نامَه اَفسوسی کلیسارا 1 - کتاب مقدس به زبان تالشي - گویش مرکزی1 پولوسی طرَفیکا کن خدا خواستَنه مسیح عیسی رسولَه، بَه موقدَسه آدَمِنی کن شهر اَفِسوسیکا بمَندین، اَیِنیرا کن مسیح عیسی دلَکا وفادارینَه: 2 چَمَه دَدَ، خدا طرَفیکا و خداوند عیسی مسیح طرَفیکا، فیض و صلح سلامتی شمَرا ببو. روحانی یَه بَرَکَتِن مسیح دِلَکا 3 خدا و چَمَه خداوند عیسی مسیح، دَدَ، موتبارَک ببو، کن اَمَش میسح دلَکا هر روحانیَه برَکتینَه آستامونیه جِگا اونکا برَکت آداشَه. 4 اِمی خونه کن دِنیا خلق بِه بَه نَه، اَمَش چَی دلَکا اینتخاب کردِش تا چَی حِضوریکا بی عَیب و موقدَّس ببَم، و موحبَتیکا 5 اَ اِشتَن ایرادَ و خواسته واتَنه، اَمَش نارتَر اِشتَن اَگییَه زوعَه گیری را تَیین کردِشَه، تا عیسی مسیح واسیطَنه خدا زوعَه اِن ببَم؛ 6 تا چَی پور شکوه و جلالَه فیض ستایش ببو، فییضی کن اِشتَن خاجَتی دلَکا اَمَش برَکَت آداشَه. 7 اَمه مسیح دلَکا چَی خونی واسیطنَه رَخِستیمون، کن اِم هَه خطا اون بخشِستِه یَه، کن اَش، اِشتَن برکَه وِرَ فیضی اندازَ، 8 هرحیکمَت و کامیله فَهمی کا، فرَوون اَمَش آدوعَیَه. 9 اَ اِشتَن ایرادَ رازی اَمَش آمونِسته. اِشتَن خواستَه واتَنه کن مسیح کا دیار آکَردِش. 10 خدا نَقشَه اِم بَه، کن زمانی چَی وقت آرَسِه، چِه آستامونیکا و چِه زَمینی سَردِرِ، گِردی مسیح دلَکا جَم آکَرِ. 11 اَمه نی چَی دلَکا واریثِن آمونَب، اِمی خونه کن چَی خواستنَه کن هَمه چییون اِشتَن ایرادَ واتنَه اَنجوم دَرِ، ناردَکَر تَیین آبَه بیمون. 12 تا اَمه کن اَولین نفَرِنی بیمون کن مسیح کا اومید داریمون، چَی شکوه جلالی، ستایش بکرَم. 13 و شمه نی چَی دلَکا، وقتی کن حَییقتی کَلامی، کن هَه شمَه اِنجیل نیجاتَه درَستِرون و بَی ایمانِرون وردَ، ؛ خدا موقدسَه روح نَه کن وعَدَشون دوعَه یَه مُهر بیرون، 14 کن چَمَه میراثی بَیعانَه یَه تا وقتی کن اَی کامیل ویگِرَم، تا خدا شکوه و جلال ستایش ببو. شُکر کردِ و دِوا 15 اِمی خاطر هَتَه کن اَز نی وقتی شمه ایمانی تریفی کن به عیسای خداوند دارَ و موحبتی کن گردِ موقدسَه آدَمونرا دارَ درَستِم، 16 شکر کردِ شمه وجودی خونه را دَست پِگتَم نییَه، یَژَن بَشِمَه اِشتَن دِوا انکا یاد آمَفند، 17 تا چَمَه خداوند عیسی مسیح خدا، اَ پور جلالَه دَدَ، حیکمت و موکاشفَه روح بشمَه بدَرِ، تا بَی آزنَه، 18 تا شمه دلون چَم رِشون آبون، تا اومیدیرا کن خدا بَشِمَه چَی خونه خِلَه کردشَه، آزنَه و خدا اَ بی حد و حیساب و پور جلالَه میراثی موقدسون دلَکا سَر آگنَه، 19 و چَی بی حَد و حیسابَه خِنریکا چَمَه سَر کن ایمان دارَم، باخبر ببَه. اِم خنَر، خدا زاکیندارَ اینجاریکا کن کا کار کردِ بومیَه، 20 کن اَی مسیح کا کار گَتِش، اَموقه کن بَی مرداونکا زندَ آکَردِش و آستامونیه جِگا اونکا، اِشتَن راستَه بالی وَریکا نِشامنیشَه، 21 کن هر ریاست و زاکین و زبق و فرمانروایی ایکا کفاترَ، و هر نومیکا، چِه اِم زمونَه کا و چه آیندَکا، کفاتَرَ. 22 و اَ گردِ چییون مسیح لنگون بنیکا آناشَه، و تَیین کردشَه کن اَ کلیسارا هَمه چییون سَر ببو، 23 کلیسایی کن چَی تَنَه، یعنی چَی پتلَمه گیری، همه چییون هَمه چیکا پتلمَه آرَکَرد. |
@ 2024 Korpu Company