نامَه، عِبرانیه نَتاجَه مسیحیونرا 8 - کتاب مقدس به زبان تالشي - گویش مرکزی

ایلَه چاکترَ عهدی یاله کاهین

¹ ایسَه اصل گَف کن اَمه کایمون واتِه اِمَه کن: اَمه انترَ یالَه کاهینی بَداشتیمون کن خدای موتعالی تختی راستَه وَریکا، آستامونیکا نشتَه،

² موقدسَه جگا اون پاسَری، اَ حییقیَه اَوالَه کن خداوند اَش سی آکَردَیه، نِه اینسان.

³ اِمی خونه کن هر یالَه کاهینی تَیین بَیَه تا خَلا اون و قِربونییون تقدیم بکَرِ، پس اِم کاهین نی پی ایی چیی ایی تقدیم کردِرا بدارِ.

⁴ ایسَه اَگَم اَ زَمینی سَردِرِ مند بیبیستِه، هرگز کاهین نِه آبی، اِمی خونه کن کاهینِنی مَندینَه کن شریعتی حکمی واتنَه خَلا اون تقدیم بَکن.

⁵ ولی اَیِن چییِنی کن آستامونییَه چییون بَمندین و چَوون سا شیوارین، خیدمت بَکن. چون اَموقه کن موسی اَپیش بَه اوالَه بژَنه، خدا بَش حکم کردَ واتِش: «هواسِر ببو کن گردِ چییون هنتَه نمونَه ایی کن کو دلَکا بَته آمونِستَشونه سی آکَری.»

⁶ ولی ایسَه خیدمتی کن مسیح بَدَست وردِشَه، اَ قدیمیَه خیدمتیکا کفاترَ، چون عهدی کن اَ چَیرا واسیطَه یَه، چاکترَ، اَ عهدی کن وَعدَ اون سَردِرِ بَنا آبَیه.

⁷ اِمی خونه کن اَگَم اَ اولین عهد بی عَیب بِبیستِه، دِ نَپیش بَه دوومین عهدی دوملَه ببَم.

⁸ ولی خدا اَوونکا عَیبی پَیدا بَکی و باتی: «خداوند باتی بِوین، ایسَه روجونی بومَنَه، کن اَز ایسرائیلی خاندان و یهودا خاندانینه ایلَه تازَ عهدی دمَبَست.

⁹ نِه کم اَ عهدی شیوار کن چَوون بابا اونَّه دبَستِمه، اَ روجی کن چَوون بالِم گتَه تا اوون ولَتِه مصریکا بِرِن بَروَرِم؛ اِمی خونه کن خداوند باتیَه، اَیِن اَ عهدی کن بَمِنه دبَستَشون به سَردِرِ نِمَندین. پس، اَز اِشتَن صفعتی اَوونکا آگاردِنِستم.

¹⁰ اِمی خونه کن خداوند باتیَه: اِمه اَ عهدی کن اَ روجون بَه دوملَه ایسرائیلی خاندانینه دمَبَست. اِشتَن شریعَتی چَوون فیکرونکا آمَنا، و چَوون دلَون سَردِرِ بَنوِشتیم. و اَز چَوون خدا بَبیمه، و اَیِن چمن قام بَبینَه.

¹¹ و هیچ کس اِشتَن خَمسوعَه آموج نیَدا و هیچ کس اِشتَن برا نییَه وات، ”خداوندی آزون!“ اِمی خونه کن گِرد، یال تا گِچ بَمن آنَّموست؛

¹² اِمی خونه کن اَز چَوون خطا اون سَردِرِ رحم بَکم و دِ هرگز چَوون گناخون یاد آنیمَفند.»

¹³ خدا ایلَه تازَ عهدی خونه گف ژِ نَه، اَ اَولین عهدی بی ایتبار بَکَی؛ و اَ چیی ایی کن ایتیباریکا دگنِستَه، کنَه آرَب و نیفیت بِه را آمادَیه.