نامَه، عِبرانیه نَتاجَه مسیحیونرا 3 - کتاب مقدس به زبان تالشي - گویش مرکزیعیسی، موسی کا سَرترَ 1 پس اَی موقدسَه برا اِن، اَی شمَه کن آستامونییَه صَلا کا شریکیرون، شمه چَم عیسی کا ببو کن رسول و یالَه کاهینَه، کن چَی سَردِرِ ایمان بداشتیمون و اییتراف بکَمون. 2 اَ کَسیرا کن بَش تَیین کردَیَه وفادار بَه، هَتَه کن موسی نی خدا کَکا، گيردیکا وفادار به. 3 اِمی خونه کن عیسی موسی کا ویشتر شکوه وجلالی لایق بَه، هته کن کَه سِی آرَکَری حورمت، اَ کَکا ویشتَرَ. 4 اِمی خاطر کن هر کَه ایی، ایی نفری بالینه سی آرَبن، ولی گردِ چییون سی آرَکر خدایَه. 5 ایسَه موسی خدا کَکا ایله پاسَری شیوار وفادار به، تا اَ چییِنی سَر کن پی دومله واته ببو شاهیدی بدرِ. 6 ولی مسیح، خدا کَرا هنته ایلَه زوعَه ایی شیوار وفادارَ. و چَی کَه، اَمه ایمون، اَگَم حَییقتا چَمَه ایطمینان و ایفتخاری، چَمَه اومیدی دلَکا آمبست غَم برم. 7 پس هَته کن خدا موقدسَه روح باتی: «اَگَم اومروج چَی سَسی دنَّرَست، 8 اِشتَن دِلون سِنگ آنِکرَ، هَتَه کن نافرمونی دوورَکا کَردِرون، وَرداوَردَ روجیکا، وَیاوونی دِلَه. 9 اَجِگاکا شمَه بابااِن بَمِنِشون وَرداوَرد کردَ، و چِل سال چمن کارِنِشون ویندَ بَه. 10 اِمی خاطر، اَ اودومیرا آسرَنگیمه و واتم: ”امِن اوزون اِشتَن دلیکا گومراهینه، و چمن راهون آنینَزنی؛” 11 پس اِشتَن غَضَّبیکا قسَمم هردَ، ایِن چمن آلاویسته دلَرا نینّام.» 12 اَی برا اِن، شمه هواس ببو نِکَرِ کن، شمه دلَکا کَسی آوشَرو بی ایمانه دل بدارِ کن بَشِمَه زندَ خداکا رَت آکَرِ. 13 بسکم هر روج، تا اَموقه کن بَی باتین ’اومروج‘، یَندِ اندَرز بکرَ، تا هیچ کم شمَکا گناخی حیله خونه، چَی دل سِنگ آنِبو. 14 اِمی خونه کن اَمه مسیح دلَکا شریک آبَه ایمون، اَگَم حَییقتا اَ ایطمینانی کن اَولیکا هِستمون بَه تا آخیر آمبَست غَم بَرم. 15 هَته کن کیتاو مَزموریکاشون واتَیَه کن: «اَگَم اومروج چَی سَسی دنَّرَست، شمه دلی سِنگ آنِکرَ، هَتَه کن نافرمونی دورَکارون کردَ.» 16 چون اَیِنی کن درَستِشون و هَنی نافرمونیشون کردَ، کییِن بین؟ مگَم اَیِن کَسِنی نِبینَه کن گِرد، موسی راهنَما اینَه مِصریکا برِن بَرمین؟ 17 و کییونرا چِل سال آسرَنگِستَه؟ مَگَم اَیِنی نبینَه کن گِناخِشون کردَ و چَوون مَییتِن وَیاوونی دلَکا ویگِنِستین؟ 18 و کییونرا قسَمِش هَردَ کن چَی آلاویستِه دلَرا نینَّام؟ مَگم اَیِنی خونه نبَه کن نافِرمونیشون کَردَ؟ 19 پس کامون ویندِ کن چَوون بی ایمانی خونِه بَه کن نِشاستشون دلَرا بان. |
@ 2024 Korpu Company