نامه غلاطیَه کلیسارا 2 - کتاب مقدس به زبان تالشي - گویش مرکزی

اورشلیمی شورا

¹ چاردَ سالی بَه دوملَه، ایکَرَ دییَر برنابا نَه اور شَلیمیرا شیمون و تیتوسی نی اِشتَنَه بَردِمَه.

² چمن شِه، ایلَه مُکاشِفَه ایی خونِه بَه. و اِنجیلی کن غَیر یَهودیون دِلَکا موعیظَه اَکَریمه چَوونرا واتِم؛ اَلبَت نونَکِه، و تاکَه اَیِنیرا واتِمه کن اَزنیمه با نفوذین، اِمی خونه کن تَفشیش بیم نِکَرِ دَدار کام ویریتِه.

³ ولی حتی تیتوس نی کن بَمنَه دَرِ بَه، با اِمکن یونانی بَه، اَشون مجبور نکردَ کن سِنَت ببو.

⁴ اِم تفشیش اَ دِروعَه برا اون خونه بَه کن نونَکِه مَنظورینه چَمَه دِلَکا نِفوذ کَردِشون تا اَ آزادی ایی کن مَسیح دِلَکا دارَم جاسوسی بِکَرِن و اَمه وَزییَر گیری را بِبَن.

⁵ ولی اَمه ایی لَحظَه نی چَوون تَسلیم آنِبیمون تا اِنجیلی حَقیقَت شِمَرا تمام و کمال حفظ ببو.

⁶ ولی اَیِنی کن بَه نَظَر با نفوذ آین، هَر کی ایی بینَه مِرا فرقی نِکَرِ، چون خدا دَدار کَسی طَرَفی نِگِرِ، ها، اَیِن چیی ایی بَمن ایضاف آنِکَردِشون-

⁷ بَسکَم بَر عَسکیرا، اَیِن سَر آگِنینَه کن غَیرِ یَهودیونرا اِنجیلی خشَه خبَری اییلام کردِ چمن دَست دوعَشونه، هَتَه کن اِنجیلی خشَه خبَری اییلام کردِ یهودیونکا پِطروسی دَست دوعَشونَه.

⁸ چون اَ کن پطروسی واسیطنَه کارِش کردَ تا یهودییون رسول ببو، بَمنکا نی کارِش کردَ تا غَیر یَهودیون رسول ببوم.

⁹ پس یعقوب و کِیفا و یوحنا کلیسا سِتون بَه نَظَر آین، و اَ فیضی کن چمن نَصیب آبَه بَه ویندِشون، و بَمن و بَرنابا نَه دَست رَفاقَت آداشون تا اَمه غَیرِ یهودیون وَر بِشَم و اَیِن یَهودیون وَر.

¹⁰ اَیِن تاکَه اَپیشون بَه کن گیدَلیون یادیکا غَم بَرم، هه کاری کن اَز چَی اَنجوم دوعِه را خَش بیمَه.

پولوس پِطروسی رودَکَر

¹¹ اَمّا وَقتی کیفا اَنطاکیه را آمَه، چَی رودَکَر پِبیم، اِمی خونه کن چَی حَق به.

¹² چون نار تَر از اِمکن کَسِنی یعقوبی وَریکا بان، غَیر یَهودیونَّه هَم سِفرَ آرَبیَه، اَمّا هِنتَه کن اَیِن آمین، اِشتَن پا دَراکِنیشَه و اِشتَنِش تاک آکَردِش، چیرا کن یَهودیونکا اَتَرسیَه.

¹³ دیَرَ یَهودییِن نی اِم دِ سَرَ کَرچَنگ گیریکا بَینَه بین، اَدَ کن حتی برنابا نی چَوون اِم دِ سَرَ کَرچَنک گیری خونِه گمراه آبَه.

¹⁴ اَمّا اَز وَقتی ویندِم اَیِن اِنجیلی حَقیقَتی راستیکا گَل نینَّژ، گِردی وَریکا کِیفا واتِم: «اَگَم تِه، با اِمکن یَهودی ایشَه، هِنتَه غَیرِ یَهودیون شیوار زندَگی بَکَش نِه یهودیون شیوار، چِنتَه یَه کن غَیرِ یهودیون دیم پِشَنا کن یَهودیون شیوار رفتار بِکَن؟»

¹⁵ اَمه یهودی‌ زاده‌ایمون و «غیریهودیه گناخکار نیمون»،

¹⁶ اَمه بَموستیمون کن اینسان شَریعَتی اَعمالینَه صالِح بَحیساب نا، بَسکَم عیسی مَسیح ایمانینَه صالح بَحیساب آ. پس اَمه اِشتَن نی مَسیح عیسی سَر ایمان وَردِمون تا مَسیح سَر ایمان داشتِه نَه صالح بَحیساب بِرَم، نِه شَریعَتی اَعمالینَه، اِمی خونِه کن هیچ اینسانی شَریعتی اَعمالینَه صالح بَحیساب نا.

¹⁷ ولی اَگَم مَسیح کا صالح بَحیساب آمه دوملَه ایمون، معلوم ببو کن گناخکاریمون، یعنی مَسیح گناخی وَزییَرَ؟ اصلا!

¹⁸ چون اَگَم اَ چیی ایی کن اِشتَن ویراونییَمَه هَنی سِی آکَرِم، آمونِم کن خطاکاریمه.

¹⁹ اِمی خونه کن اَز شَریعَتی واسیطنَه، نسبت بَه شَریعَت مَردیم تا نسبت بَه خدا زندَگی بِکَم.

²⁰ اَز مَسیح نَه صَلیبی سَر مَصلوب آبیم، واِم دِ اَز نیمَه کن زندَگی بَکَی؛ بَلکَم مَسیحَه کن چمن دِلَکا زندَگی بَکَی؛ و اِم زَندَگیی کن ایسَه جَندَکیکا دارِم، خدا زوعَه سَر ایمان وَردِ خونِه یَه کن بَمن رَی داری و اِشتَن جانی مرا آداشَه.

²¹ اَز خدا فِیضی هیچ آنیمَکرد، اِمی خونِه کن اَگَم شریعَتی راه نَه صالِح بِه بَدَست آی، پس مسیح دَدار مَردَ.