نامَه، عِبرانیه نَتاجَه مسیحیونرا 12 - کتاب مقدس به زبان تالشي - گویش مرکزیعسیی چَمَه ایمانی ایدامه یَه و بَی کامیل آرکرد 1 پس اِمی خونه کن اِنتَرَ شاهیدِنی هنته برکَه یالَه خِری شیوار اَمَشون دوور کردیَه، بِرَ اَمه نی هر ایضافَه بار و هر گناخی کن چَمَه بالو لِنگی درَپِشکیست، بَشتنکا رَت آکَرم و موسقابَه ایکا کن چَمه نَکارَ، اَوریجَم. 2 و چَمه چَم تاکَه عیسی کا ببو کن چَمَه ایمانی هیمَه و چَمَه ایمانی کامیل آرَکَرد، و اَ خَشی خونه کن چَی نَکا به، صلیبی سَردِرِ تاوِش وردَ و چَی ذلیل بِه و گِچ گیرییش ندید گتَه، و خدا تخت پادیشایی راستَه وَریکا نِشتَه یَه. 3 چَی فکریکا بِبَه کن چنترَ گناخکارون عَدابَت کن چَی زِرَبَرا بَه کا تاوِش وردَ، تا شمَه مَویخِسَه و دلسرد آنِبَه. 4 شمَه هَنوزنی گناخی رودَکَر، ایی جوری مندَرون نییَه کن، شمَه خون ویبو. 5 مگَم اَ نصیحتی کن کیتاو اَمثال سِلِیمونیکا دَرِ یادِرون برکردَیه، کن بَشمَنه زوعَه اون شیوار گَف بَژَی و باتی: «بلَمه، خداوندی تربیتی گِچ بَحسیاب موَ، و چَی چَمای کردِکا مَویخِس. 6 چون خداوند اَینی کن رَی بَداشتیَه تربیت بَکَی، و هر کَمی کن اِشتَن زوعَه گیریرا قبول بَکَی، تِنبِه بکیَه.» 7 اِم تربیت کردِ خونه اَ کن شمَه پی تاو بوعَرَ. خدا بَشِمَنه هنته زوعَه اون شیوار رفتار بَکی. کِرَم گلَه زوعَه یه کن چَی دَدَ بَش تربیت کردَ مبو؟ 8 اَگَم شمَه تربیت آبَه نیرون، در حالی کن گرد بَیکا رَست دارَ، پس شمه حییقیَه زوعَه نیرون و حروم زادَ ایرون. 9 غَیراَز اِم، اَمه زمینیَه دَدَ اِنی داشتَمونه کن اَمَشون تربیَتَه کردَ، و اَمه اَوون ایحترام بکَمون. یعنی نِباید خیلی ویشتَر، چَمه روحون دَدَ فِرمون ببَم تا زندَگی بکرَم؟ 10 اِمی خونه کن اَیِن تلَکه زمانی، اِشتَن مصلَحتینَه اَمشون تربیَت کردَ. ولی خدا چَمَه خیَریرا اَمه تربیت بَکَی تا چَی قودوسیَتی دلَکا شریک آبَم. 11 چون اَموقه کن اَمه تربیت بَبیمون، خَشی عَوَض داجِمون بَگَتی، ولی چَی به دوملَه، اَیِنیرا کن چَی واسیطنَه تربیت بَه اینَه، صالح بِه اَکینی بوعَردین کن صلح و سلامتیکا پتلَمیه. 12 پس شمه ویگنستَه بالون راست آکرَ و بی زبقَه زنگون قودور آکرَ. 13 راهون شمَه لنگون را خوار آکرَ، تا شلَه لنگ یَرَ آنِبو، بَسکم شفا بیگِرِ. 