نامه غلاطیَه کلیسارا 4 - کتاب مقدس به زبان تالشي - گویش مرکزیزوعَه اِن و وارِثِن 1 چمن گَف اِمَه: تا زمانی کن واریث گِچَه، وَزییَرینَه فرقی نِکَرِ، هَر چَنَه گِردِ چییون صاحیب ببو. 2 و تا زمانی کن چَی دَدَ تَیین کردشَه، اِشتَن غَیِّمِن و وَکیلون و وصیون بالی بِنیکارَ. 3 چَمَه خونِه نی هِنتَرَکِه یَه: تا زمانی کن اَمه گِچ بیمون، اِم دِنیا قانونون وَزییَر بیمون. 4 اَمّا اَ تَیین بَه وقت، کامیل آرستَه، خدا اِشتَن زوعَه رَونَه آکردِشَه کن ایلَه ژِنیکا دِنیا آمه و شَریعَتی بنیکا دِنیا آمَه، 5 تا اَیِنی کن شَریعَتی بنیکا بینَه بِراخمونه، و اِنتَرَکِه اَمه زوعَه اون مَقامیکا، اَگیَه زوعَه بِه حَق چَمَه نصیب ببو. 6 پس وَقتی کن شمه خِردَنِنیرون، خدا اِشتَن زوعَه روح، چَمَه دِلون دلَکا آناشَه کن سَس آرَدا «اَبّا، دَدَ.» 7 پس تِه دِ وَزییَر نیشَه، بَسکَم زوعَه ایشَه؛ و اَگَم زوعَه ایشَه، خدا بَتِه واریث آکَردَشَه. پولوسی تفشیش غَلاطیونیرا 8 چیمی بَه نَ، وقتی کن خدا نِه آزنیرون، چییونیرا وزییَر بیرون کن حَییقتَن خدا اِن نینَّه. 9 اَمّا ایسَه کن خدا آزنَه یا بِیتَر بِواجِم، خدا بَشِمَه آرَزنِست، چِنتَه یَه کن اِم دِنیا، سِست و بی اَرزِشَه قانونون طَرَف هَنی آگَردَ؟ یعنی بَپیرون هَنی چَوون وَزییَر آبَه؟ 10 روجِن و ماهِن و فَصلِن و سالیاری غَم بَردیرون! 11 بَتَرسِستیم نِکَرِ سَختییِنی کن شِمَرا کَشتِمَه هیچ بَرشَه ببو. 12 اَی برا اِن، شِمَکا خاشتو خاز بَکَم کن هِنتَه چمن شیوار بِبَه، اِمی خونِه کن اَز نی شِمَه شیوار آبَه ایمَه. چمن حَقیکا هیچ بَدیی کَردَرون نی. 13 هَتَه کن بَموستیرون چمن اِم آزاری خونه کن چمن تَنیکا بَه، اِنجیلی پَیغَومی اَول شِمَرا موعیظَه کردِم. 14 وهَر چَنَه چمن وَضع و اوضا شِمَرا ایلَه وَرداوَرد بَه، بَمن گِچ آنِکَردِرون. بَلکَم بَمن هنته خدا فرشتَه شیوارقبول کردِرون و اینگار کن مسیح عیسا رون قِبول کَردیَه. 15 پس کِرَم جِگا کارَ شِمَه اَ خَشی؟ چون کن بَشامَه شاهیدی بِدَرم کن اَگَم اَشارون، حتی اِشتَن چَمون بِرِن اَوَریرون و بَمن اَدَریرون. 16 پس ایسَه اِمی خونِه کن حَییقَتی شِمَرا باتیم شِمَه غَنیم آبَه ایمَه؟ 17 اَیِن شِمَرا غَیرَت بَداشتین، اَمّا نِه چاکَه نِیَّتینَه. اَیِن اَپیشونَه بَشِمَه تاک آکَن تا چَوونرا غَیرَت بِدارَ. 18 غَیرَت داشتِه چاکَه، اِم شَرطینَه کن چاکَه نِیَّتینَه ببو و اوزون ببو، نِه تاکَه زَمانیکا کن اَز بَشِمَنَه دَرِ ایمَه. 19 چمن خاجَتیَه بلَه اِن، کن شِمَرا هَنی زَندِ داجی دارِم، تا اَموقه مَسیح شِمَه دِلَکا شکل بیگِرِ، 20 کاش کن هِم ایسَه شِمَه وَر بیمَه تا دییرَ مودیلی شمنَه گَف بِژَنِم، اِمی خونِه کن بَشِمَکا حَیرونیم. هاجر و سارا 21 شِمَه کن اَپیرونَه شریعتی بِن بِبَه، بَمن بِواجَه، مَگَم اَ چیی ایی کن شَریعَت باتی گوش نینَّدا؟ 22 چون کیتاو توراتیکا نِوِشتَه آبَه یَه کن ابراهیم دِ زوعَه داری، ایلَه کِرِچیکا و اَیلَه آزادَ ژِنیکا. 23 ولی کِرِچی زوعَه طبق جندک دِنیا آمَه؛ اَمّا آزادَ ژِنی زوعَه طبق وعدَ دِنیا آمَه. 24 اِمی بَبی هنته نَقلی شیوار واتِه: اِم دِ ژِن، دِ گِلَه عَهدین. ایلَه سینا کوکا، کن خِردَنِنی وَزییَر گیری را بَزَندی: اَ هاجَرَ. 25 ایسَه هاجَر کوه سینا شیوارَ، عَرَبون دیاریکا، و شَهر اورشَلیمینَه کن ایسَه هِستَه برابری بَکَی، اِمی خونِه کن اِشتَن خِردَنونَّه وَزییر گیری کا اَ. 26 اَمّا کَفاعَه اورشَلیم آزادَ، کن چَمَه گِردی نَنَه یَه. 27 چیرا کن اِشعَیای پَیغمبَری کیتاویکا نِوِشتَه آبَه یَه: «اَی نازا کن زَندَر نی، خَسمند بب! اَی کن زَندِ داجی کَشتَر نی، خَشیَه لَسَّه بِژَن و جِکَّلَه آدَ! اِمی خونِه کن بی کَسَه ژِنی خِردَنِن شو دارَ ژِنی خِردَنونکا وِرتَر بَبینَه.» 28 اَمّا شِمَه اَی برا اِن، اِسحاقی شیوار، وَعَدَ خِردَنِنیرون. 29 ولی اَ زَمانیکا، زوعَه ایی کن طبق جندک دِنیا آمَه بَه، اَ کن طبق روح دِنیا آمَه آبَه، اَیذَت و آزار اَکَریَه. ایسَه نی هِنتَه یَه. 30 اَمّا تورات چه باتی؟ «کِرِچی و چَی زوعَه بِرِن بَرکه، اِمی خونِه کن کِرِچی زوعَه، هنته آزادَ ژِنی زوعَه شیوار میراث نیَبَردِن.» 31 پس برا اِن، اَمه کِرِچی زوعَه نیمون، بَلکَم آزادَ ژِنی کامون. |
@ 2024 Korpu Company