رَسولون اَعمال 28 - کتاب مقدس به زبان تالشي - گویش مرکزی

مالتی جزیرۀ

¹ وَقتی سَق و سَلامَت دَیرا کَناریرا آرَستیمون، فَهمِستِمون اَ جَزیرَ نوم مالتَه.

² جَزیرَ آدَمِن برکَه موحبت کردِشون و اَمَشون چاکَه ایستقبال کَردَ. اَیِن چَمَرا آرا کولوستار آکَردِشون، اِمی خونِه کن کِلاک اَواریَه و هَوا سَرین بَه.

³ پولوس تَلَکَه ایی ایزِم گِرد آکَردِشَه و وَقتی کن اَوون آرا سَریکا پِرَنَری، آرا رَندی خونِه، نَلَتیی ایزِمون دِلَکا بِرِن آمَه و پولوسی بالیکا آچیکَه.

⁴ جَزیرَ آدَمِن وقتی ویندِشون کن نَلَتی پولوسی بالیکا ویرَشتَه یَه، یَندِ واتِشون: «حتما اِم مِرد آدَمَه کِشَه اِمی خونه کن هَر چَنَه دَیرا کا بَروَشتَه، عیدالَت نیَشت زِندَ بومونِه.»

⁵ پولوس نَلَتی آراکا دَرَفندِشَه و چیی ایی بَی نِبَه.

⁶ مردم اینتِظار دارین چَی جَنَدک بِپَندَمِه و یا اِمکن ایکَرَ ایی بَرگِنِه و بِمِرِ. ولی وِرَ اینتظار کَشتِه بَه دوملَه، وَقتی ویندِشون بَی چیی ایی نِبَه، چَوون فِکر عَوَض آبَه و واتِشون اَ ایلَه خدا اونکارَ.

⁷ اَ نِزِکیونکا زَمینِنی بین کن جَزیرَ رَئیس کن پوبلیوس نوم داری، شِن بَه. اَ اَمَش اِشتَن کَرا صَلا ژِشَه و سِه روج اَمَکا چاکَه پَذیرایی کَردِش.

⁸ از قضا، پوبلیوسی دَدَ آزاری بَه و تَو و لَوَشی داری. پولوس چَی وَر شَه و دِوا کَردِش، و چَی سَریکا بال پِناشَه و بَی شفا آداشَه.

⁹ اِم ایتفاقون بَه دوملَه، دیَرَ آزارییِنی کن جَزیرَ کا بینَه، آین و شفا اَگِرین.

¹⁰ اَیِن اَمَشون برکه ایحترام کَردَ، و وَقتی کن اَپیمون به اَجِگاکا بشَم، هَر چیی ایی کن نیاز داریمون چَمَرا کَشتی دلَکا آناشون.

پولوس رومیرا آرَستَه

¹¹ سِه ماه بَه دوملَه، کَشتی اینَه کن زِمِستونیرا جَزیرَ کا مَندَ بَه، دَیرا را رَونَه بیمون. اَ کَشتی اِسکَندَریَه شِن بَه و جوزا نِشونَه داری.

¹² اَمه شهر سیراکوزی را آرَستیمون و لنگر ویرَفَندِمون و سِه روج اَجِگاکا مَندیمون.

¹³ چَی بَه دوملَه دَیرا، ایَه سَفَری ایدامَه آدامون و شهرِ ریگیونیرا آرَستیمون. دوملَه روجیرا، جِنوبیَه وا راست آبَه، و اَ روجی سَوسَرا شهرِ پوتیولیرا آرَستیمون.

¹⁴ اَ جِگاکا چَن گِلَه برا اونکا پَیدا کَردِمون کن اَمَشون صَلا ژَ و ایی هَفتَه اَوونَّه مَندیمون. آخیر بَسَر شهر رومیرا آرَستیمون.

¹⁵ وقتی اَجِگا برا اِن دَرَستَشون بَه کن اَمه راکامونَه، تا آپیوسی بازاریرا و آوادی ایرا کن بَی ’سه میخونه‘ اَواجین، چَمَه ایستقبال آمین. پولوس چَوون ویندِ خونِه خدا شِکر کَردِش و چَی دل زبق گَتِش.

¹⁶ وَقتی رومیرا آرَستیمون، پولوسی ایجازَ آداشونَه ایلَه مُحافِیظَه سَربازینَه اِشتَن کَکا بومونِه.

