نامَه، عِبرانیه نَتاجَه مسیحیونرا 2 - کتاب مقدس به زبان تالشي - گویش مرکزی

نیجاتیکا غافل بِه خونه هوشدار دوعِه

¹ پس پی چَمه هواس ویشتَر اَ چیی ایی سَر ببو کن درستَمونه، نِکرِ بَیکا مونحریف ببَم.

² اِمی خونه کن اَگَم پیغومی کن فرشتَه اونَّه اییلام آبَه، ثابیت بَیه کن بَبی بی اطمینان کردِ، و هر تقصیر و نافِرمونی، جزایی کن چَی حقَّه، ویرَگِرییَه،

³ پس اَگَم اَمه انترَ یالَه نیجاتیکا غافل بِبَم، چِنترَ چَی جَزاکا بَروَزَم؟ اِم نیجات اَولیکا خداوندی واسیطنه اییلا آبه و چَی بَه دوملَه اَیِنی واسیطنه کن اَشون درَستَه چَمرا ثابیت بَه،

⁴ هَته کن خدا نی، موختلیفَه نشونَه اون و عَجیبَه موعجیزَاونَّه، و روح القدوسی عطا اونَّه، کن اِشتَن ایرادَ طِبق اَوون آرَدا، اَ نیجاتیرا شاهیدی داشَه.

⁵ اِمی خونه کن خدا، اَ دنیایی کن آ و اَمه اَیکا گَف بژَمون، فرشتَه اون فِرمون آنِکردِش.

⁶ کیتاو مزموری دِلَه، ایی جگا کا شاهیدیشون دوعَیه کن: «اینسان چِه چییَه کن تِه چَی فکریکا بَبی، یا اینسانی زوعَه، کن بَی اهمییَت بدَری؟

⁷ اَی، فرشتَه اونکا تَلَکَه ایی کَمتَر سِی آکَردِر و یال گیری تاجی و ایحترام چَی کلَّکا آنارَ.

⁸ گردِ چییِنِر چَی پا بنیکا چَی فِرمون آکَردِر.» ایسَه کن خدا گِردِ چیی اِنِش چَی فرمون آکردَ، هیچ چیی ایی نِناشَه کن چَی فرمون آمَبو. ایسَه هنوزَنی نِوینَم کن هَمه چیی چَی فِرمون ببون.

⁹ ولی اَمه اَی بَویندیمون کن تلکه زمانی فرشتَه اونکا گِچ تَر به، یعنی عیسی، کن مرگی عذابی خونه، شکوه و جلال و حورمتی تاج چَی کلَّکاشون نوعَه، تا خدا فیضی واسیطنه، مرگی مزَ گِردی خونه آچَشِه.

¹⁰ چون اِم درِست و بَجا به کن خدا، کن گردِ چیی اِنِش چَیرا و چَی واسیطنَه وجود بَداشتین، اِمی خاطر کن، خَیلی زوعَه اونکا بَه شکوه و جلال آرَسونِه، پی چَوون نیجات گتِه باعیثی، عذابی راه کا، کامیل آکرِ.

¹¹ چون اَ کن تقدیس بَکی و اَیِنی کن تقدیس ببین، گِردیرا ایلَه سرچشمه هِسته. اِمی خونه کن عیسی را عار نییَه اوون برا خِله بکرِ،

¹² هَتَه کن کیتاو مزمور باتی: «چمن برا اونرا اِشتِه نومی اییلام بَکَمَه؛ و جَماعتی دِلَکا، اِشتِه ستایشی بخندیمَه.»

¹³ و اِشعیای پَیغمبری کیتاویکا هنی باتی: «اَز چَی سَر توکل بَکمَه.» و هنی باتیَه: «بوین، اَز و خِردَنِنی کن خدا بَمنِش دوعَیه.»

¹⁴ پس اَ جِگا ایکا کن خردَنِن خونیکا و جندَکیکا شریکین، اَ اِشتَن نی اِم چییونکا شریک آبه، تا مرگی راکا، اَ کن مرگی زبقی بَداشتی یعنی ابلیسی نیفیت آکرِ.

¹⁵ و گردِ اَیِنی کن مرگی ترسیرا، گردِ اِشتَن عمریکا اسریشون کشتَیه، اَراخِمونِه.

¹⁶ اِمی خونه کن واقییَن اَ، فرشتَه اون کاریَری نییَدا، بسکم اَ، ابراهیم پیغمبری اودومی کاریَری دَرِ.

¹⁷ پس لازم بَه کن اَ هر چیی ایکا هنته اِشتَن برا اون شیوار آبو، تا ایلَه بخشندَ و وفادارَ یالَه کاهین خدا خیدمتیکا آبو، تا قامی گناخون بخشِستِرا کفّارَ بدرِ.

¹⁸ چون هَه اِشتَن ورداورد بِه موقه، عذابِش کَشتَه، بَشایَه اَیِنی کن ورداورد آنَّب، کاریَری بدَرِ.