نامه غلاطیَه کلیسارا 6 - کتاب مقدس به زبان تالشي - گویش مرکزی

یَندِ باری دوشی سَر مدارِکنَه

¹ اَی برا اِن اَگَم کَسی خَطایی بَکرِ، شِمَه کن خدا روح شمَکارَ، پی، بی مُلامِیَتینه راستَه راه را ویگاردِنَه. اِشتَنکا هواسِر ببو، کن ته نی وَسوَسَه دَنِه گِنی.

² یَندِ بارون دوش آگِرَ کن اِنتَرَکِه مَسیح شَریعَتی اَنجوم بَدارون.

³ اِمی خونه کن اَگَم کَسی بَشتن یالَه شَخصی بِزنِه، ایسَه اِم کن واقیعَا کَسی مَبو، بَشتَن گول بَژَی.

⁴ ولی هَر کَم پی اِشتَن کاری وَرداوَرد بکَرِ. اَ تَرَکِه اشتِن ایفتخاری دلیل، چَی شنِه نِه چَی خَمسوعَه شِن.

⁵ اِمی خونِه کن هَر کَس اِشتَن باری بَبَردیَه.

⁶ هَه کَسی کن خدا کَلامیکا آموج بَگَتی، پی اِشتَن، اَ کن بَی آموج دَرِ، هَر چاکَه چیی ایکا شریک بکَرِ.

⁷ گول مَرَ: خدا نیَب دَس پَر گَتِه. اِمی خونه کن اینسان هَر چیی ایی بِکَشِه، هَی بَدورنِستی.

⁸ چون هر کَمی کن اِشتَن جندَکیرا بَکَشتی، جندَکیرا فیساد بَدورنِستی؛ ولی کَسی کن خدا روح را بَکَشتی، روح کا زَیرونَه زندَگی بَدورنِستیَه.

⁹ پس چاکَه کاریکا ویمَخِسَم، اِمی خونِه کن اَگَم کاریکا دَست مَپِگِرَم، موناسیبَه فصلیکا بَدورنِستیمونَه.

¹⁰ پس تا فرصت دارَم گِردِ آدَمونرا چاکی بِکَرَم، بَخِصوص اَیِنیرا کن مسیح سَر ایمان بَداشتینَه.

آخِرین هوشدارِن

¹¹ بِوینه اَز اِشتَن بالینَه چِه یالَه حِروفینَه شِمَرا بَنِوِشتیم!

¹² اَیِنی کن اَپیشونَه بَشتَن چاک آمونِن، بَشِمَه دیم پِنَرِن کن سِنت بِبَه، تاکَه اِمی خونه کن مَسیح صَلیبی خونِه عذاب مَوینن.

¹³ چون حتی اَیِن کن سِنَت بَبین شَریعَتی اَنجوم نینَّدا، بَلکَم اَپیشونَه شِمَه سِنَت بِبَه تا شِمَه جَندَکی سَر ایفتخار بِکَن.

¹⁴ مبو کن هَرگز اَز چیی ایی غَیراَز چَمَه خداوند عیسی مَسیح صلیبی خونه ایفتخار بِکم، کن چَی خونِه، دِنیا مِرا مصلوب آبَه و اَز دِنیارا.

¹⁵ اِمی خونه کن نه سِنَت بِه چیی ایی هِسته، نِه سِنت آنِبِه؛ اَ چیی کن مُهیمَّه تازَ خیلقَتَه.

¹⁶ گِردِ اَیِنی کن اِم قانونینه رفتار بَکَن، صلح و سَلامتی و رَحمَت چَوونرا و اسرائیلی خدارا بیو.

¹⁷ چیمی بَه دوملَه کَسی بَمن عَذاب نِدَرِ، اِمی خونِه کن اَز اِشتَن جَندَکی سَریکا داغِنی بَداشتیمه کن آمونِه اَز عیسی وَزییَریمه.

¹⁸ برا اِن، چَمه خداوند عیسی مسیح فِیض شِمَه روح نَه دَرِبِبو! آمین!