نامَه اَفسوسی کلیسارا 2 - کتاب مقدس به زبان تالشي - گویش مرکزی

فِضینَه، ایمان داشتِه واسیطنَه

¹ شمَه اِشتَن گِناخونرا و خَطا اونکا مردَ بیرون،

² و زمانی چَوون دِلکا زندَگی اَکَریرون، اموقه کن اِم دِنیا راه اونکا و هوا زبقی رئیسیکا، یعنی اِبلیسییکا پیروی اَکَریرون، هه روحیکا کن هِم ایسَه نی نا فِرمونی خِردَنونکا عمل بَکَی.

³ اَمه نی گرد ایی زمانی چَوون دِلَکا اِشتَن جندَکی هوا و هَوسی دِلَه زندَگی اَکَریمون و چَمه جندَکی خواستَه اِن و فکرون اَنجوم اَدَریمون؛ هنته دییَرَ کَسون شیوار، اِشتَن ذاتی سَر، خدا غَضَّبیکا محکوم آبیمون.

⁴ ولی خدایی کن چَی رحمت بَرک وِرَ، اِشتَن یالَه موحبتی خونه اَمه رَی داریَه،

⁵ حتی وقتی کن اِشتَن خطا اونکا مردَ بیمون، اَمَش مسیح نَه زندَ آکردِش، شمَه فیضی راه نَه نیجات گَتَرون؛

⁶ وخدا اَمَش مسیح نَه زندَش آکَردَ و آستامونیه جِگا اونکا مسیح عیسی نَه نِشامنیشَه،

⁷ تا آیندَ زمونَکا، اَ اِشتَن پَتلمَه فیضی میسح عیسی دلَکا، اِشتَن مِربانی واسیطَنه کن چمَرا بَداشتی، اَمه آمونِه.

⁸ اِمی خونه کن فیضینَه و ایمان داشتِه واسیطنَه نیجات گَتَرون. و اِم شمَه کا نییَه، بَسکم خدا خَلا اَ،

⁹ و اِم کارون نتیجَه نیَه، تا هیچ کَم مَشا بَشتن ایفتخار بکرِ.

¹⁰ اِمی خونه کن خدا بالی سِی آکردَ چیی ایمون، و مسیح عیسی کا خلق آبیمون، تا چاکَه کار اَنجوم بدَرَم، اَ کارِنی کن خدا ناردَکَر آمادَ آکردشَه تا اَوونکا گَل بِژَنَم.

مسیح کا ایلَه آبِه

¹¹ پس یاد آفَنه کن بَشِمَه ایی زمانی غَیر یهودیون «سِنَت آنِبَه» خِلِه اَکَرین، و بَشتن «سِنَت آبَه» بَموستین- ایسَه اِمکن چَوون سِنَت بِه تاکَه جندَکی سرَ کن اینسانی بالینَه اَنجوم بیَه-

¹² یاد آفَنه کن اَموقه مسیح کا تاک بیرون، ایسرائیلی قام بَحیساب نامیرون و عَهدون وعدَ نَه، خَلک بیرون، و بی اومید و بی خدا اِم دِنیا کا زندَگی اَکَریرون.

¹³ ولی ایسَه مسیح عیسی دِلَکا، شمَه کن ایی زمان دور بیرون، مسیح خونی واسیطَنه نِزِک آبیرون.

¹⁴ اِمی خونه کن اَ اِشتَن چَمَه صلح و سلامتیَه، کن یهود و غَیر یهودِش ایلَه سی آکردیَه و اِشتَن جَندَکیکا جِدایی دیوار کن عَدابَتی باعیث اَبییَه، ویراونیشَه،

¹⁵ رَسمِنی کن شریعَتی حِکمونکا بَه باطل آکَردِش، تا اِشتَن دلَکا اَ دِگلَه عَوَض، ایلَه تازَ اینسان خلق آکرِ، و صلح وسلامتی بَوجود بوعَرِ،

¹⁶ و هر دِ تَنی دلَکا خِدانَه آشتی بدرِ، اِشتَن صلیبی واسیطنَه کن چَی سَردِرِ عَدابَتِش کِشتَه.

¹⁷ اَ آمَه صلح و سلامتی خَشه خَبری بَه شمَه کن دور بیرون و اَیِن کن نِزِک بینَه، اییلام کردِش،

¹⁸ اِمی خونه کن چَی واسیطنَه، اَمه دِ گِلَه، ایلَه روح نَه، آستامونیَه دَدَ دَسترَسی دارَم.

¹⁹ پس دِ شمه خَلک و اَجنبی نیرون، بَسکم موقدسَه آدَمون هم وطن و خداوندی کَه ایلَه آدَمونکا هِستیرون؛

²⁰ شمَه اَ عیمارَتی سَر کن رسولِن و پَیغمبرِن چَی هیم بینَه، بَنا آبَه ایرون، کن مسیح عیسی اِشتَن اَ بَنا، اصلییَه سِه اَ.

²¹ چَی دلَکا گردِ اِم بَنا یَندِ نَه وصل بَبین و و ایلَه موقدسَه عیبادتگا خداوندیکا برپا بَبیَه.

²² و مسیح عیسی دلَکا شمَه نی یَندِ نَه بنا بَبیرون تا هِنتَه ایلَه کَه شیوار آبَه کن خدا اِشتَن روح واسیطنَه چَی دلَکا بَمندی.