14 بَرک تقلا بکرَ تا گردِ آدَمونَّه صلح و سلامتیکا بومونَه و موقدّس ببَه، اِمی خونه کن بی قودوسیت هیچ کس خداوندی نییَویند. 15 هواسِرون ببو کن هیچ کمی خدا فیضی ویگَتِکا دَمَبازِ، و هیچ تِلَه ریشَه ایی پِمَرا و دردَسَری باعیث آمَبو و خَیلیون جیفینین آنِکَرِ. 16 تا هیچ کَم هنته عیسو شیوار بی عیفت ناموقدَس آمَبو، اَ کن ایی قدرَ آشی خونه، اِشتَن اولین خردَن بِه حقی خرَتِش. 17 و هته کن بَموستیرون، چَی به دوملَه اَپیش بَه اَ برَکتی اِرث ببَرِ،و قِبول نِبَه. هر چَنَه برَمِستِنَه چَی دوملَه بَه، ولی توبَه کردِرا فِرصَتیش پَیدا نکَردَ. 18 چون کوهیرا آمَه نیرون کن ببو بَی دَست آسا کردِ، ایلَه کوهیی کن آرا نَه کولوستار آبَیه؛ نِه ظلَمات و تاریکی و غَزرینَه؛ 19 و نِه زرنا سَسینَه و ایلَه لَسَّنه کن چَوون اَدَرَس خاشتو خازِشون کردَ کن دِ اَوونَّه گَف مژَنِه. 20 اِمی خونه کن اَ فِرمونی تاوی نِدارینَه کن اَواجییَه: «حتی اَگَم ایلَه خَیوون اِشتَن بالی اِم کو بژَنه، پی سنگسار ببو.» 21 حَییقتا اِم صحنَه اَنه ترسناک بَه کن موسی واتش: «اَز ترسی خونه کا بَلَرزستیم.» 22 ولی شمَه صهیونی کورا، و زندَ خدا شهریرا، یعنی آستامونیَه اورشَلیمی دلَرا آمَه ایرون. شمَه هَزاران هَزار فرشتَه کن خَشی بکَنه دِلَه آمَه ایرون، 23 و اولین دِنیا آمَه خِردَنون مَجلِسیکا کن چَوون نومِنِشون آستامونیکا نوشتَیَه، و خدایی کن گردی داوَرَ و صالحون روحِن کن کامیل آبَه اینَه، 24 و عیسی کن ایلَه تازَ عَهدی واسیطه یَه، و اَ پِشندَ خونی، کن هابیلی خونیکا چاکترَ، کا گَف بَژَی. 25 هَواسِرون ببو، گَف اَژَنی سَسیرا پشت آنِکرَ. اَیِنی کن، زَمینی سَر گَف اَژَنی گَفیرا پِشت آکَردِشون، نِشتِشونَه موجازاتیکا بَروَشتِه. پس اَگَم اَمه اَ کَسیرا کن آستامنیکا گَف بَژَی پِشت آکَرَم، چنترَ موجوازاتیکا بروَزَم؟ 26 اَ زَمانیکا، چَی سَس زَمینی لَرزامونیشَه، ولی ایسَه اَ وعدَ دوعشَه کن «ایی کرَ دیییَر نه تاکَه زمین بَسکم آستامونی بَلَرزامونستیَه.» 27 اَ کلَمَه اِ «ایکرَ دییَر» منظور اِمَه کن، اَ چییِنی کن بلَرزِستین نیفیت آنَّب- یعنی اَ چییِنی کن خلَق بَه اینَه- تا اَ چییِنی کن نییَب اَوون لارزامونِستِه، بومونن. 28 پس بِرَ اَ پادیشایی کن نییَب اَی لارزامونِستِه بَدَست وردِ خونه، شکر بکرَم. و انترَکه ایلَه مقبوله پرستش، کن ایحترام و تَرسینَه دَرِ ببو خدا تقدیم بکرَم، 29 اِمی خونه کن چَمَه خدا «هنته اَسوجونَه آرایَه.» |
@ 2024 Korpu Company