نامَه اَفسوسی کلیسارا 4 - کتاب مقدس به زبان تالشي - گویش مرکزی

مسیح تَنیکا ایلَه آبِه

¹ پس اَز کن خداوندیرا زیندانیکامَه، شمَکا خاشتو خازِمه صلاییی کن بَشمَه ژَشونه شئنی نَه، رفتار بکرَ،

² کامیلَه فروتنی و مولایمتینَه؛ و صبرینَه و موحبتینه یَندِ تاو بوعَرَ.

³ تقلا بکرَ تا اَ ایلَه آبِه، کن خدا روح کارَ، صلح و سلامتینَه غَم برَ.

⁴ هَته کن ایلَه تَن، ایلَه روحه، خدا نی اَ موقه کن بَشِمَه صَلا ژِشَه ایلَه اومید بَشِمَه آداشَه؛

⁵ ایلَه خداوند، ایلَه ایمان، ایلَه غسل تعمید؛

⁶ و ایلَه خدا و گردی دَدَ کن گِردیکا کفاتَرَ، گِردی دلَکا کار بَکَی، و گِردی دلَکارَ.

⁷ ولی اَمه هر کِرَمیرا مسیح بخشِشی اَندازَ، فِیضِشون بخشِستیَه.

⁸ اِمی خاطر کیتاو مَزمور باتیَه: «هَنگومی کن اَ عرش بَرینیرا کَفا شَه، ایی لَشکَر اسیرونکا بَشتنَه بَردِش، و اَ برکَه خلااون مردومی آداشَه.»

⁹ اِم گَف کن «اَ کفارا شَه»، معنی چِه چییَه، غَیرَاز اِمکن زَمینی پست ترین جِگا اونرا بِن ویرمَه بَه؟

¹⁰ اَ کن بنیرا ویرمَه، هیَه کن گردِ آستامونونکا کفاتَر شَه، تا همَه چییون اِشتَن حِضورینه پتلمَه آکَرِ.

¹¹ و هَیَه کن رسولِنِش آدوعَه و پیغمبَرون، و موبَشِرون، شونَه اِن، موعَلَّیمِون آداشَه،

¹² تا موقدسَه آدَمون خیدمت کَردِ کاریرا آمادَ آکَرِ، مسیح تنی بَنا آکَردِرا،

¹³ تا زمانی کن گرد ایمانیکا ایلَه آبَم و خدا زوعَه آزنِستِه کا ایلَه آبَم، تا اِنترَکه ایلَه کامیلَه اینسانی اَندازَ یال آبَم، تا مسیح برزَ قامتیکا آرَسَم.

¹⁴ پس دِ هنته خِردَنون شیوار آنیمونَب، کن موجون نَّه اَمه هر طَرَفیرا ویدارِن و موختلیفَه آموجن و آدَمون مکر و حیلَه وا، اَ نقشَه اونیکا کن چَمَه گومرا کردِرا بَکشتین، اَمه اِم وَر اَ وَریرا ببَرِ.

¹⁵ بسکم حَییقتی واتِه نَه، موحبَتیکا، هر لحاظیکا، اَ کَسی کن سَرَ اَندازَ، یعنی مسیح، پِ روعَم.

¹⁶ چَی دلَکارَ کن تَنی گردِ جِگا اِن، چَتوَرینَه کن بَی مربوطه یَندِ دَنَه چیکِست و آمبَست آنَّب، تا هر کِرَم عُضوونکا دِرِست کار بِکَن، تَن پِرَرا و و بَشتَن موحبَتی دلَکا بنا بَکَی.

تازَ زندَگی

¹⁷ پس اِمی باتیمَه و خداوندیکا هَنی باتیم، کن دِ شمَه رفتار نِباید هنتَه اَ قامِنی شیوار کن خدا آنینَزنِست ببو، کن اِشتَن دَدارَ فکرونَّه رفتار بَکَن.

¹⁸ چَوون عَقِل تاریک آبیَه، و نافَم گیری خونه کن چَوون سنگ دلی نتیجه یَه، خدا زندَگیکا رَت آبَه این.

¹⁹ اَیِن سنگ دل آبَه اینَه، و بَشتَنِشون هرزَگی دَست آدوعَیَه، اَنه کن طمَه کردِ نَه هر ناپارکیرا بال بَژَن.

²⁰ ولی شمَه مسیحِرون اِنتَرَ آموج گَتَرون نییَه،

²¹ البَت کن اَگَم گَمون بکرَم، کن چَی خونه درَستَرون و اَ حَییقتی سَردِرِ کن عیسی کا اَ، آموج گَتَرون.

²² تا شمه گذَشته زندَگی روِش، یعنی اَ قدیمَه اینسانی کن حیلَه بازَ مِیلون واسیطنَه مِچِم بَه، شمَه تَنیکا بِرِنِرون بَروَرد.

²³ شمه فکر روح دلَکا تازَ آبو،

²⁴ و تازَ اینسانی، کن حییقیَه صالِح بِه و قودوسیَّتیکا اَ، و هنتَه خدا شیوار خلق آبَیَه، دکَرَ.

²⁵ پس، دِروو کا دس پِگِرَ، هر کِرَم شمَکا اِشتَن خَمسوعَنَه، راستَه گف بواجِه، چیرا کن اَمه گِرد، یَندِ ایلَه اَعضاایمون.

²⁶ «آسرَنگَه، ولی گِناخ نِکَرَ» نَرزَ شمه روج تمون آبو و شمَه هَنوزَنی غَضَّبیکا بِبَه،

²⁷ و ابلیسی فِرصَت نِدَرَ.

²⁸ پِتارچی دِ مَپِتارِ، بَسکم زَمَت بکَشِه، و اِشتَن بالونَّه صیداقَتینَه کار بکَرِ، تا بشا دَسدَریسون نی چیی ایی بدرِ.

²⁹ شمَه گَو بَدَ گفیرا آج آنِبو، بَلکَم شمَه گَفِن گِرد دییَرَ آدَمون بنا کردِرا کار با و نیازی براووردَ بکرَ، و اَدَرَسونرا فیض آرَسونِه.

³⁰ خدا موقدسَه روح کن اَینَه رخِستِه روجیرا مُهر بَه ایرون، برضَخ آنِکرَ.

³¹ هر مودیل تِل گیری، غَضَّب، آسرَنگِستِه، جِکَّله، ایفترا و هر مودیل بَد پیستِه بَشتنکا رَت آکَرَ.

³² یَندِ نَه مِربان دلسوز ببَه و هته کن خدا بشِمَه مسیح دلَکا بخشِستِشَه، شمه نی یَندِ ببَخشَه.