رَسولون اَعمال 27 - کتاب مقدس به زبان تالشي - گویش مرکزی

پولوس، رومی را بَشی

¹ وَقتی اَپیشون بَه کن اَمه دَیرا راه نَه ایتالیا را بِشَم، پولوس و بَعضی دیَرَ زیندانیون ایلَه افسَری یولیوس نوم تحویل داشون. یولیوس، رومی ایمپراطوری گوردانی کا بَه.

² پس کَشتی ایکا کن شهر اَدرامیتینوسیکا آمَه بَه و وِلَته آسیا کا بَندَرونرا اَشیَه، دَنِشتیمون و رونَه بیمون. آریستاخوسِ مَقدونی نی، کن تَسالونیکی آدَمونکا بَه، اَمَنَه دَرِ بَه.

³ اَ روجی سَوسَه شهر صِیدونیرا آرَستیمون و یولیوس پولوسی لُطف کَردِش، و ایجازَ آداشَه اِشتَن رَفِقون وَر بِشو تا چَی نیازون چَیرا ویگِرِن.

⁴ اَ جِگاکا هَنی دَیرا راه نَه رَونَه بیمون ولی برعَسکَه وا خونِه، مجبور آبیمون قِپرِسی اَطَرَفیکا کن برعَسکَه وا نِبَه، بشَم.

⁵ کیلیکیَه و پامفیلیَه بَندَرونکا دَیوَردِ بَه دوملَه، میرا بَندَریکا، کن لیکیَه منطقَکا بَه، ویرمیمون.

⁶ اَ جِگاکا رومیَه اَفسر، کَشتیی پَیدا کَردِش کن اِسکَندَریَکا ایتالیا را اَشیَه، و اَمَش چَی سَریکا دَنِشامونیشَه.

⁷ چَن روجی یَواشَلِه نار شیمون و سَختینَه کنیدوسیرا آرَستیمون. اِمی خونِه کن برعَسکَه وا بَه مجبور آبیمون اِشتَن مسیری عَوَض آکرَم، و کرتی جزیرَ طَفیرا کن وا نِبَه بشَم، و تا شهرِ سالمونی ناریرا، نار شیمون.

⁸ چَتین دَیرا کَناری وَریکا دَیوَردیمون و جِگایی ایرا کن بَی ’قشنگَ بندَرِن‘ اَواجینَه، آرَستیمون کن شهرِ لاسائیَه کا نِزِک بَه.

⁹ اِمی خونه کن وِرَ زَمانی هیچ برشَه بَه، ایسَه دَیرا نَه سَفر کَردِ خطر ناک بَه، و اَ روجِنی کن روجَه اَگِرینَه دَیوردَ به، اِمی خاطِر، پولوس اَیِنِش نَصیحَت کردَ و واتِش:

¹⁰ «سَروَرِن، بَشامَه ویندِ کن پُر خَطَرَ سَفری بَداشتیمون و وِرَ ضَرَری نِه تاکَه کَشتی و چَی باری بَژَی، بَلکَم چَمَه جان نی خَطَریکارَ.»

¹¹ اَمّا رومیَه افسر، کَشتی ناخدا و صاحیبی ویشتَر گوش اَکَریَه تا پولوسی گَفون.

¹² چون اَ بَندَر زِمِستونی گِذِرامونیِه را چاک نِبَه، ویشتَریین تصمیم گَتِشون کن اِم سَفَری ایدامَه بِدَرَم، اِم اُمیدینَه کن فینیکسی بَندَریرا آرَسَم و زِمِستونی اَجِگاکا بِومونم. اِم بَندَر کَرتیکا و جنوب غَربی طَرَف بَه.

دَیرا کولَک

¹³ وَقتی جِنوبیَه وا یَواشَلِه راست آبَه، گَمون اَکَرینَه کن اِشتَن مقصَدی آرَستین؛ پس لَنگَری پِراکِنیشون و کَرتی راستَه، دَیرا کَناری نِزِک، اِشتَن راه ایدامَه آداشون.

¹⁴ ولی چیی دَنِه کَشیستَه کن تِندَ وایی، کن بَی شُمالِه شَرقیَه وا اَواجین، جَزیرَ طَرَفیکا چَمَه سَمت آمَه.

¹⁵ کَشتی کولَکیکا ویلاخیستَه و نِشاستِش، وا خَلاف نار بِشو؛ اِمی خاطِر، بَشتَن وا دَست آدامون و وا نَه شیمون.

¹⁶ گِچَه جَزیرَه ایی کن کُدا نوم داری پِشتیکا پناه گَتمون و خَیلی چَتین بَشتِنمون گِچَه لاتیکَه ایی کن کَشتی پِشتیکا بَه، آراستِنِستِمون.

¹⁷ وقتی ملوانن لاتکَه کَشتی عَرشَه سَر وَردِشون، لافِندونَّه، کَشتی دووری محکم دَبَستِشون تا مَویرَنجنی، وکَشتی سیرتیسی شِنزاریکا نشتِه تَرسیرا، لَنگَرون بِنیرا آداشون و کشتی وا مَسیرکا آهَشتِشون.

¹⁸ اِمی خونِه کن کولَک سَنگینَه ضَربَه اِنی اَمه اَژَنیَه، سَو سَرا مَجبور بینَه کَشتی باری دَیرا کا ویکَرِن.

¹⁹ سِوومَه روجیکا، اِشتَن بالینَه کَشتی اَساسون دَیرا کا ویکَردِشون.

²⁰ روجِن هِنتَه اَگذِریَه و اَمه آختاو و اِستَرَ اون رَنگی نَوینیمون و کولَک نی نِه ویکِشته، اَدَ کن اَمه گِرد، وازنِستِرا اُمیدی نِداریمون.

