نامَه کُولُسی کلیسا را 2 - کتاب مقدس به زبان تالشي - گویش مرکزی

¹ بَپیمه بزنَه کن شمَه خاطر و کَسِنی خونه کن لائودیکیَکا مندین، و گِردِ اَیِنیرا کن چمن صَفَتی ویندَشون نی، چنتَرَ تقلا بَکم،

² تا آلاوین، و هَتَه کن موحَبتیکا یَندِ نَه موتَّحِدینَه و اَ کامیلَه ایطمینان و بی حدّ و اندازَ پَتلمَگیکا، کن فَهمیکا بَدَست آ، بَرَ ببَرَ و هِم راکا، خدا رازی، یعنی مسیح آزنِن،

³ کن گِردِ حیمکت و اَلمَند بِه گنجِن چَی دلَکا نون آبَه یَه.

⁴ اِمی باتیمَه تا هیچ کم بشمَه اَ دَلیلونَّه کن قانع بَکیَه، گُمراه نکَرِ.

⁵ چون هر چَنَه جندَکیکا شمه وَریکا نیم، ولی روحکا شمنَه دَرِایمه و شمَه نظم وآمبستَه ایمانی کن مسیح را دارَ، ویندِ خونه خَشیمَه.

مسیح کا زندَ

⁶ پس هته کن مسیح عیسای خداوندی قِبول کردِرون، چَی دلَکا زندَگی بکرَ:

⁷ چَی دِلکا ریشَه بدَرَ پِروعَه، و هَتَه کن آموج گَتَرون، ایمانیکا آمبست آبَه، و شکر کردِکا کوکورو ببَه.

⁸ هوش ببه تا کَسی بشِمه حیلَه باز و دَدارَ فلسفَه نَه مَویلاخنِه، گفِنی کن مسیح سَردِرِ نییَه، بَسکم آدَمون سونتی سَر و اِم دِنیا اوصولی سَردِرِ آمبستَه.

⁹ اِمی خونه کن ایلاهییَه ذاتی پتلَمه گیری، تماما جندکی شیوار مسیح دلَکارَ،

¹⁰ و شمه مسیح دلَکا، کن گردِ ریاسَتِن و اینجارونکا سَرَ، پَتلمَه آبَه ایرون.

¹¹ و مسیحکا سِنَت نی بَه ایرون، سِنَتی کن بالینَه اَنجوم بَه نییَه. بَلکَم جیسمانییَه جندَکی بَروَردِ نَه، مسیح، سِنَتی واسیطنَه اَنجوم بَه،

¹² و شمَه بَینَه غسل تعمیدی دلَکا، اَینه دفن بیرون، و ایمانی واسیطنَه کن خدا زبقینه کن مسیحِش مردَاونکا زندَش آکَردَ، اَینه زندَ آبیرون.

¹³ و خدا بَشِمَه کن گِناخون دلَکا و اِشتَن نفسی سِنَت نِبِه کا مردَ بیرون، خدا بَشِمَه مَسیح نَه زندَش آکَردَ. اَ چَمَه گناخون گِردی بخشِستِشه،

¹⁴ و اَ قرضون سَند کن قانونون واسیطنَه چَمَه زِرَبَرا نوشتَشون بَه باطل آکردِشَه، صلیبی سَردِرِ مِخَه کو کردِش.

¹⁵ اَ ریاسَتِن و قودرَتون اَصلحه اِنِش ویگَتَه و صلیبی واسیطنَه چَوون سَردِرِ پیروز آبَه و اَوون گِردی ناریکا رسواش آکردَ.

¹⁶ پس مرزَ اَ چیی ایی خونه کن بَردیرون و بِنتیرون، یا عید و تازَ مانگ و یَهودیون موقدسَه شنبَه روجی خونه، کَسی بَشِمَه قیضاوَت بکرِ.

¹⁷ اِمِن تاکَه آیندَ کارون سا بینَه کن آ، ولی چَوون اصل مسیح شنَه.

¹⁸ مرزَ کَسی بَشِمَه محروم بَکَرِ اِم ایصرارینَه کن تَنی پی چاک غَم هردِ و فرشتَه اون پی عیبادَت کردِ. اِنتَرَ آدَم تا اِشتَن رویا اون سَر تَکییَه بَکَی، بی دلیل اِشتَن دَدارَ فکرون خونه یالَه نار آرَب.

¹⁹ اِنتَرَ آدَم دِ سَری دَنییَچکِست؛ اَ سَری کن گِردِ تن بَیکا جان بَگَتییَه و چَتوَرون و بَندون واسیطنَه یَندِ نَه غَمِشون هردیَه، و هَتَه کن خدا بَپیشَه پِرَرا.

²⁰ پس اَگَم شمَه نیسبت بَه اِم دِنیا اوصول مسیح نَه مردَایرون، چیرا هنته اَیِنی شیوار کن هنوزَنی اِم دِنیا شِنین، چَی قانونون اَنجوم دَرَ، قانونِنی کن باتی:

²¹ «اِمی دَس آسا مکَه، اَی لِو مژَن و چَی سَریکا بال پِمَنَه»؟

²² اِمِن گِرد اَ چییِنی خونه اَ کن ایستفادَ کردِنَه نیفیت بَبین، و اینسانییَه آموج و دَستوری سَر بنا بَیَه.

²³ و هرچَنه وقتی اِشتَن سِی آکَردَ دینی کا و تنی ریاضَت، و تنی سخت گیری کا گَف بَژَی، حَکیمانَه بَه نظَر آ، ولی نفسانیَه مِیلون ناری گَتِه را هیچ کاری چَوون بالیکا بِرِن نیام.