نامَه اَفسوسی کلیسارا 3 - کتاب مقدس به زبان تالشي - گویش مرکزی

اِنجیلی راز دیار آرَب

¹ اِمی خاطر اَز، پولوس، کن شمَه غَیر یهودیون خونه مسیح عیسی زیندانی ایمَه-

² و بیدون شک شمه حتما اِم موضوع درَستَرونه کن خدا فیضی سَر نیظارَت، شمَه خیدمتی خونه، بَمِنِشون دوعَیه.

³ کن چنتَه اَ راز، موکاشفَه نَه مِرا دیار آبَیه، هَته کن تلَکه ایی چَی خونه شِمَرا نوشتَمه،

⁴ چَی خندِ نَه، بَشارون سَر آگنِستِه کن چنته مَسیح رازی فَهمستِمَه،

⁵ اَ رازی کن گذَشته اودومونکا آدَمون زوعَه اونرا دیار آنِبَه، اَتَه کن ایسَه خدا موقدسَه روح واسیطنَه چَی موقدسَه رسولونرا و پَیغَبرونرا دیار آبَیه.

⁶ اَ راز اِمَه کن غَیر یهودییِن مَسیح عیسی دلَکا اِنجیلی واسیطنَه، هَم اِرثین و هَه تَنی اَعضا هِستینَه و خدا وعدَکا شَریکین.

⁷ اَز، خدا فیضی خَلا واتنَه، کن چَی خِنَری اَعمالی واسیطنَه بَمنِشون دوعَه، اِم انجیلی پاسَری آبیمَه.

⁸ هر چَنَه کن موقدسَه آدَمون دلَکا گِچ تَرینیم، اِم فیضی بَمِنِشون دوعَه کن مسیح وِرَ گنجون خبَری غَیر یَهودیونرا اییلام بکَم،

⁹ و گِردیرا آمونِم کن خدا نَقشَه چنترَ اَنجوم آرَب. خدایی کن گردِ چییِنِش خلق کردَیه اِشتَن اِم رازی گِذَشتَکا نون آکَردَش بَه.

¹⁰ تا ایسَه کلیسا واسیطنَه خدا موختَلیفَه حیکمَتِن، و قودرَتونرا و رَئَیسونرا، آستامونیَه جگا اونکا دیار آبو.

¹¹ اِم هدفی بَه کن ههَ شِروو کا خدا داری، کن خدا اَی چَمَه خداوند مسیح عیسا کا اَنجوم داشَه.

¹² اَمه مسیح دلَکا بَی ایمان داشتِه واسیطنَه، بَشامونه جورئَتینه و ایطمینانینَه خِداکا نِزِک آبه.

¹³ پس اَ رنجِنی خاطر کن شمَه خونه تاو بوعردیمَه خاشتو خازِمَه، دلسرد آنِبَه، چیرا کن اَیِن شمه ایفتخار کردِ باعیث بَبی.

روحانیَه زِبقی خونه دوا

¹⁴ اِمی خاطر، اَز آستامونیَه دَدَ ناریکا زِنگ بَژَم

¹⁵ آستامونیکا و زَمینی سَردِرِ هر خانیوادَ ایی، چَی نومی بوعَردین،

¹⁶ کن اِشتَن شکوه جلالی خاطر، بَشِمَه دولتمندی بِدرِ کن اِشتَن باطنیکا خدا روح کاریَرینَه قودور و زاکیندار آبَه،

¹⁷ تا ایمان داشتِه واسیطنَه مسیح شمَه دلونکا بومونِه و موحبَتیکا ریشَه بژَنه، و آمبَست آبَه،

¹⁸ تا زبق بیگِرَ کن گردِ موقدسَه آدَمونَّه، مسیح موحَبتی درازی و وشایی و عومقی و بِلَندی کا سَر آگِنَه

¹⁹ و مسیح موحبتی کن اینسانیَه مَریفَتیکا کفاتَرَ، آزنَه- تا کامیلا خدا کامیل بِه کا پَتلمَه آبه.

²⁰ ایسَه شکوه جلال خدارا ببو کن بَشایَه اَ خِنَری واسیطنَه کن چَمه دلَکا کار بَکَی، هر چیی ایکا کن اَمه بَپیمون یا فکر بَکمون، خَیلی ویشتَر، عمل بکَرِ.

²¹ کلیسا دلَکا و مسیح عیسی کا، گِردِ اودومنکا، تا ابد خدارا شکوه و جلال ببو، آمین.