سا ایی کن تغییریکا بوجود آمَه ببو. 18 اَ اِشتَن ایرادَنه کلامی حَییقتینه، اَمَش خَلق کردَ تا چَی مخلوقاتی نوبَر ببَم. کلامی دَرَسته و اَنجوم دوعِه 19 چمن خاجَتیَه برا اِن، اِمی بِزنَه: هر کَم پی دَرَستِکا تِند ببو، و گَف ژِ کا کِل و آسرنگِستِه موقه آرام ببو! 20 اِمی خونِه کن اینسانی آسرنگِسته، اَ صالح بِه ایی کن خدا بَپیشه بار نیَوَرد. 21 پس هَر مودیل فیساد و هر مودیل آوشَر گیری کن مندیَیه، اِشتَنکا رَت آکَرَ و فروتَنینه، کَلامی کن خدا شِمَه دلی دلَکا کَشتَه شه قبول بکَرَ. اَ کلامی کن بَشایَه شِمَه جانون نیجات بدَرِ. 22 ولی کَسِنی ببَه کن خدا کلامی اَنجوم دَرِن، نه اِمکن تاکَه بَی دنَّرست؛ بَشتَن گول مَژَنَه! 23 چون هَر کس کن خدا کَلامی دَرَرَست اَمّا بَی اَنجوم نیَدا، کَسی بَمَندیَه کن آوَینَه کا، کا اِشتَن صَفَتی دَیَشتِه 24 اَ بَشتَن چَی دِلَکا بَویندی، ولی تا آوَینه ناری کا بَشیَه، جَخت یاد بَرَکَرد کن چِنتَرَ صَفَتی داشتَه شَه. 25 اَمّا اَ کن کامیلَه شَریعَتی سَردِرِ کن شَریعت آزادیَه چَم دَشتَشَه، و درَرَست و بَی یاد بَنیَکرد بَسکم بَی اَنجوم آرادا، اَ اِشتَن کارونکا بَرکت بگَتی. 26 اَگَم کَسی گَمون بَکی دیندارَ، ولی اِشتَن زونی نِیَشا غَم هَردِ، کا بَشتن گول ژِ، چَی دینداری دَدارَ. 27 پاجا و خالیصه دینداری چَمَه دَدَ، خدا چَمیکا اِمه، کن صَقِرون و ویوَ ژِنون غَرّی موقِه آرَستِه و بَشتَن اِم مَچمَه دِنیاکا رَت آکَردِ. |
@ 2024 Korpu Company