نامَه اَفسوسی کلیسارا 5 - کتاب مقدس به زبان تالشي - گویش مرکزی

محبتی نَه رفتار بکَرَ

¹ پس هِنتَه خاجَتییَه خِردَنون شیوار، خدا کا سرمشق بیگَرَ.

² و موحبتینه رفتار بکرَ، هته کن مسیح نی اَمَش موحبَت کردَ و اِشتَن جانی، هنته ایلَه قِربونی و عَطرینَه خَلایی شیوار خدارا تقدیم کردش.

³ ولی شمَه دلَکا، بی عیفتیکا یا هر مودیل ناپاکیکا یا طمَع کا حتی گَفی مژَنه، اِمی خونه کن اِمِن موقدسَه آدَمون شئَنیکا نیَه.

⁴ بَدَ گفِن و دَدارَ واجی و رَکیکَه گفِن شمَه دِلَکا مبو کن شمَه شَائنیکا نییَه؛ چَی جِگا پی شکر کردِ.

⁵ اِمی خونه کن یقین بزنَه کن هیچ بی عیفت یا جیفینین یا طمعکارَ اینسان، کن هَه بوت پرستین، خدا و مسیح پادیشایی کا رَسَتی نیشَه.

⁶ مرزَ کَسی بَشِمَه دَدارَ گَفونَّه گول بژَنه، چون هِم چییون خونه اَ کن خدا غَضَّب نافِرمونون سَردِرِ آ.

⁷ پس اَوونَّه شریک آنِبَه.

⁸ شمه ایی زمان ظِلَماتیکا بیرون، ولی ایسَه خداوندیکا نوریرون. پس هنته نوری خِردَنون شیوار رفتار بکَرَ.

⁹ اِمی خونه کن نوری بَرَ، هر مودیل چاکی و راستی دِرِستیکا پَیدا آرَب.

¹⁰ تقلا بکرَ تا سَر آگِنه کن چه چیی ایی خداوندی راضی آرَکَرد.

¹¹ ظلَماتی دَدارَ کارونکا شریک آنِبَه، بَسکم اوون دیار آکَرَ.

¹² چون اَ چیی ایی کن اِنتَرَ آدَمِن نونَکِه بَکنَه حتی زونو سَر وَردِ شرم آورَ.

¹³ ولی هر چیی ایی کن نوری واسیطنَه دیار آبو، اَیر آرَبن.

¹⁴ چون هر چیی ایی کن دیار آرَبن، نورَ. اِمی خاطر کن واتَشون: «اَی ته کن خاویکایشَه، پِب، مردَاون دِنیاکا زندَ آب، مَسیح اِشتَن نوری، اِشتِه سَردِرِ دَتاوِستییَه.»

¹⁵ پس، بَرک حواسِرون ببو کن چنترَ رفتار بَکَرون، اَلمندون شیوار رفتار بکرَ نِه نافَمون شیوار.

¹⁶ اِم وقتی کن دارَ قدری بزنَه، اِمی خونه کن اِم روجِن بَدَ روجِنی هِستینَه.

¹⁷ پس نافَم مبَه، بَسکم سرآگِنه کن خداوندی ایرادَ چه چییَه.

¹⁸ شراوی مَست آنِبَه، کن بَشِمَه بدَ کارونرا دَرَراکنِست؛ بَسکم خداروح کا پتلمَه ببَه.

¹⁹ مزامیرینه، پرستشَه سِرودِن و آوازِنی کن خدا روح کا اَ، یندِنَه گفَه ژَنِه بکرَ و صِدق دلینَه خداوندیرا بوخونه و آهنگ سِی آکَرَ.

²⁰ اوزون خدای دَدَ، چَمه خداوند عیسی مسیح نومینَه هَمه چی خونه شکر بواجَه.

²¹ مسیح حورمتی خونه، یَندِ فِرمون ببَه.

²² اَی ژِنن، هَتَه کن خداوندیرا فِرمونیرون، اِشتَن شو فِرمون ببَه،

²³ اِمی خونه کن شو ژِنی سَرَ، هته کن مَسیح کلیسا سَرَ، یعنی چَی تَن، و هَه اِشتَن، کلیسا نیجات اَدَرَ.

²⁴ پس هته کن کلیسا مسیح فِرمونَه، ژِنن نی پی هر چیی ایکا اِشتَن شو فِرمون ببون.

²⁵ اَی مِردِن، اِشتَن ژِنون رَی بدارَ، هته کن مسیح نی اِشتَن کلیسا رَی داریَه و اِشتَن جانی چَیرا آداشَه،

²⁶ تا بَی خدا کلامی آوینَه پاجا آکَرِ و اِنترَکه کلیسا تقدیس بکرِ،

²⁷ تا اَ شکوهینَه کن کلیسا بَداشتی، بیدونه هیچ لَک و چین و نقصی ، بَسکم موقدَّس و بی عَیب ببو، اِشتَن وَریکا حاضیر آکرِ.

²⁸ هِنترَکه، مِردِن پی اِشتَن ژِنون هنته اِشتَن تَنی شیوار رَی بدارِن. اَ کن اِشتَن ژِنی رَی بَداشتیَه، بَشتن رَی بَداشتی.

²⁹ اِمی خونه کن هرگز کَسی اِشتَن جندَکیکا بیزار نییَه، بَسکم بَی هردَ چیی دَرِ و بَی غَم بردی، هته کن مسیح نی کلیسا غَم بردییَه-

³⁰ اِمی خونه کن چَی تَنی اَعضا ایمون.

³¹ «اِمی خاطر مِرد، اِشتَن دَدَ و نَه نَه آرَهَشت، و اِشتَن ژِنی دَرَچیکست، و اَ دِ ایلَه تَن آنَّب.»

³² اِم راز، برک یالَه- و اِمی کن اَز باتیم مسیح و کلیسا خونه اَ.

³³ خولاصَه اِمکن، هر کِرَم شمَکا نی پی اِشتَن ژِنی هنتَه اِشتَن جانی شیوار رَی بدارِ، و ژِن پی چَی حواس ببو کن اِشتَن شو حورمتی غَم بَرِ.