نامَه، عِبرانیه نَتاجَه مسیحیونرا 6 - کتاب مقدس به زبان تالشي - گویش مرکزی

¹ پس بِرَ مسیح اَولین دَرسونکا دَیوَرَم و بالغ بِه طَرفیرا نار بشَم. ولی نییَبن هنی هیمی ، توبَه کردِ و دَدارَ کارِن و خدا کا ایمان داشته،

² و غسل تعمیدون آموج دوعه ، بال آنوعِه، مردَاون زندَ آبِه و زَیرونَه دیوون کردِ، سَردِرِ بنرَم.

³ اَگَم خدا ایجازَ بدَرِ اِم کارون نی بَکمون.

⁴ چون اَیِنی کن ایی کرَ نورانی آبین، اَیِنی کن آستامونیَه خلا مزَ چَشتِشون و خدا موقدسَه روح دلَکا شَریک آبینه،

⁵ و خدا کلامی چاکی مزَ و آیندَ دوورَ زِبقون مزَ چَشتِشونَه،

⁶ و چَی به دوملَه اِشتَن ایمانیکا ویگنستین، هَنی نییَبن اَوون ازنوتوبه کردِ را وردِ، چیرا کن اَیِن هنی اِشتَن زِرَبَرا، خدا زوعَه مصلوب بَکَن و گردی وَریکا بَی بی حورمت بَکنه.

⁷ اَگَم ایله زمین، کلاکی کن چَی سَردِرِ بوارِستی اِشتَن دلَکا ببَرِ، و اَیِنیرا کن چَوون خونه کَشتو کار بیَه چاکه اَکین بدرِ، خدا کا برَکت بگَتیَه.

⁸ ولی اَگَم چِغ پِروَرِ، زمینییَه کن بی اَرزِشَه و نِزِکه لَنَت ببو، و آخیر بَسَر نی بَی بَسوتینَه.

⁹ اَ خاجَتیی اِن، هر چَنَه کن انترَ گَف بَژَم، ولی شمه خاطر موطمئنیمون کن چاکَترَ چییِنی کن نیجاتی شِنَه شمه نصیب بَبی .

¹⁰ اِمی خونه کن خدا بی اینصاف نییَه و شمه کار و موحبت کن شمه چَی نومی خاطر، موقدسَه آدَمون خیدمتیکا آمونِستَرون یاد بَرکَرِ، هته کن هنوزنی کاینه اَنجوم دوعه.

¹¹ چَمَه طَمارزو اِمه کن، هر کِرَم شمَکا تا بَه آخیر هه غَیرَتی آمونَه تا شمه اومید کامیل دیار آبو.

¹² تا تنبل آنِبَه، بَسکم شمه سرمشق اَیِنی ببون کن ایمانو صَبرینه وعدَ اون وارِث آنَّب.

خدا وعدَ اِن حَتمی اینه

¹³ اَموقه کن خدا اِبراهیمیش وعَدَ داشَه، اِمی خونه کن کَسی بَیکا یالتَر نبَه کن چَی سَردِرِ قسم برِ، پس اِشتَن سَر قَسم هردِش

¹⁴ و واتش: «موطمَئین بب کن بَتِه برَکت آمَدا و بَتِه ایضاف آمَکرد.»

¹⁵ و اِنتَرَ، صبرینَه مونتَظیر مندِ به دوملَه ابراهیم، وعدَش بَدَست وردَ.

¹⁶ چون آدَمِن اَ کَسی سَردِرِ قسم بَردین کن اَوونکا یالترَ، و چَوون گردی گَه بَه گّه دوعه دلَکا، قسمی هِستَه کن آخیربَسَر چَوون گفی ثابیت بَکَی.

¹⁷ پس، اَموقه کن خدا اَپیش بَه ویشتَر آمونِه کن چَی وعدَ، وارثونرا عوض آنییبِن، اَش قسمینه تضمین کردِش،

¹⁸ تا دِ گلَه چیی واسیطنَه کن عوض آنییَبن، و ایمکانِش نییَه خدا چَوون خونه دِروو بدَرِ، اَمه کن دَوریتِرا ویریتَه ایمون، تا اَ اومیدی کن چَمَه نَکارَ، آمبست غَم برَم.

¹⁹ ام اومید، چَمَه جانیرا هنته لنگَری شیوارَ کن محکم و مُطمئینَه، اومیدی کن اَوالَه پردَ اَوَریرا بَشی، اَ دَرونییَه جگاکارا، قودس الاقداسیرا.

²⁰ اَ جِگایی کن عیسی اَمَکا بَه نَه و چَمَه خونه دِلَه دشَه؛ و تا ابد یالَه کاهین آبَه، مِلکیصِدِقی مرتَبَکا.