نامه غلاطیَه کلیسارا 1 - کتاب مقدس به زبان تالشي - گویش مرکزی1 پولوسی طَرَفیکا، رسولی کن چَی رَسالَت اینسانون طَرَفیکا و اینسانی واسیطَنَه نِبَه، بَلکَم عیسای مَسیح و خِدای دَدَ واسیطَنَه اَ کن بَی مَردَاونکا زندَ آکَردِش، 2 وهِنتَه گِردِ برا اِنی کن بَمِنَه دَرِن، غَلاطیَه کِلیسااونرا: 3 فیض و صلح و سلامتی، چَمَه دَدَ، خدا طَرفیکا و خداوند عیسای مسیح طَرَفیکا شِمَرا ببو، 4 کن اِشتَن جانی چَمَه گِناخون راکا آداشَه تا خدا و چَمَه دَدَ ایرادنَه، اِم آوشَرَ زَمونَه کا بِراخنِه. 5 اَیرا تا ابَد شِکوه جلال ببو. آمین. دییَرَ انجیلی نیَه 6 اَز حَیرون آبیم کن شِمَه اَنَ زو اَیکا کن مَسیح فِیضی واسیطَنَه بَشِمَه خِلِه کَردَشَه، آهَشتِرون، و اِشتَن صَفَتی ایلَه دییَرَ اِنجیلی طَرَف آگاردِنیرون. 7 اَلبَت دیَرَ اِنجیلی وِجود نِدارِ، ولی کَسِنی هِستینَه کن بَشِمَه تَفشیش دَنَّفَند و اَپیشونَه کن مَسیح اِنجیلیکا دَست بِبَن. 8 اَمّا حتی اَگَم اَمه یا فرشتَه ایی آستامونیکا ایلَه اِنجیلی، غَیراَز اَ چیی ایی کن اَمه بَشِمَه اییلاممون کردَ موعیظَه بکَرِ، لَنَت ببو! 9 هَتَه کن چیمی بَه نَه واتِمون، ایسَه نی باتیم: اَگَم کَسی اِنجیلی، غَیراَز اَچیی ایی کن قِبول کَردِرون شِمَرا موعیظَه بکَرِ، لَنَت ببو! 10 یعنی ایسَه اَز مَردومی تاییدی بَپیمَه یا خدا تاییدی؟ یا تَقلا بَکَمَه مردومی راضی دَرورِم؟ اَگَم هَتَه مَردومی راضی دَروَردِ دوملَه بیمَه، مَسیح وزییَر آنَبییمَه. پولوس اِشتَن خیدمتیکا دیفا بَکَی 11 اَی بِرااِن، اَپیمَه بِزنَه اِنجیلی کن اَز ایلامم کَردَ، اینسانیَه اِنجیل نیَه، 12 اِمی خونه کن اَز اَی هیچ اینسانیکا ویگَتم نی، و کَسی نی اَی بَمن آموج آنِداشَه؛ بَسکَم اَی، عیسای مَسیح مِرا دیار آکَردِش. 13 اِمی خونه کن شِمَه چمن گِذَشتَه زَندَگی تَریفی اَموقه کن یَهودی بیمه دَرَستَرون، کن چَنَه وِر خدا کلیسا اون اَیذَت آزار اَکَریمَه و چَوون ویراونستِرا تقلا اَکَریم. 14 و اَز چمن قامیکا خَیلیونکا کن بَمنَه سَخوبال بین یهودی گیریکا نار دَرَوزیم و چمن مردومی دلَکا اِشتَن دَدَاون رسمی اَنجوم دوعِه کا بَرک غَیرت داریم. 15 ولی وقتی اَ کَسی کن بَمن چمن نَنَه رَمیکا اِشتَن کاریرا وَقف کَردِش، و اِشتَن فِیضی واسیطَنَه بَمن خِلِه کَردِش، چَی خَشی اِمیکا بَه کن 16 اِشتَن زوعَه، چمن دلَکا دیار آکَرِ تا غَیرِ یَهودیون دِلَکا بَی اییلام بِکَم، اَ موقه کا جندَکینَه و خونینَه گَفَه ژِنَه نِکَردِم، 17 وشهر اورشَلیمیکا نی، اَیِنی وَر کن بَمنکا بَه نَ رسول بینَه، نِشیم؛ بَلکَم عَرَبِستانیرا رونَه بیم و چَی بَه دوملَه دَمِشقیرا ویگَردِستیم. 18 چَی به دوملَه، سِه سال کن گِذَشته، اورشَلیمیرا شیمَه تا کِیفا بِوینِم، و پانزَّ روج چَی وَر مَندیم. 19 ولی دیَرَرسولونکا جُز خداوند عیسی برا، یَعقوب، دِ دیَرَ کَسی نِویندِم. 20 خدا حِضوریکا بَشِمَه ایطمینان آمَدا کن اَ چیی کن بَنوِشتیم دِروو نیَه. 21 چَی بَه دوملَه، سوریَه و کیلیکیَه منطقه اونرا شیمَه. 22 هَنوزَنی یَهودیَه کلیسا اِن کن مَسیح دِلَکا هِستین، چمن صَفَتی نِه آزنین. 23 اَیِن تاکَه دَرَستَشون بَه و اَواجینَه: «اَ مِردی کن چیمی بَه نَ اَمه اَیذَت آزار اَکَریَه، ایسَه هَه ایمانی اییلام بکَیه کن گِذَشتَه کا چَی نیفیت آکَردِرا تَقلا اَکَریَه.» 24 و اَیِن چمن خونِه خدا ستایش اَکَرینَه. |
@ 2024 Korpu Company