نامَه، عِبرانیه نَتاجَه مسیحیونرا 7 - کتاب مقدس به زبان تالشي - گویش مرکزی

مِلْکیصِدِقی کِهانت

¹ اِمی خونه کن اِم مِلکیصِدِق، شهر سالیمی پادشا و خدای موتعالی کاهین بَه. اَ، ابراهیمِش کن پادیشا اِنِش شکست دوعَه بَه، ویندشَه و بَش برکت دوعَه،

² و ابراهیم گِردِ چیی اِنیکا کن داری، اَوونکا بَی دَه یَک آداشَه. چَی نومی اولین معنی «صالح بِه پادیشا» و چَی به دوملَه «سالیمی پادیشا»، یعنی «صلح و سلامتی پادیشا اَ.»

³ اَ مِلکیصِدِقیرا دَدَ نَه نَه نییَه، نِه چَی بونجوق دیارَ، و نِه چَی زندَگی شِروو بَه روجِن و نِه چَی زندَگی آخِرین روجِن دیارین، ولی هنته خدا زوعَه شیوار، اَ تا ابد کاهین بَمندییَه.

⁴ بِوینَه کن اَ چَنَه یالَه شخصی بَه کن قام اسرائیلی دَدَ ایبراهیم، غَنیمتَونکا بَش دَه یَک آداشَه.

⁵ و موسی شریعتی حِکمی واتنَه، لاوی خردَنن کن کاهین آنَّب، پی قام یهودی دلَکا کن چَوون برا اِنین دَه یَک ویگِرِن، هر چَنَه کن اَیِن نی ابراهیمی اودومیکان.

⁶ ولی اِم مِلکیصِدِق کن چَوون اودومیکا نی، ایبراهیمیکا دَه یَک ویگَتِش و ایبراهیمِش کن وَعدَ اون صاحیب بَه، برَکَتِش دوعَه.

⁷ و بی چیمَه میمَه، برَکت اَدَر برَکت ویرَگِریکا یالترَ.

⁸ ایی وَریکا، اَیِنی دَه یَک وینَّگت کن نیفله آنَّب؛ ولی دییَرَ وَریکا، اَ کن چَی خونه شاهیدیشون دوعَه به کن زندَیَه، ده یَک ویرَگَت.

⁹ حتی بشامون واته کن لاوی اِشتَن نی کن ده یَک ویرَگِری، ایبراهیمی واسیطنَه ده یک آداشَه

¹⁰ اِمی خونه کن وقتی مِلکیصِدِق ابراهیمِش ویندَ،هنونزنی لاوی دینا آمه نِبَه.

عیسی، مِلْکیصِدِقی نه مقایسه بَبی

¹¹ ایسَه، اَگَم لاوی کاهینون مرتبَه واسیطنَه کامیل بِه اَنجوم آرَبیَه، دِ چیرا نیاز بَه، مِلکیصِدِقی مرتبَکا ایلَه دییَرَ کاهینی با؟ اِمی خونه کن شریعَتِشون لاوی کهانتی دوورَکا قام یهودیشون دوعَه.

¹² اِمی خاطر کن اَگَم کهانتی خیدمت عوض آبو، لازِمه کن شریعتی قانونِن نی پی عوض آبون.

¹³ چون اَ کن اِم گفِنِشون چَی خونه واتیَه، ایلَه دییَرَ قامی شنَه، کن هیچ کِرَم اَ قامیکا هرگز قربونگا دلَکا خیدمتِش کردَ نییَه؛

¹⁴ چون دیارَ کن چَمَه خداوند، یهودا اودومیکا بَه و موسی اَ قامی خونه چیی ایی کهانتی خونه نِواتِش.

¹⁵ اِم اَ جِگاایکا دیار آرَبن کن وقتی ایلَه دییَرَ کاهین، هنته مِلکیصِدِقی شیوار با،

¹⁶ اَ نِه شریعتی حِکمی واتنَه، کن اِشتَن اودومی مربوطَه، بَسکم اَ، زندَگی زبقیکا کن نیفیت آنییَبن کاهین آرَب.

¹⁷ اِمی خونه کن کیتاو مزموریکا چَی خونه اِنتَرَ شاعیدیشون دوعَیه کن: «تِه زَیرونَه کاهینیشَه، مِلکیصِدِقی مرتَبَکا.»

¹⁸ اِمی خونه کن ایی طَرَفیکا قَدیمه حِکم، اِمی خاطر کن عِجِز بَه خونه کنارِشون نوعَه به،

¹⁹ اِمی خونه کن شریعَت هیچ چیی ایی ایش کامیل آنِکَردَ. ولی اَوَریکا چاکَه اومیدی اَمَش آمونِسته کن چَی واسیطنَه خدا کا نِزِک آبَم.

²⁰ واِم بی قَسَم نِبَه. چون اَیِنی کن چیمی بَه نَه کاهین بین، بی اِم کن قسم بَرِن کاهین آبینَه.

²¹ ولی اَ ایله کاهین آبِه، اَ قَسمینَه، اَ کَسی واسیطنه کن بَش واتَه: «خداوند قَسَمِش هردَیه و اِشتَن نَظَری عَوَض آنییَکرد: ” تِه زَیرونَه کاهینیشَه“.»

²² هِم، عیساش، ایلَه چاکترَ عهدی ضامین بَکَی.

²³ گذَشته کاهینون تیعداد بَرک وِر بَه، اِمی خونه کن مردِ نَرزییه اِشتَن خیدمتی ایدامه بدَرِن.

²⁴ ولی عیسی تا ابَد کاهینه، اِمی خونه کن تا ابد زندَیه،

²⁵ پس عیسی بَشایَه اَیِنی کن چَی واسیطَنه خداکا نِزِک آنَّب کامیلا نیجات بدَرِ، اِمی خونه کن اَ اوزون زندَیَه تا چَوون خونه شفاعت بکرِ.

²⁶ اِمی خونه کن حَییقتا اِم بَجا به کن اَمه انترَ یالَه کاهینی بدارَم، کن موقدَّس، بی گناخ، بی عَیب، گناخکارونکا تاکَه، و شکوه جلالِش گتَه ببو و آستامونون کا کفاتر ببو.

²⁷ اَ هنته دییَرَ یالَه کاهینون شیوار، ایحتیاجِش نییَه کن هر روج، اَولیکا اِشتَن گناخونرا و چَی به دوملَه قامی گناخونرا قربونی بدَ، چون اَ موقه کن بَشتَنِش قِربونی کردَ ایکَرَ اوزونیرا اِمی اَنجوم داشَه.

²⁸ اِمی خونه کن شریعت، آدَمون چَوون ضعفونَّه یالَه کاهین بِه را تَیین بَکَی، ولی اَ قسمی کلمه اِن کن شریعتی به دوملَه آمَه، اَ زوعَش تَیین کردَ، کن زَیرون کامیل آبَیه.