نامَه، عِبرانیه نَتاجَه مسیحیونرا 11 - کتاب مقدس به زبان تالشي - گویش مرکزی

ایمان داشتِه نَه

¹ ایسَه ایمان داشتِه، چییونی سَر ایتماد کردِ یَه کن اَووونکا اومید دارَم و اَ چیی اِنیکا خاطیر جَم بِه یَه کن چَمینَه نییَب اَوون ویندِ.

² چون ایمان داشتِه خاطر بَه کن قَدیمَه آدَمون خونه چاکینَه تَریف و تمجیدِشون کردَ.

³ اَمه ایمان داشتِه نه سَر آگِنَم کن جهان خدا کَلامینَه خلق بَیه، اِنتَرَ کن، چَمینَه ویندَ چییِن، اَ چیی اِنیکا سَی آبینَه کن نییَب اَوون ویندِ.

⁴ ایمان داشتِه خونه بَه کن هابیل، قِربونیی ایی تقدیم کردشَه کن قائِنی قربونیکا ویشتَر قِبول بَه، کن چَی خونه و چَی خاطیر شاهیدیشون دوعَه بَه کن اَ صالِحَه. خدا چَی خَلا اون قِبول کردِنَه، چَی خونه چاکَه شاهیدی داشَه. و هر چَنَه اَ مَردَ، ایمان داشتِه خونه هنوزَنی گَف بَژَی.

⁵ ایمان داشتِه خونه بَه کن خَنوخِشون کفارا بَردَ تا مرگی نِوینِه، و دِ سورَقی بَیکا نِبَه اِمی خونه کن خدا بَی بردِش. چیرا کن بَی کفارا بردِ بَه نَه، چَی خونه شاهیدیشون دوعَه بَه کن خدا بَیکا راضیَه.

⁶ و بیدون ایمان داشتِه، نییَبِن خدا راضی دَروَردِ، چون هَر کَمی کن خداکا نِزِک آرَب، پی ایمان بدارِ کن اَ هِستَه و اَیِنی کن چَی دوملَه بَگَردِستین اِشتَن پاداشی وینَّگَت.

⁷ ایمان داشتِنَه بَه کن نوح، هَنگومی کن اَ چییونی خونه کن هنوزنی کَسی اَیِنِشون ویندَ نِبَه، خدا طَرَفیکا با خبر آبه، خدا ترسینَه اِشتَن کَه آدَمون نیجات دوعه خونه کشتی سِی آکَردش. و اِنترَکه دِنیاش مَحکوم کردَ و اَ صالح بِه ایی کن ایمان داشتِنَه بَدَست بومَیَه، وارِث آبَه.

⁸ ایمان داشتِه خونه بَه کن وقتی ابراهیمیشون صَلا ژَ، ایطاعَت کردِشَه و رَونَه آبَه، اَ جِگایی را شَه کن پی اِرث اَبَرییَه؛ هر چَنَه نَزنیَه کن کِرَم جِگارا کا شِه، رونَه آبَه.

⁹ ایمان داشتِه خونه بَه کن اَ شَه تا وَعدَ آدوعَه ولَتیکا زندَگی بکرَ، و ایسحاق و یعقوبینَه کن بَینَه وعدَکا وارث بین ایلَه خَلکی شیوار اَوالَه اون دلَکا زندَگی کردِش.

¹⁰ اِمی خونه کن اَ هیم دارَ شهریرا چَم بَرا بَه، کن چَی اِستا و اَساز خدا اَ.

¹¹ ایمان داشتِه خونه بَه کن سارا با اِمکن چَی سن دیَوردَ بَه خامیلَه پِرمِه را زبق گتِش؛ اِمی خونه کن اَ بَموستی، وعدَ اَدَر وفادارَ.

¹² و هنترَکه، ایلَه مِردیکا، اَ نی اَییکا کن هنته ایلَه مَردَ ایی شیوار بَه اودومِنی کن آستامونی اِسترَ اون اندازَ، و دَیرا بی حد و حیسابی فوشی قَدَر، بوجود آمَه.

¹³ اِمِن گرد ایمان داشتِه دلَکا مَردین، بی اِمکن وعدَاِنِشون ویگَته ببو، ولی اَیِن دوریکا ویندَشون بَه و اَیِنشون سلام کردَ. و قِبولِشون کردَ کن زَمینی سَردِرِ، خَلکین.

¹⁴ چون اَیِنی کن اِنتَرَ گَف بَژَن، آمونِنن کن اِشتَنرا ایلَه وطَنی دوملَه بَگردِستین.

¹⁵ اَگَم اَیِن قَبلَنه ولَت کن اَیکا برِن برمَه بینَه فکریکا بین، اَ جِگارا ویگردِستِه فرصَتی دارینَه.

¹⁶ ولی انترَ کن کام ویندِ، اَیِن چاکترَ ولَتی دوملَه بین، یعنی ایلَه آستامونیَه ولَت. اِمی خاطر، خدارا عار نییَه کن چَوون خدا خِلِه ببو، اِمی خونه کن اَوونرا ایلَه شهر حاضیر آکردش.

¹⁷ ایمان داشتِه خونه بَه کن ابراهیم وَرداورد بِه موقه کا، ایسحاقِش ایلَه قربونی شیوار تقدیم کردَ؛ و اَ کن وعدَاِنِش ویگتَه بَه، قِبول کردِشه کن اِشتَن تاکَه زوعَه قِربونی بکرِ،

¹⁸ هَه کن بَشون واتَه بَه: «اِشتِه اودوم ایسحاقیکا خِله بَبیَه.»

