رَسولون اَعمال 6 - کتاب مقدس به زبان تالشي - گویش مرکزی

هَف نفر خیدمت کردِرا اینتخاب آنَّب

¹ اَ روجونکا کن شاگِردِن کایبینَه ایضاف آبِه، یَهودیِنی کن یونانی گَف اَژَنینَه، یَهودیونیکا کن چَوون زبان عِبرانی بَه گِلَی کَردِشون، کن چَوون ویوَ ژِنِن اِشتَن روزانَه غَذا رسَتی دِرِست آنینَّدا.

² اَ دانزَ رَسول، شَاگِردون گَردی خِلَه کَردِشون و واتِشون: «درِست نیَه کن اَمه مردومی غذا آدوعِه را، خدا کَلامی موعیظَه کردِ، آهرزَم.

³ پس بِرااِن، اِشتَن دِلَکا هَف نَفرَی کن خوش نامین و خدا روح و حیکمَتیکا پَتلَمَه بِبون اینتخاب بکَرَ تا اَوون اِم کاریرا بِنَرَم.

⁴ ولی اَمه گردِ اِشتَن وقتی دِوا کردِرا و خدا کلامی خیدمَتیرا بَنامون.»

⁵ رسولون گَف گِردیرا چاک آمَه. اَیِن استیفانِشون کن مِردی پورایمان و خدا موقدسَه روح کا پَتلَمَه بَه اینتخاب کردِشون و هنتَرَکه فیلیپُس، پروخُرُس، نیکانُور، تیمون، پارمِناس و نیکولائوسینَه کن اَنطاکیَه کا یَهودی آبَه بَه، اینتخابِشون کَردَ.

⁶ اِم مِردون رَسولون وَر بَردِشونَه و رَسولِن دِوا کَردِشون و چَوون سَر بال آناشون و اَوون گردی، اِم خیدمتی سَردِرِ آناشون.

⁷ پس خدا کَلام هَمه جِگاکا پخش آرَبیَه و شاگِردون تعداد اورشَلیمیکا خَیلی ویشتَر آبَه و یالَه کاولَه ایی یهودی کاهینونکا نی ایمان وردشون.

استیفانی ویلاخیستِه

⁸ استیفان فیض و زِبقیکا پَتلَمه بَه و یالَه مُعجیزَ اون و نِشونَه اِنی مردومی دِلَکا اَیر آرَکَریَه.

⁹ چَی به دوملَه چَن نَفر کن ایلَه عیبادَتگاهی شِن بینَه و چَی نوم آزاد آبَه اون عیبادَتگا معروف بَه، استیفانینَه بحث اَکَرینَه. اَیِن قیرَوانی یهودیونکا و اسکندَریَه و کیلیکیَه و آسیا آدَمونکا بین.

¹⁰ ولی اَیِن نَشاینَه حیکَمت و خدا روح ناریکا کن استیفان چَی واسیطنَه گَف اَژَنیَه، مقاوِمت کَردِ.

¹¹ پس اَیِن نونَکِه چَن نَفَریشون دیم پِنوعَه تا بِواجِن: «اَمه دَرَستَمونَه کن استیفان بَه موسی اِ پیغمبر و خدا، کفر باتی.»

¹² اَیِن مردوم و ایسبیَه ریشون و توراتی موعلیمِنِشون استیفانی زِرَبَرا جیکو جیکو ژِشون، و اَیِن نی استیفانی سَردِرِ ویبین و اَی گَتِشونَ و شورا وَر بَردِشون.

¹³ اَیِن چَن گِلَه دِروعَه شاهید نی وَردِشونَه، کن اَواجینَه: «اِم مِرد، یَژَن اِم موقدسَه جِگا و شَریعَتی زِرَبَرا گَف بَژَی و اِم کاریکا دست پِنییَگَت.

¹⁴ اِمی خونه کن اَمه اِشتَن دَرَستِمون کن اَواجیَه اِم عیسای ناصِری، اِم جِگا ویراوِنِست و رَسمِنی کن موسی اَمه آداشَه، عَوَض بَکَی.»

¹⁵ اِم هَنگومیکا، گِردِ اَیِنی کن شورا کا مَند بین، استیفانیکا چَم دَشتِشونَه و ویندِشون کن چَی صَفَت هِنَته ایلَه فرشتَه صَفَتی شیوارَ.