پولوس رومی دلَکا

¹⁷ سه روجی بَه دوملَه، پولوس یَهودی یالون خِلِه کَردِشَه. وَقتی جَم آبین، اَیِنِش واتَه: «برا اِن، با اِمکن اَز اِشتَن قام یا چَمَه بابااون رَسمون زِرَ بَرا کاری کَردَم نِبَه، بَمن اورشَلیمیکا ویلاخِنیشونَه و رومیون بال آداشون.

¹⁸ اَیِن بَمنکا باز خواس کَردِشون و چون بَمنکا هیچ جورمیی پَیدا نِکَردِشون کن چمن سزا مَردِ ببو، اَپیشون بَه بَمن آزاد آکَن.

¹⁹ ولی وَقتی یَهودییِن ایتِراض کَردِشون، ناچار مَندیم ایمپراطوریکا داد خواهی بِکَم، اَلبَت نِه اِمکن اِشتَن قامیکا شَکایَت کَردَم ببو.

²⁰ اِمی خاطِرکن اَپیم بَه شِمهَ بِوینِم و شِمَنَه گَف بِژَنِم، چون قام یهودی اَ اُمیدی خونِه یَه کن بَمن اِم زِنجِلینَه دَبَستَشونَه.»

²¹ اَیِن پولوسیشون واتَه: «اَمه هیچ نامَه ایی اِشتِه خونِه یَهودیَه کا ویگَتَمون نیی، هیچ کِرَم برا اِنیکا کن اَ جِگاکا آمَه اینَه، بدَ خبری اِشتِه خونِه وَردَشون نی.

²² ولی بَپیمون اِشتِه نَظرون دَرَسَم، چون بَموستیمونَه کن مَردوم هَرجِگا اییکا اِم فِرقَه زِرَبَرا گَف بَژَن.»

²³ پس روجی تَیین کَردِشون و وِرَ آدَمی چَی مَندَ جِگارا آمین تا بَی بوینن. پولوس شَوانَه روج، خدا پادیشایی خونه چَوونرا شاهیدی داشَه. اَ تَقلاش کَردَ موسی توراتینَه و پَیغَمبَرون نوشتَه اونَّه، اَوون قانع بکَرِ که عیسی قِبول بِکن.

²⁴ بَعضیِن چَی گَفون قِبول کَردِشون، اَمّا دییَرَ کَسِن ایمان نِوَردِشونَه.

²⁵ پس هَه حالیکا کن یَندِنَه گَه بَه گَه اَدَرینَه، اَ جِگاکا شین. ولی نار تَر از اِمکن اَ جِگاکا بِشون، پولوس اِشتَن آخِرین گَفی ژِشَه و واتِش: «خدا موقدسَه روح چَدَ دِرِست شِمَه بابااونَّه گَف ژِشَه، اَموقه کن ِاشعَیایِه پَیغمبَری واسیطنَه واتِش:

²⁶ «‌”اِم قامی وَر بش و بِواج، «اِشتَن گوشینَه دَنَّرَست، اَمّا هَرگز نینَّفَهمست؛ اِشتَن چَمونَّه بَویندیرون، اَمّا هَرگز سَر آنِه گِنَه.»

²⁷ اِمی خونِه کن اِم قامی دِل، سَخت آبَیه، شِمَه گوشِن سنگین آبَیه، و اِشتَن چَمون دَبَستَشونَه، نِکَرِ اِشتَن چَمونَّه بِوینِن، و اِشتَن گوشونَّه دَرَسِن، و اِشتَن دِلیکا بِفَهمِن وآگَردِن و اَز اَوون شفا بِدَرِم.“

²⁸ «پس بِزنَه کن، خدا نیجات، غَیرِ یَهودیون وَر رَونَه آبَه یَه و اَیِن گوش بَکَنَه!»

²⁹ پولوسی اِم گَفی ژِ بَه دوملَه، یَهودیِن هَتَه کن یندِنَه بَرک گَفه ژِنَه اَکَرینَه اَ جِگاکا بِرِن شین.

³⁰ پولوس دِ سال اِشتَن ایجارَ کَکا مَندَ و هَر کَم چَی وَر آی، قِبول اَکَریَه.

³¹ پولوس خدا پادیشاهی اِییلام اَکَریَه و جورئَتینَه بی اِم کن کَسی چَی ناری بیگِرِ، خداوند، عیسای مَسیح خونِه آموج اَدَریَه.