¹⁹ ابراهیم انترَ فکر اَکَریَه کن خدا قادِرَ حتی ایسحاقی مردَاون دلَکا زندَ آکَرِ و بَبی واتِه کن اِنتَرَ، ابراهیم ایسحاقی مرگیکاش پس ویَگَتَه.

²⁰ ایمان داشتِه نَه به کن ایسحاق، یعقوب و عیسو آیندَ چییِنِش برَکت دوعَه.

²¹ ایمان داشتِه نَه بَه وقتی کن یعقوب کا اَمِرییَه، یوسوفی دِ زوعَش برکت داشَه. و هَتَه کن اِشتَن چَلیکیکا تِم آدوعَش بَه، سَجدَش کردَ و پرستِش کردِشه.

²² ایمان داشتِه نَه به وقتی کن یوسوف کا اَمِرییَه، قام بنی ایسرائیلی برِن برشِه، مصریکا خبر داشَه و اِشتَن اَستَه اون خونه وصیَت کردِش.

²³ ایمان داشتِه خونه بَه کن وقتی موسی دِنیا آمَه، چَی دَدَ نَنَه اَشون سه ماه نون آکردَ، اِمی خونه کن ویندَشون بَه اَ خاصَه خِردَنیَه و پادیشا حِکمیکا نِتَرسینه.

²⁴ ایمان داشته خونه به کن وقتی موسی یال آبه، نَپیش بَه بَی فرعونی کلَه، زوعَه خِلِه بکَن.

²⁵ اَ حاضیر بَه خدا قامینَه ذلیل آبو، تا امکن تلَکه زمانی گناخی خَشیونکا کیف بکرِ.

²⁶ و اَ، مسیح خونه چَمای بِه، مِصری گنجونکا یالتر اَزنیَه، اِمی خونه کن اَ، اَ پاداشی دوملَه بَه.

²⁷ ایمان داشته خونه بَه کن موسی پادیشا غَضَّبیکا نِترسَه و مِصریکا بِرِن برمَه، اَ تاوِش وردَ اِمی خونه کن اَ، اَ کن نییَب بَی ویندِ، ویندِشَه.

²⁸ ایمان داشتِه خونه بَه کن موسی، پِسَخه عید و خون پِشَندِش بَجا وردَ تا اَ فرشتَه ایی کن اولین خردنون نیفلَه اَکَریَه، اِشتَن بالی قام ایسرائیلی اولین خردَنون سَردِرِ دراز آنِکرِ.

²⁹ ایمان داشتِه خونه بَه کن قام ایسرائیل سِرَ دَیرا وصَطیکا هنته خشکَه زَمینی شیوار دَیوردین؛ ولی وقتی مِصری آدَمِن تقلا کردشِون هه کاری بکَن، غرق آبین.

³⁰ ایمان داشته خونه به کن شهر اَریحا حیصارِن، اَموقه کن قام ایسرائیل هَف روج چَی دوور گردِستَه، چَی به دومله ویریستَه.

³¹ ایمان داشته خونه به کن راحاب فاحیشَه، اَیِنینَه کن نافِرونی کردَشون بَه نَه، نِمردَ، اِمی خونه کن اَ جاسوسونکا گرمَه ایستقبال کردشَه.

³² دِ چه بواجم؟ اِمی خونه کن دِ فرصَت نییَه جِدعون و باراق و شَمشون و یَفتاح و داوود و سموئیل و پَیغَمبَرون خونه گف بژَنم،

³³ کن ایمان داشتِه خونه وِلَتِنِشون فتح کردَ، عیدالتی برقرار کردِشون، و وَعدَ اِنِشون بَدَست وردَ؛ شیرون گَوی آبَستِشون،

³⁴ اَسوجونَه آراشون ویکِشتَه، شمشیری دَمیکا رَخینَه؛ چَوون عجِز گیرییِن زبق آبین، جنگیکا قودور آبینه و خلکی لَشکَریون پِپاتِشون.

³⁵ ژِنن اِشتَن مَردَ اِنِشون زندَ ویندِشون. بعضییِن عَذابِشون کَشته و رخِستِشون قبول نکردَ، تا هنی ایلَه چاکترَ زندَگیکا زندَ آبون.

³⁶ بعضییِن بوکَه خوروستِه بینَه و لِسِشون هردَ، و حتی زِنجِلینَه اَیِنشون آبستَه، و زیندان دگنِستین.

³⁷ سِنگسار آبینَه، اَرَ نَه اَیِنشون دِ پارَ کردَ و شمشیرینَشون کِشتَه. پَسو و تَکَه، پوستشون دکَردَ، دَس دَریس آبین و موصیبَتِشون کشتَه و ذَلیل و آوارَ آبین.

³⁸ اِمن کن دِنیا چَوون لَیاقتی نِداری، وَیاوونِن و کومونکا، و غارِن و زَمینی شیکافونکا، آوارَ آبینَه.

³⁹ اِمن گِرد با اِمکن چَوون ایمان داشتِه خاطر بَه کن چَوون خونه چاَکه شاهیدی دوعَشون بَه، وعدَشون بَدَست نِوردَ.

⁴⁰ اِمی خونه کن خدا ایلَه چاکَه ترَ چیی ایی، چَمرا حاضیر آکَردش بَه، تا بی چَمَه اَیِن کامیل آنِبون.