²¹ چون خَیلی وقت بَه غذا هَردشون نِبه، پولوس چَوون دِلَکا پامَندَ و واتِش: «اَی مِردِن، شِمَه پی چمن گَفون قِبول اَکَریرون و کَرتیکا نَشیرون تا اِم هَمَه و ضَرَر نِوینَه.

²² ایسَه نی شِمَه تشویق بَکمه دلی زبق غَم برَ، اِمی خونِه کن بَشِمَه چیی ایی نیَب؛ فقط کَشتی نیفیت آرَبن.

²³ چون ایزِرَ شَویرا خدا ایلَه فرشتَه کن اَز چَی شِنیمَه و بَی خیدمَت بَکَم، چمن وَریکا مَندَ

²⁴ و واتِش: ”پولوس مَتَرس. تِه پی مُحاکیمَرا، ایمپراطوری ناریکا حاضیر آبی، یَقین بزون کن خدا گِردِ اِشتِه هَمسَفرون جانی، بَتِه بَخشِستَشَه.“

²⁵ پس اَی مِردِن، دِلی زِبق غَم بَرَ، چون خدا کا ایمان دارِم کن هَتَه کن بَمن واتَشَه، یقین هَتَه آرَبن.

²⁶ ولی چَمَه کَشتی پی جَزیرَه ایکا گیلی سَر بِنِشِه.»

²⁷ چاردَ هومین شَویکا، هَنوزَنی وا اَمَش آدریاتیکی دَیرا کا اِم وَر اَ وَر اَبَریَه کن نیمَه شَوَی نِزِک، مَلَوانِن گَمون اَکَرینَه خِشکی نِزِک بَبین.

²⁸ پس آوی دول گیری اَندازَ ژِشون و فَهمِستِشون چِل مِترَ. تَلَکَه ایی به دوملَه، ایکَرَ دییَر آوی دول گیری اَندازَ گَتِشون و ویندِشون سی مترَ.

²⁹ و اِمی خونِه کن اَتَرسینَه کازَ مَغاری بِگِنَم، چار گِلَه لنگر کَشتی پِشتیکا ویداشتِشون، و دِوا اَکَرینَه زو روج آبو.

³⁰ مَلَوانِن کن اَپیشون بَه کَشتیکا بیوریجِن، اِم رِقینَه کن اَپیشونَه کَشتی ناریکا چَن گِلَه لَنگر دَیراکا ویدارِن، اَ گِچه لاتیکَه دَریاکا ویرَفندِشون.

³¹ پولوس افسَر و سَربازون واتِشَه: «اَکَم اِم مِردِن کَشتیکا نِمونِن، نینَّشا بَروَشتِه.»

³² پس سَربازِن لافِندونی کن لاتیکه غَم هَرینَه آبیردِشون و لاتکَشون وَر آدوعَه.

³³ تَلَکَه ایی مَندَ بَه آختاو پِرا، پولوس گِردیش تشویق کردَ چیی ایی بَرِن، و واتِش: «اُمروج چاردَ روجُه کن اینتِظاریکاینَه، و چیی ایی نَردِرون و بی غَذا مَندَرون.

³⁴ پس خاشتو خازِمَه غَذایی بَرَ، چون بَشِمَه قِوَت دَرِ. اِمی خونه کن شِمَه هیچ کِرَمی کَلَّه کا، ایی تا مو کَم آنیَبن.»

³⁵ وَقتی پولوس اِمِش واتَه، نونی پِگَتِش گِردی ناریکا خدا شِکر کَردِش و نونی پِزارنِستِش، و هَردِشون.

³⁶ گِرد دلگرم آبین و غذا هَردِشون.

³⁷ کَشتیکا، اَمه گِرد دِویستو هَفتادو شَش نَفَر بیمون.

³⁸ وقتی اَیِن غَذاشون هردَ و سیر آبین، قَلَه بَقیَه دَیراکا ویکَردِشون و کَشتیشون سبِک آکردَ.

³⁹ وقتی روج آبَه، خِشکی نِه آزنِستِشون، اَمّا گِچَه خَلیجی کن چَی ساحل فوشینَه پتلمَه بَه ویندِشون. پس اَپیشون بَه کن اَگَم ببو کَشتی اَجِگاکا گیلی سَر بِنشامونِن.

⁴⁰ پس لَنگَرون لافِندی آبیردِشون و اوون دَیرا دِلَرا وَر آداشون و لافِندِنی کن سوکانی غَم هَرینَه آج آکَردِشون. چَی بَه دوملَه، کَشتی ناری بادبانون، وا مَسیری طَرَف پِرا کِنیشونَه و ساحِلی طَرَف شین.

⁴¹ ولی کشتی، آوی بِنی ایلَه کولَه اون گِنَه و گیلی سَر نِشتَه. کَشتی نار دَمَندَ و بی حَرَکَت مَندَ، اَمّا کَشتی پِشت موجون ضَربَه خونِه ویرَنجَنیستَه.

⁴² سربازِن اَپیشون به زیندانیون بِکِشِن تا نِکَرِ کَسی سیناوینَه بَروَزِ.

⁴³ ولی رومیَه افسر کن اَپیش بَه پولوسی جانی بَروازونِه، چَوون ناری گَتِشَه، و فِرمون آداشَه اَوَل اَیِنی کن بَشان سیناو کَردِ، اِشتَن دَیرا دِلَه بَرَفَنِن و خِشکیرا آرَسونِن.

⁴⁴ بَقیَه نی پی اِشتَن اَلوارون یا کَشتی پِسَه اون سَر، بَشتَن خِشکیرا آرَسونِن. اِنتَرَکِه گِرد سَقه جان خِشکیرا آرَستینَه.