نامَه، عِبرانیه نَتاجَه مسیحیونرا 9 - کتاب مقدس به زبان تالشي - گویش مرکزی

عیبادت کردِ زَمینی موقدسَه جِگا کا

¹ ایسَه حتی اولین عهد، عیبادت کَردِرا قانونِنی داریَه و زمینیکا نی ایلَه موقدسَه جگا داری.

² چون اَوالَه ایی سی آبَه بَه و چَی اولین چمَکا چراغدان، میز و موقدسَه نون بَه. اِم جگا نومی ’قُدس‘ باتین.

³ دوومین پردَ پِشتیکا چَمَه ایی بَه کن چَی نومی ’قُدس‌الاقداس‘ اَواجین؛»

⁴ اِم چَمَکا، طِلِه اینَه آتَشدان بوخوری سوتِه راشون نوعه بَه و عهدی صِندوخ کن چَی دوور طِلِنین بَه، کن چَی دلَکا طِلِه اینَه خِم بَه کن چَی دِلَکا ’مَنّا‘ غَم هَرینَه، و هارونی چَلیک کن چیجَه ژَش بَه و دِ گلَه سِنگَه لوح کن عهدی دَ گِلَه فرمونی چَی سریکاشون نوشتَه بَه.

⁵ صِندوخی کفاکا، کن بَی تخت رحمت اَواجینه، ’جلالی‘ کَروبیون فرشتَه، ساشون ویرفندَ به. نِمَشا ایسَه اِم چییون ایلَه ایلَه شمَرا جیگیر بکَم.

⁶ گردِ اِم چییون حاضیر آبِه بَه دوملَه، کاهینِن یَژَن اولین چَمَه دِلَه دَرَشین تا اِشتَن وظیفه اون اَنجوم بدَرِن.

⁷ ولی دوومین چَمَه دلَکا تاکَه یالَه کاهین دَرَشیه، اَ نی تاکَه سالی ایکَرَ، و اوزون اِشتَنَه قِربونی خونی اَبَریه تا اِشتَن خونه و قامی گناخون خونه کن نادون گیری را اَنجومِشون دوعَه بَه، اَوون تقدیم بکرِ.

⁸ و خدا موقدسَه روح انترَ آمونِه تا وقتی کن نارَ چَمَه آمبستَه، اَ راهی کن قودس الاقداسی دلَرا بَشی هنوزنی آبَه نییَه،

⁹ کن اِم ، اِم دوورَ را ایلَه نشونَه یَه. چَی واتَنه، خَلا اِن و قِربونییِنی کن آنَّدا، نییَشا عیبادَت اَکَری ووژدانی کامیل پاجا آکَرِ.

¹⁰ بَسکم اَیِن تاکَه هردَنینِن و هِنتَنینَه چییِن و موختلیفَه غوسلِن و قانونِنی هِستینه کن جندَکی مربوطین، و تاکَه تا اَموقه کن خدا تازَ تَرتیب بدَرِ ایتبارِشون هِستَه.

مَسیح خونی واسطه نه رَخِسته

¹¹ ولی وقتی مسیح اَ چاکَه کارونرا یالَه کاهینی مرتَبَکا آمَه کن ایسَه چَمه نصیب آبیَه، اَ ایله یالتَرو کامیلترَ اَوالَکا دِلَه دشَه کن اینسانی بالی سیِ آکردَ چی نِبَه و اِم خیلقتی شِن نییَه.

¹² اَ ایکرَ اوزونیرا قودسو الاقداسی دلَرا شَه، نِه کن تَکَه اون و موندَ اون خونینَه، بَسکم اِشتَن خونینه اِنتَرَ زَیرونَه رخِستِه ایی حاضیر آکردِشه.

¹³ اِمی خونه کن اَگَم جیفینینَه آدَمون سَردِرِ، تَکَه اون و سیامالون خونی و موندَ اون خاکَه پَشی پِشَندِ نَه اوون تقدیس اَکَریَه تا جندَکیکا پاجا آبون،

¹⁴ چَنَه ویشتَر، مسیح خون کن اَ زَیرونَه روح واسیطنَه، بَشتَنِش بی عَیب، خدارا تقدیمِش کردَ، چَمَه ووژدانی دَدارَ کارونکا پاجا بَکَی تا بشوعَم زندَ خدا خیدمت بکرم.

