نامَه کُولُسی کلیسا را 1 - کتاب مقدس به زبان تالشي - گویش مرکزی1 پولوسی طَرفیکا کن خدا خواستَه نه، مسیح عیسی رسولَه، و چَمه برا تیموتائوسی طَرَفیکا، 2 بَه موقدسَه آدَمِن و برا اِنی کن مسیح دلَکا وفادارین و شهر کولُسیکا مندینَه: فیض و صلح سلامتی چَمَه دَدَ، خدا طَرفیکا شمَه سَردِرِ ببو. شکرکردِ و دِوا 3 اَمه اوزون دِوا کردِ موقه شِمَرا، خدا، چَمَه خداوند عیسی مسیح دَدَ، شکر بَکمون، 4 اِمی خونه کن شمه ایمانی خونه کن مَسیح عیسی دِلَکا و موحبتی کن گردِ موقدسَه آدَمون سَر دارَ، دَرَستَمونَه. 5 اِمِن اَ اومیدی کا سرچشمَه بَگَتی کن آستامونیکا شِمَراشون غَم هَردیَه. اَ اومید کن چیمی بَه نَه چَی خونه حَییقیَه کلامیکا یعنی اِنجیل، درَستَرون، 6 انجیلی کن بَشِمَه آرَستیَه و هته کن دِنیا اِم سَر اَسَریرا نی آرَستَه، بَرَ دَرِ و وِر آرَب، هَتَه کن شمه دَلَکا نی، اَ روجیکا کن اَرون دَرَستیَه و خدا فیضی حَییقتی دلَکا سَر آگنِستیرون، عمل کردَشَه. 7 هته کن شمه اَی، چَمه خاجَتیَه همکار اِپافراسیکا آموتِرون. اَ کن شمه طَرفیکا مسیح وفادارَ پاسَری اَ. 8 اَ اَمَش شمَه موحبتیکا کن خدا روح دَلَکا اَ، باخبر کردِش. 9 اِمی خاطر، اَ روجیکا کن اِمی درستِمون، شمَرا دِوا کردِ کا دَست پَگِتمون نی، بَسکم یَژَن خداکا بَپیمون تا چَی ایرادَ آزنِستِه نَه، هر حیکمت و روحانیَه فَهمیکا پَتلمَه ببَه؛ 10 تا شمَه رفتار خداوندی شائَن ببو، و بشاعَه بَی کامیلا خَش آکَرَ:هر چاکَه کاریکا بَرَ بدَرَ و خدا آزنِستِکا یال آبَه 11 و گِردِ زبقینَه کن چَی پور جَللالَه خِنَریکا آ، قودور ببَه تا خَشینَه، برکَه صبر تحمل بدارَ؛ 12 دَدَ شکر بواجَه کن بَشِمَش قابل زونِستشَه، کن موقدسون اَ میراثیکا کن نوریکا بَداشتین شریک ببَه. 13 اَ اَمَش ظلَماتی زبقیکا راخنییَشَه و اِشتَن خاجتیَه زوعَه پادیشا ایرا بَردَشه، 14 کن چَی دِلَه، اَمه رَخِستِه بَداشتیمون، یعنی چَمَه گِناخون بخشش. مسیح شخصیت و کار 15 اَ، خدا اَ صَفَته کن نییَب بَی ویندِ و اولین خردَن، گردِ خیلقتیکا نارتَر و کفاتَر 16 اِمی خونه کن گِردِ چییِن چَی واسیطنَه خلق آبین: آستامونیکا و زَمینی سَردِرِ، ویندَنییِن و نِویندَنییِن، چِه پادیشا اییِون تختِن ویا قلمرو اِن، ریاسَتِن و قودرَتِن؛ همَه چیی، چَی واسیطنه و چَیرا خلق آبین. 17 اَ گِردِ چییونکا بَه نَه هِست بَه، و چی دلَکارَ کن دِنیا گردِ چییون یندِنَه غمشون هرَدَیَه. 18 اَ تَنیرا یعنی کلیسا سَرَ. اَ شِروو و اولین نفرَ کن مرداونکا زندَ آبَه یَه، تا گردِ چییونکا اَ سَر ببو. 19 چون خدا گردِ خَشی اِمیکا بَه کن چَی دلَکا بومونِه، 20 و گردِ چییون چَی واسیطَنه، اِشتنه آشتی بدَرِ، چه آستامونیکا و چِه زَمینی سَر، چِه صلیبی سَردِرِ چَی خونی ویکَردِ نَه، آشتی داشَه. 21 شمه نی ایی زمانی خدا نَه خَلک و اِشتَن فکریکا چَی غنیم بیرون، و اِم شمه آوشرَ کارونکا دیار آرَبیَه. 22 ولی ایسَه اَ بَشِمَه اِشتَن مَردِ واسیطنَه، اِشتَن جیسمانییَه تنیکا آشتیش دوعَیه، تا بَشِمَه موقدَّس و بی عَیب و بی هیچ چَمایی خدا حِضوریرا بوعرِ، 23 اَگَم واقییَن شمه اِشتَن ایمانیکا آمبَست بومونَه و اِنجیلی اَ اومیدیکا تِم مَرَ، هَه اِنجیلی کن آستامونی بَنیکا گردِ مخلوقونرا اییلام بَیَه، و اَز، پولوس، چَی پاسَری آبَه ایمَه. پولوسی خیدمت کلیسارا 24 ایسَه عَذابِنی خونه کن شمَرا کشتِمَه کا خَشیم و چَی تنی خونه کن کلیسا اَ، اَ چیی ایی کن مسیح عَذابونکا کمَه، چمن جندَکیکا تلافی بَکَم. 25 کن خیدمتِه نیظارَتی طبق، کن خدا چمن دَست آدوعَشه، کلیسا پاسَری آبیم، تا خدا کلامی کامیل شمَرا آمونِم، 26 یعنی اَ رازی کن خَیلی زمونَه اونکا و وِرَ اودومونکا نون آبَه بَه، ولی ایسَه چَی موقدسَه آدَمونرا دیار آبَیَه. 27 خدا اِنتَرَ اَپیش بَه اَیِن بَزنن کن غَیر یهودیون دلَکا، اِم راز چِه یالَه شکوه و جلالی بَداشتیَه، اَ راز اِمَه کن مسیح شمَه دلَکا شکوه و جلالی اومیدَ. 28 اَمه اَی اییلام بکَمون، و گردی هوشدار دَرَم و آدَمون گِردی، گردِ حیکمتینَه آموج دَرَم، تا هنتَه مسیح دلَکا یالَه آدَمون شیوار، گِردی خدا وَر بوعَرَم. 29 اِمی خاطِرَ کن اَز زَمَت بکَشتیم و گردِ اِشتَن زبقینَه و چَی واسیطنَه کن چمن دَلَکا زبقینَه عمل بَکَی، تقلا بَکم. |
@ 2024 Korpu Company