نامَه، عِبرانیه نَتاجَه مسیحیونرا 5 - کتاب مقدس به زبان تالشي - گویش مرکزی

¹ چون هَر یاله کاهینی کن آدَمونکا اینتخاب آرَب، تَیین بَبی تا اَ کارِنی کن خدا مربوطَه، مردومی نیمایندَ آبو، تا گِناخون خونه، خَلا اِن و قربونیون خدارا تقدیم بکرِ.

² اَ بَشای اِشتَن رفتاری نافَمونرا و گومراهونرا نرم آکَرِ، اِمی خونه کن اَ اِشتَن نی ضعف بَداشتی.

³ اِمی خاطر، اَ پی اِشتَن گِناخونرا قربونی بدَرِ، هَتَه کن مردومیرا آرَدا.

⁴ و هیچ کِرَمی اِشتَن نییَشا اَ کاهینی ایفتخاری اِشتَن شِن آکَرِ، بَسکم اِم ایفتخار تاکه وقتی کن خدا بَی خِله بَکَی بَی آرَرَست. هَته کن هارونی آرستَه.

⁵ مسیح نی اِشتَن، بَشتَنِش کفا نِبردَ تا یاله کاهین آبو، بَسکم هَه کَسی واسیطنه تَیین آبَه کن بَی واتش: «ته چمن زوعَه ایشَه؛ اومروج، اَز بَتِه مولود آکَردِم.»

⁶ هَتَه کن اَ هنی دییَرَ جِگاکا باتی: «تِه زَیرونَه کاهینیشَه، مِلکیصِدِقی روتبَکا.»

⁷ اَ روجِنی کن عیسی جندَگی دلَکا بَه، اَیِنیرا کن اَشیایَه اَوون مرگیکا نیجات بدَرِ، برَمِستِه نَه و تَتَّه لَسَّنه و اَسِرگینَه، دِوا و خاشتو خاز کردِشه و چَی کامیلَه ایطاعَتی خونه، چَی دِوا قِبول بَه.

⁸ هر چَنَه کن زوعَه بَه، اَ عذابون کَشتِه خونه ایطاعَتی آموج گَتِش.

⁹ و اَموقه کن کامیل آبَه، گردِ اَیِنیرا کن بَیکا ایطاعت بَکنَه، زَیرونه نیجاتی سرچشمه آبَه.

¹⁰ و خدا طَرَفیکا تَیین کن یالَه کاهین آبو، مِلکیصِدِقی روتبَکا.

هشدار دوعِه، ایمانی کا آگَردِستِه خونه

¹¹ چیمی خونه، خَیلی چییون واتِرا دارِم، ولی چَوون واتِه سختَه، چیرا کن شمَه گوشِن سنگین آبَه اینَه.

¹² چون هر چَنَه کن شمَه تا ایسَه پی موعلیم آبَه بیرون، ولی موحتاجیرون کن ایی نفر خدا کلامی ایبتدا اییَه اصولی هنی بَشمَه آموج بدَ. شمه هنوزَنی شِتِرون بَپیست، نِه سَنگینَه غذا.

¹³ چون هر کَم کن شِت بَردی، صالح بِه کلامیکا بی تَجروبه یه، اِمی خونه کن چلَینه خِردَنه.

¹⁴ ولی سنگینَه غذا یالون شنَه، اَیِنی کن وِرَ تمرینینَه اِشتَن تشخیصی اینجاری اَنه تربیَتِشون کردیَه تا چاکی وبدی بشان تشخیص دوعِه.