¹⁵ پس مسیح ایلَه تازَ عهدی واسیطیَه، تا اَیِنی کن صَلا ژَشونه بشان خدا اَ وعدَ دوعَه زَیرونَه میراثی بَدَست بوعَن، اِمی خونه کن ایلَه مَردِ ایتفاق دگِنستَه کن اَیِن اَ گناخِنی کا کن اولین عهدیکا اَنجوم بَه، براخمونِه.

¹⁶ چون وقتی ایله وصیَت اَنجوم بَبی کن ثابیت ببو وَصیَت اَکَر مَردَیه.

¹⁷ اِمی خونه کن مَردِ به دوملَه بَبی وصیَتی اَنجوم دوعِه، و تا وقتی کن وصیَت اَکَر زندَیه، اَ وصیَتی نییَبِن اَنجوم دوعِه.

¹⁸ اِمی خاطیر، حتی اولین عهد نی بی خون، برقرار نَبییَه.

¹⁹ چون اَموقه کن موسی واسیطنه، شریعتی ایلَه ایلَه حکمون قامی گردِ آدَمونرا اییلام آبه، اَ موندَ اون و تَکَه اون خونیش پِگتَه و آوینَه و سِرَ پَشمنَه و زوفا بَشو خالینَه، طوماری سَر و مردومی سَردِرِ پِشَندِش

²⁰ و واتِش: «اِمَه اَ عهدی خون کن خدا شِمَراش حکم کردیَه.»

²¹ هنترَکه هه خونی اَوالَه سَریکا و گردِ قَبه قَجَقِنی کن پرستِش کردِرا ایستفادَ بَبی سَردِرِ پِشندِش.

²² واقیین، شریعتی واتنَه، تقریبا گردِ چییِن خونی واسیطنَه پاجا بَبی و بی خونی ویکردِ، گناخونرا آمورزِشی نییَه.

²³ پس پی اِم چییون کن هنته ایله نمونَه آستامونیَه چییون کارَ، اِم قربونیونَّه پاجا آبون، ولی آستامونیَه چییِن اِشتَن، اَ قربونییِنی کن اوونکا بِیترَ، پاجا آنَّب.

²⁴ اِمی خونه کن مسیح اَ قودس الاقداسی دِلَه کن آدَمون بالی سی آکردَ چی بَه و تاکَه نمونَه ایی اییَه حَییقیَه چیونکا کا اَ، دِلَه دَنِشه، بَسکم آستامونیرا شَه تا چَمَه طرَفیکا خدا وَریکا اَیر آبو.

²⁵ و انترَ نییَه کن اَ، یَژَن بَشتن قِربونی بکرِ، هنته ایلَه یالَه کاهینی شیوار کن هر سال قودس الاقداسیکا دِلَه دَرَشی، اَ نی اَ خونینَه کن اِشتَن خون نییَه.

²⁶ اِمی خونه کن انترَکه، مسیح پی دِنیا خلق بِه موقه کا یَژَن عَذابِش کشتَه ببو، ولی انترَ نبَه، اَ، ایسَه ایکرَ اوزونیرا آخیرَ زمانونکا آمَه تا بَشتن قربونی کردِ نَه، گناخی نیفیت آکرِ.

²⁷ و هته کن تَیین بیَه، اینسان ایکرَ بَمردی و چَی به دوملَه دیوون کردِ بومَی،

²⁸ پس مسیح نی کن ایکرَ قربونی بَه تا خَیلیون گناخی نیفیت بکرِ، دوومین کرَرا آ، ولی نِه اِمی خونه کن گناخون نیفیت آکرِ، بَلکَم تا اَیِنی کن ایشتیاقینَه چَی چَم بَرا این، نیجات دوعِه را.