رَسولون اَعمال 25 - کتاب مقدس به زبان تالشي - گویش مرکزیفِستوسی ناریکا پولوسی موحاکیمَه کردِ 1 سه روجی فِستوسی شِه اِشتَن وِلَتییرا بَه دِوملَه، قِیصَریَکا شهر اورشَلیمیرا شَه. 2 اَ جِگاکا سَران کاهِنِن و قامِه یَهودی یالِن چَی ناریکا حاضیر آبین و اِشتَن شکَیاتون پولوسی زِرِبرا واتِشون. 3 اَیِن ایصرارینَه فِستوسیکا خواستِشون چَوون سَر مینَّت بِنَرِ، پولوسی اورشَلیمیرا بَینِه، اِمی خونه کن اَیِن راه دِلَکا پولوسی کِشتِه خونه جیخِتَه بین. 4 ولی فِستوس فرماندار جَوابیکا واتِش: «پولوس قِصَریکا زیندانیکارَ و بَپیمَه خَیلی زو اَجِگارا بِشوم. 5 فِستوس واتِش: شمَه یالَه آدَمِن، بَشانَه بَمِنَه بان تا اَگَم اِم مِرد خَطاییش کردَ ببو، اِشتَن شَکایَتی چَی زِرَبَرا، بِواجِه.» 6 فِستوس هَشت تا دَ روج بَه دوملَه کن اَوونَّه دَرِ بَه، قِیصَریَه را ویگَردِستَه، و دوملَه روجیکا، محکمَش گتَه و فِرمون آداشَه پولوسی بوعَرِن. 7 وَقتی کن پولوس دِلَه دَرمَه، یَهودییِنی کن اورشَلیمیکا آمَه بینَه، چَی دوور پا مَندین و بَرکَه ایتِهامِنی بَی ژِشون، ولی اَ ایتهامون ثابیت کردِ نِشاستِشون. 8 چَی بَه دوملَه، پولوس بَشتَن دیفا کَردِکا واتِش: «اَز نِه یهودی شریعَتی زِرَبَرا و نِه معبَدی زِرَبَرا کاریم کردَیه و نِه ایمپراطوری زِرَبَرا.» 9 ولی فِستوس فرماندار کن اَپیش بَه مینّتی یَهودیون سَردِرِ بِنَرِ، پولوسیش واته: «اَپیرَ اورشَلیمیرا بِشی تا اَجِگاکا اِم ایتِهامون خونِه چمن حِضوریکا مُحاکیمَه بِبی؟» 10 پولوس جواب آداشَه: «هِم ایسَه ایمپراطوری محکَمَکا پا مَندیمَه کن پی چَی دِلَکا مُحاکیمَه بِبوم. شِمَه اِشتَن چاک بَموستیرون اَز هیچ خطایی یَهودیون سَردِرِ کَردَم نی. 11 ایسَه اَگَم خَطایی کَردَمَه یا کاریم کَردَیَه کن چمن لَیاقَت مَردِ یَه، مَردِ کا نِمَه تَرسِست. ولی اَگَم ایتِهامِنی کن اِمِن بَمن بَژَن، دَدارین، هیچ کَس نیَشا بَمن چَوون بال آدَرِ. مِن بَپییَه اِم مسئَلَه ایمپراطوری محکمَه دلَکا بَی رسیدَگی ببو.» 12 فِستوس، اِشتَن شورا نَه گَفَه ژَنِه کَردِ بَه دوملَه واتش: «بَپیشَه اِشتِه مسئَلَه ایمپراطوری مَحکَمَه کا رسیدَگی ببو؟ پس ایمپراطوری وَر بَشیشَه!» پولوس آگْریپاسی ناریکا 13 چَن روجی دَیوَردِ بَه دوملَه، آگریپاس پادیشا و بِرنیکی، فِستوسی خَش آمِه واتِرا، قِیصَریَه را آمین. 14 و اِمی خونِه کن چَن روجی اَجِگاکا اَمونینَه، فِستوس پولوسی قَضیَه پادیشارا جیگیر کردِشه و واتِش: «اِم جِگاکا مِردی هِستَه کن فیلیکس بَی زیندانیکاش غَم هَردَیَه. 15 وقتی اورشَلیمیرا شیمَه، سَران کاهِنِن و یَهودی ایسبیَه ریشِن ایتِهامِنی بَی ژِشونَه و اَپیشون بَه اَی مَحکوم بِکَرِم. 16 «اَوون واتِمَه رومیون را رَسم نیَه نار تر از اِم کن اِشتَن شاکیونَّه سَراسَر ببو و بِشا ایتهامون نَ کا بَشتَنکا دیفا بکَرِ، بَی تسلیم بکرَم. 17 پس وَقتی کن اَیِن اِم جِگارا آمین، دوملَه دَنِفَندِمَه، بَسکم سَو سَرا، محکمَه گَتِمه و فِرمون آدامَه پولوسی چمن وَر بوعَن. 18 وَقتی کن پولوسی شاکییِن گَف ژِرا پِبینَه، بَی، هیچ کِرَم ایتِهامِنی کن اَز اینتظار داریم، مُتهَم نِکَردِشون. 19 بَلکَم چَنگِلَه موضوع چَوون دینی خونِه و عیسی نومی کن مَردَیَه و پولوس ایدعا بَکَی زِندَیَه، جَرّو بَحث کَردِشون. 20 اَز کن نَزنیمَه چِنتَرَ پی اِنتَرَ مَسئَلَه اون رِسیدِگی کَردِ، پولوسیکا دَپَرسِستیم بَپیشَه اورشَلیمیرا بِشو تا اَجِگاکا اِم ایتهامون خونِه مُحاکیمَه ببو. 21 ولی اِمی خونِه کن پولوس اَپیش بَه زیندانی دلَکا بومونِه و چَی مسئَلَه ایمپراطوری مَحکمَکا رسیدَگیی ببو، فِرمون آدامَه تا روجی کن بَشام اَی ایمپراطوری وَر بَینِم، بَی غَم بَرِن.» 22 چَی به دوملَه آگْریپاس فِستوسیش واتَه: «بَپیمَه اَز اِشتَن چَی گَفون دَرَسِم.» فِستوس واتِش: «سَو سَه دَشَرَست.» 23 پس دوملَه روجیرا، آگرِیپاس و برنیکی، یالَه دَب دبَه و کَب کَبَه اینَه آمین ونیظامیَه فرمانداونَّه و شَهری سَر شِناسَه مِردونَّه مَحکَمه سالونیرا دِلَه دَرمین. فِستوسی فِرمونینَه پولوسیشون وَردَ. 24 فِستوس واتِش: «اَی آگْریپاسِ پادیشا، و اَی گِردِ کَسِنی کن اِم جِگاکا مَندیرون! گِردِ یَهودی آدَمِن، چِه اورشَلیمیکا و چِه اِم جِگاکا، اِم مِردیکا کن بَویندیرون، چمن وَر شَکایَت کَردَشون و لَسَّه ژِشونَه کن نِبایَد زِندَ بِومونِه. 25 ولی اَز فَهمِستِمَه کن اَ کاریش کَردَ نیَه کن چَی جَزا مَردِ ببو. ولی اِمی خونِه کن اَ اَپیش بَه ایمپراطوری محکَمَرا بشو، تَصمیم گَتِمَه اَی رومیرا بَینِم. 26 ولی چَی خونه مِرا چیی ایی نییَه کن حَتمی ببو، تا ایمپراطوریرا بنوِسم. اِمی خاطر اَی شِمَه گِردی حِضوری وَر بِخصوص شِمَه حِضور، اَی آگریپاس پادیشا، وَردَمَه تا بَسکَم بازخواس کَردِ بَه دوملَه، چیی ایی نِوِشتِه را پَیدا بِکَم. 27 اِمی خونِه کن عَقلینَه جور نیام، کن زیندانیی بی اِم کن چَی ایتِهامون بِنوِسم، بَینِم.» |
@ 2024 Korpu Company