نامَه اَفسوسی کلیسارا 6 - کتاب مقدس به زبان تالشي - گویش مرکزی

خِردَنون و دَده نَنَه

¹ اَی خِردنن، خداوندی دلَکا اِشتَن دَدَ نَه نَه کا ایطاعت بکَرَ، اِمی خونه کن درِسته کار اِمَه.

² «اِشتَن دَدَ و نَنَه ایحترام بکَه.»، کن اِم، وعدنه، اولین حِکمه:

³ «تا خَسمند آبی و زَمینی سَردِرِ دِرازَ عمر بداری.»

⁴ دَدَ اِن، اِشتَن خِردَنون برضَخ آنِکرَ، بَلکَم خداوندی تعلیم و تربیتینَه اوون یال آکَرَ.

وَزییَرِن و اَربابِن

⁵ اَی وَزییَرِن، زَمینی سَردِرِ اِشتَن زمینیَه اربابون ترسینَه، و صدق دِلینه، ایطاعَت بکرَ، هته کن مسیح کا ایطاعَت بَکَرون.

⁶ و اِمی نی، نِه تاکَه هَنگومی کن چَوون چَم شِمکارَ، و یا اَیِنی شیوار کن آدَمی راضی آکَردِ دوملَه این، بَسکم هنته مسیح وَزییَرون شیوار، کن خدا ایرادَ جانو دلینَه اَنجوم دَرِن.

⁷ چاکَه نییَّتینه خیدمت بکرَ، اَنه کن اینگار خداوندی خیدمت بَکَرون نِه اینسانی،

⁸ اِمی خونه کن بَموستیرون هر کَم چاکی بکرِ، چَی عَوضی خداوندیکا ویرَگَت، چه وزییَر ببو چه آزاد ببو.

⁹ اَی اربابِن، شمَه اِشتَن وَزییَرونَّه هِنترَکه رفتار بکرَ، و چَوون تهدید کردِکا دست پِگِرَ، چون بَموستیرون اَ کن هِم چَوون اَربابَه و هِم شمَه اَرباب، آستامونیکارَ، و اَ هیچ کَسی سَردِرِ فرق نیَه نا.

خدا تمام کمالَ اسلحه

¹⁰ آخیر بَسَر خداوندیکا و اَ زبقیکا کن چَی خِنَریکا آ، قودور آبَه.

¹¹ خدا اسلحَه کامیل دکرَتا بشوعَه ابلیسی حیلَه اون ناریکا پا بومونه.

¹² اِمی خونه کن چَمه جَنگِستِه جندَک و خونینَه یعنی اینسانینَه نیَه، بَسکم اَمه ریاسَتون زرَبَرا، زبقون زرَبرا، و اَ ظلَماتی اینجاری زرَبرا کن اِم دِنیا سَردِرِ حاکیمینَه، و آوشَری روحانیَه لَشکری زربَرا، کن آستامونییَه جگا اونکا ینَه، بَجَنگِستیمون.

¹³ پس خدا اسلحَه کامیل دکَرَ، تا آوشَرَ روجیکا بشوعَه آمبست مندِ، وبشوعَه گردِ چییون اَنجوم بِه بَه دوملَه، پا برجا بومونَه.

¹⁴ پس آمبست بومونَه، هته کن حَییقتی دالَه دبستِرون و صالح بِه زرِه دکردِرون،

¹⁵ اِنجیلی صلح و سلامتی هنتَه ایلَه پاغَبی شیوار دکرَ، ایی جوری کن اینگار چَی اییلام کردِرا آمادَ ایرون.

¹⁶ هر وضعییَتیکا، ایمانی سپَری پگِرَ، تا بشوعَه بَینه، اَ آوشَری آرا گتَه تیرون گردی دکِشَه.

¹⁷ نیجاتی کِلاخودی اِشتَن کلَه کا آنرَ و روح شمشیری کن هه خدا کلامَه، بالیکا بدارَ.

¹⁸ و اوزون، همه مودیل دِوا و خاشتو خازینَه، خدا روح دلَکا دِوا بکرَ و هِمیرا بیدار و هوش ببَه و یژَن پایدارینَه گردِ موقدسَه آدَمونرا دِوا بکرَ.

¹⁹ مِرا نی دِوا بکرَ، تا هر موقه گف ژِرا اِشتَن گَوی آج آمکَرد، اَ کلامی زبقی بمِن آدَن، تا انجیلی رازی جورئَتینه اییلام بکَم،

²⁰ هَه انجیلی کن اَز چَی سَفیریمه، هر چَنَه زِنجیلیکام، دِوا بکرَ هَته کن چَی شئنَه، اَی جورئَتینه اییلام بکَم.

آخِرین گَفِن

²¹ اِمی خونه کن چمن حالیکا باخبر ببَه و بزنَه کن چِه بَکمَه، تیخیکوس کن خاجَتیَه برا و خداوندی وفادارَ پاسَریَه، گردِ چییون بشمَه باتیَه.

²² اَز بَی، هِم منظوری خونه شمه وَر رونَه بَکم تا چمن حالیکا باخبر ببَه، و تا اَ بشمَه آلاونِه.

²³ خدای دَدَ طَرَفیکا و خداوند عیسی مسیح طَرَفیکا، برا اونرا صلح و سلامتی و موحبت، ایمانینَه ببو.

²⁴ چَی فیض گردِ اَیِنی نَه ببو کن چَمَه خداوند عیسی مسیح، اَ موحبتینه کن نیفیت آنییَب رَی بَداشتینَه.