نامه غلاطیَه کلیسارا 3 - کتاب مقدس به زبان تالشي - گویش مرکزیایمان داشتِه نَه صالح بِه 1 اَی نافَمَه غَلاطییِن، کی بَشِمَه جاودو کَردَیَه؟ عیسی مسیح مردِ اَنَه شِمَراشون آشکار واتَه بَه، کن اینگار اَ شِمَه چَمون نَکا مصلوب بَه. 2 تاکَه اَپیمَه اِمی شمَکا بزنِم: مگَم خدا روح، شریعَتی اعمالی اَنجوم دوعِه نَه ویگَتِرون، یا اَ چیی ایی کن دَرَستِرون سَر، ایمان داشتِه نَه؟ 3 یعنی اَنَه نافَمیرون؟ شمَه کن روح نَه شِروو کَردِرون و ایسَه بَپیرون جندَکینَه کامیل آبَه؟ 4 مگَم گِردِ اِم سختیون دَدارِ رون تحمل کردَ؟ مَگَم اِم کن واقییَن دَدار زَمَتِرون کَشته! 5 اَ کن خدا روح بَشِمَه آرَدا و شمَه دلَکا موعجیزَاون بَکَی، اِم کاری شریعتی اَعمالینه بَکَی یا اَ چیی ایی سَر کن دَرَستَرون، ایمان داشتِه نَه؟ 6 هَتَه کن ابراهیم پَیغمبر: «بَه خدا ایمانِش وردَ و اِم چَیرا صالح بِه بَحیساب آمَه.» 7 پس بَویندیرون کَسِنی ابراهیمی خِردَنینَه کن ایمان بَداشتین. 8 و موقدسَه نوشتَه نارتَر ویندِشَه کن خدا، غَیرِ یهودیون ایمان داشتِه خونه صالح بَحیساب بوعردیَه، اِمی خاطِر، نارتَر ابراهیمی خشَه خبَرِش اییلام کردَ و واتِش: «گِردِ قامِن اِشتِه خونِه بَرَکت بَویندینَه.» 9 پس اَیِن کن ایمانیکا تِم بَژَن، ابراهیمی نَه، اَ مِردِ ایمان، بَرَکت بَویندینَه. 10 چون اَیِنی کن بَپیشون شَریعَتی کارون اَنجوم بدَرِن، گِرد لَعنَتی بِنیکاین، چیرا کن کیتاو توراتیکا نِوِشتَه آبَه یَه: «لَنَت ببو هَر کی کن گِردِ چییِنی کن کیتاو و شَریعَتیکا نِوِشتَه یَه آمبَست مبو و اَنجوم نِدَرِ.» 11 ایسَه معلومه کن هیچ کَس شَریعَتی واسیطنه خدا وَر صالح بَحیساب نا، چون «صالح ایمانینَه زندَگی بَکَیه.» 12 ولی شَریعَت ایمانی سَر نیه، بَلکَم «کَسی کن اِمون اَنجوم بدَرِ، چَوون دِلَه زندَگی بَکی.» 13 مسیح چَمَه جِگا لنَت بَه و اِنتَرَکِه اَمَش شَریعَتی لَعنَتیکا راخنیشَه، چون توراتیکا نِوِشتَه آبَه یَه کن:«هَر کمی کن دارِشون ژَ ببو مَلعونَه.» 14 اَ اِنتَه کَردِشَه تا ابراهیمی بَرَکت، مَسیح عیسا دِلَکا غَیرِ یهودیون نَصیب ببو، و تا اَمه اَ روح کن وَعدَ آدوعَشون بَه، ایمانی راه نَه بیگِرَم. شریعت و خدا وعدَ 15 بِرااِن، بَرزَ روزانَه زِندَگیکا میثالی بوعَم. هیچ کَس نیَشا اینسانیَه عهدی کن رَسمی کَردَش ببو، باطل بکَرِ یا چیی ایی بَی ایضاف آکَرِ. 16 ایسَه، ابراهیم و چَی اودومی وَعدَ اون آداشون. نیَه وات «اودومونرا» اینگار کن خَیلیون خونه اَ، بَسکَم باتی «اِشتِه اودوم» کن چَی منظور مسیحَه. 17 چمن گَف اِمَه: شَریعَتی کن چار صَدو سی سال بَه دوملَه آمَه، عَهدی کن خدا نار تَر دَبَستَش بَه باطل نَکَری، ایی جوری کن وعدَ هیچ بَرشو. 18 چون اَگَم میراث شَریعَتی سَر ببو، دِ وَعدَ سَر نیَه؛ اَمّا خدا اَی وَعدَ راه نَه ابراهیمیش آدوعَه. 19 پس شَریعَتی منظور چِه بَه؟ شَریعَت تقصیرون خونِه ایضاف آبَه، اَ نی تاکَه تا زَمانی کن اَ «اودوم» کن اَ وَعَدَ بَی ایشا اَکَریَه، با. شَریعَت فرشتَه اون واسیطَنَه و ایلَه واسیطَه گَری بالینَه برقرار آبَه. 20 ایسَه، هیچ واسیطَه گری، تاکَه ایی طَرَفی نِمایَندَ نیَه، ولی خدا ایلَه یَه. 21 پس یعنی شَریعَت خدا وَعدَ اون زِرَبَرایَه؟ اَصلا! چون اَگَم شَریعَتی آدوعِه آبَه بَه کن اَشایَه زندَگی بِبَخشِه، پس صالح بِه نی شَریعَتی راه نَه بَدست آی. 22 ولی موقدسَه نوشتَه اِن اییلاموِشون کردیَه کن گِرد گِناخی دلَکا ویلاخیستَه این، تا اَ وَعدَ کن عیسی مَسیح سَر ایمان داشته راه نَه یَه، اَیِنی آدوعِه ببو کن ایمانِشون وَردیَه. 23 اَمه ایمانی آمِه بَه نَ، شَریعیتی تسلطی بنیکا اسیر بیمون و و تا ایمانی اَیر آبِه موقه زیندایکا بیمون. 24 پس شَریعَت تا زمانی کن مَسیح با چَمَه سرپرست بَه و ایمانی خونه صالِح بَحیساب آمیمون. 25 اَمّا ایسَه کن ایمان آمَه یَه، دِ اَ سرپرستی بالی بنیکا نیمون. 26 اِمی خونه کن مسیحْ عیسی دِلَکا، شِمَه گِرد ایمانی خونِه، خدا زوعَه اِن هِستیرون. 27 چیرا کن شِمَه گِرد کن مَسیح دِلَکا تَعمید گَتِرون، مَسیح اِشتَن تَنیکا دَکَردِرون. 28 دِ نِه یَهودی مَعنی دارِ نِه یونانی، نِه وَزیَر نِه آزاد، نِه مِرد نِه ژِن، اِمی خونِه کن شِمَه گِرد مَسیح عیسی دِلَکا ایلَه اییرون. 29 و اَگَم شِمَه مَسیح شِنیرون، پس ابراهیم پیغمبَری اودومیرون و وَعدَ واتَنَه، واریثِن نی هِستیرون. |
@ 2024 Korpu Company