نامَه کُولُسی کلیسا را 3 - کتاب مقدس به زبان تالشي - گویش مرکزی

تازَ زندَگی مسیح دلَکا

¹ پس اَگَم مسیح نَه زندَ آبیرون، اَ چیی ایی کن کفا کارَ، دوملَه ببَه، اَ جگا ایی کن مسیح، خدا راستَه بالی طرَفیکا نِشتَه.

² اَ چییونی سَردِرِ کن کفاکارَ فکر بکَرَ، نِه اَ چیی ایی سَر کن زمینیکارَ.

³ اِمی خونه کن مَردیرون و شمه زندَگی ایسَه مَسیح نَه خدا دَلَکا نونَه.

⁴ وقتی مسیح کن شمَه زندَگییَه، اَیر آبو، چَی به دوملَه شمَه نی بَینَه شکوه جَلالینَه اَیر آنَّب.

⁵ پس، هر چیی ایی کن شمَه وِجودیکا زَمینی شنَه، بکشَه، یعنی بی عیفتی، جیفینین بِه، هوا و هوس، بدَ پیستَه چییِن و طمع کن هَه بوت پرستیَه.

⁶ اِم چییون خونه اَ کن خدا غَضَّب نا فِرمونی زوعَه اون سَر آمَه.

⁷ شمه نی اِشتَن گِذَشتَکا اِنتَرَ راهونرا اَشیرونَه، اَ موقه کن چَوون دلَکا زندَگی اَکَریرون.

⁸ ولی ایسَه دِ پی گِردِ اِمون بَشتنکا رَت آکَرَ، یعنی غَضَب، آسرَنگِستِه، بد پیستِه، ایفترا و بَدَ گف اِشتَن گَویکا برکَردِ.

⁹ یَندِ دِرو مدَرَ، اِمی خونه کن اَ قدیمه اینسانی چَی کارونَّه، تَنیکا آوَتَرونه،

¹⁰ و تازَ اینسانی شِندِری دَکَردَرون، کن حَقیقیَه مَریفَتیکا هر لحظَه تازَ بَبی تا هنته اِشتَن خالقی شیوار آبو.

¹¹ اِم تازَ اینسانیکا، نِه یونانی یا یهودی، نِه سِنَت بَه یا سِنت آنِبَه، نِه بَربَر یا سُکایی، نِه وَزییَر یا آزاد دِ معنی ایی نیشَه، بَسکم مسیح همَه چییَه و گِردی دِلَکارَ.

¹² پس هنتَه خدا اینتخاب بَه قام، کن موقدَّس و خاجَتییَه، بَشتن دل سوزی، مِرَبانی، فروتنی، مولایم بِه و صبری شندری دَکَر.

¹³ یَندِ تاو بوعرَ و اَگَم کَسی، کَسی سَردِرِ شَکایَتی بَداشتی، بَی ببخشِه. هَته کن خداوند بَشِمَه بخشِستِشه، شمه نی یَندِ ببخشَه.

¹⁴ و اِمون گِردی سَر موحبتی شندری دَکَرَ کن گردِ چییون یَندِ نَه، کامیلَه ایتحادینَه پَیوَند بَژَی.

¹⁵ مَسیح صلح سلامتی شمَه دِلونکا حکم بکَرِ، اِمی خونه کن حَییقتن ایلَه تنیکا خِلِه بَه ایرون. شکر گوزار ببَه.

¹⁶ مسیح کلام فرَوون شمَه دلَکا بومونِه؛ و مزامیرینَه، سِرودونَّه و آوازِنِی کن خدا روح کا اَ، کامیله حیکمَتینه یَندِ پند و آموج بدَرَ؛ و شکرگوزارینَه و اِشتَن دِلیکا خدارا بوخونه.

¹⁷ و هر کاری بَکَرون، چِه گَف ژِ کا و چِه رفتاریکا، گِردی خداوند عیسی نومینَه اَنجوم بدَرَ، و چَی واسیطَنَه خدای دَدَ شکر بکَرَ.

ایماندارون رابیطَه

¹⁸ اَی ژِنن، هَتَه کن خداوندی شَئنیکا اَ اِشتَن شو فِرمون ببَه،

¹⁹ اَی مِردِن، اِشتَن ژِنون رَی بدارَ و اَوونَّه تِندی نِکَرَ.

²⁰ اَی خردَنن، اِشتَن دَدَ و نَنَه هر کاریکا ایطاعَت بکَرَ، اِمی خونه کن اِم کار خداوندی خَش آرَکَرد.

²¹ اَی دَدَ اِن، اِشتَن خِردَننون برضَخ آنِکَرَ، نِکَرِ دلسرد آبون.

²² اَی وزییَرِن، هَر چیی ایکا اِشتَن زمینیَه اَربابونکا ایطاعَت بکَرَ، نِه کن تاکَه اَ موقه ایی کن چَوون چَم شِمَکارَ یا اَیِنی شیوار کن آدَمون راضی دَروَردِ دوملَه این، بَسکم صدق دِلینه و خداوندی ترسیرا چَوون فرمون ببَه.

²³ هر کاری جانو دِلینه اَنجوم بدَرَ هنتَه کن کاینَه خداوندیرا کار کَردِ، نِه کن مردومیرا،

²⁴ اِمی خونه کن بَموستیرون شمَه پاداش میراثییَه کن خداوندیکا بَگَتیرون، چیرا کن شمه، خداوند مَسیح خیدمت بَکَرون.

²⁵ اِمی خونه کن هَر کَم بدی بکَرِ، اِشتَن بدَ کاری عَوَضی بوَیندیَه و هیچ فرقی نییَه.