رَسولون اَعمال 24 - کتاب مقدس به زبان تالشي - گویش مرکزی

فِلیکْسی حِضوریکا پولوسی موحاکیمه کردِ

¹ پِنج روجی بَه دوملَه، یالَه کاهِن حَنانیا، چَن گِلَه ایسبیَه ریشونَّه و وَکیلی تِرتولُس نوم، شهر قِیصَریَه را آمینَه. اَیِن اِشتَن شَکایَتی پولوسی زِرَبَرا فرمانداری وَر بَردِشون.

² وقتی کن فرماندار پولوسی خِلِه کَردِشَه، تِرتولُس، پولوسیش موتَّهم کردَ و واتش: «عالیجناب فِلیکس، چون خَیلی وَقتَه کن شِمَه سا بنیکا صُلح و آرمِشی کامون و شِمَه دور اَندیشی اِم قامی وَضعی چاک آبِه باعیثه،

³ اِشتَن وَظیفَه بَموستیم هَر جِگا وهَرزَمانیکا، اِشتِه قدر دان بِبَم.

⁴ اَمّا اِمی خونِه کن بیمی کا ویشتَر شِمَه وَقتی نِگِرم، خاشتو خازِمونَه اَمه لُطف بِکَری، تَلَکه ایی چَمَه گَفون گوش آدَری.

⁵ «چَمَرا ثابیت بَیَه کن اِم مِرد، فیتنَه گَرَ آدَمیَه و دِنیا اِم سَر اَسَری یَهودیون دِلَکا شورش راست آرَکَرد. اِم آدَم فِرقَه اِ ناصِری سَرکَردَ اونکارَ.

⁶ و حتی اَ، تَقلا دَرِ بَه مَعبدی بی حُرمَت آکَرِ؛ اِمی خاطِر بَی ویلاخِنیمونَه، و اَپیمون بَه اَی اِشتَن شَریعَتی واتَنَه مُحاکیمَه بِکَرم

⁷ اَمّا لیسیاسِ فرماندَ آمَه و بَی زورینَه چَمه بالیکا بَراکِنیشَه،

⁸ و چَی شاکییِنِش فرمون داشَه تا شِمَه حِضور بان. ایسَه اَگَم شِمَه اِشتَن اَیکا بازخواس بکَرَ، اَچیی کن اَمه بَی مِتَهَم کَردَمونَه حَقیقَت، شِمَرا دیار آرَبن.»

⁹ یَهودییِن نی یَک صَدا گِرد اِم چییِنِشون تایید کَردَ.

¹⁰ وَقتی فرماندار پولوسی ایشا کَردِشَه تا گَف بِژَنِه، اَ اِنتَرَ جواب آداشَه: «جناب فرماندار، بَموستیم کن خَیلی سالَه کن شمَه اِم قامی سَر دیوون بَکَشه؛ پس خَشینَه، بَشتَنکا دیفا بَکَمه.

¹¹ شِمَه اِشتَن بَشارون تحقیق کَردِ و سَر آگِنَه کن از زَمانی کن اَز پرَستِشیرا اورشَلیمیرا شیمَه، دانزَ روج ویشتَر دَیوَردَ نیَه،

¹² واِم مودَتیکا، بَمن ویندَشون نیَه کن اَز کَسینَه گَفه ژِنَه بِکَم یا اِمکن عیبادَتگا اونکا یا شَهریکا مردومی دلَکا خَرا خِلِه راست آکَم.

¹³ اَیِن نینَّشا ایتهامِنی کن بَمن بَژَن ثابیت بِکَرِن.

¹⁴ اَمّا شِمَه وَر ایتراف بَکَم طَریقَتی واتنَه کن اَیِن بَی ایلَه فرقَه بَموستین، اِشتَن بابا اون خدا، پرستِش بَکَم و هَر چیی ایی کن توراتیکا و پَیغَمبَرون کیتاویکا نِوِشتَه آبَه یَه ایتقاد دارِم.

¹⁵ اَز نی چَوون شیوار، خدا را اُمید دارِم و ایتقاد دارِم چاکِن و بَدونرا قَیامَتَه روجی هِستَه، دِرِست اِم آدَمون شیوار کن بَی قِبول بَداشتین.

¹⁶ اِمی خاطِر، اوزون تقلا بَکمَه تا خدا و مردومی وَریکا پاجا اَ ووژدانینَه زندَگی بکَرِم.

¹⁷ «ایسَه، اَز چن سالی بَه دوملَه، اورشَلیمیرا شیمَه تا اِشتَن قامی دَس دَریسونرا صَدقَه بِبَم و قِربونی اِنی بدَرِم.

¹⁸ هَتَه کن اِمی اَنجوم اَدَریمَه، بَمن اَموقه کن معبدیکا پاجا آبِه رسمی اَنجوم دوعِه بَه، ویندِشون. نِه جَمعیتی بَه و نِه خَرا خِلِه ایی.

¹⁹ ولی اَ جِگاکا چَن گِلَه یَهودی آسیا وِلَتیکا بینَه کن پی اِم جِگا شِمَه نَکا بِبین تا اَگَم چمن زِرَبَرا شَکایَتی دارین بِواجین.

²⁰ و یا بَرزِن اِمِن کن اِم جِگاکا مَندینَه، بِواجِن وَقتی شورا حِضوریکا پامَند بیم، چِه جُرمی بَمنکا پَیدا کَردِشون،

²¹ جز اِمکن چَوون دِلَکا لَسَّه آدامَه: ”مَردَاون زندَ آبِه خونِه یَه کن اومروج شِمَه حِضوریکا موحاکیمَه بَبیم.“‌»

²² ولی فِلیکْس فرماندار کن خَیلی چاک، طَریقَتی اَزنیَه، موحاکیمَه دییَرَوقتیرا دَرَفَندِشَه و واتِش: «وَقتی لیسیاسِ فَرماندَ با، شِمَه مَسئَلَه را تصمیم بَگَتیم.»

²³ چَی بَه دوملَه اَ اَفسَری کن مَسئول بَه فِرمون آداشَه تا پولوسی تحت نَظَر بیگِرن ولی هَتَه نی تلَکَه ایی آزادی بَی بِدَرِن و چَی رَفِقون کن چَی نیازون بَرطَرف کردِ را بومَنَه، ناری مَگِرن.

²⁴ چَن روجی به دوملَه، فِلیکس اِشتَن ژِن دِروسیلا نَه کن یَهودی بَه، آمَه و پولوسی دوملَه عَندِشَه. اَ، پولوسی گَفون کن عیسی مَسیح ایمان داشتِه خونِه بَه گوش آداشَه.

²⁵ اَ موقه کن پولوس، صالِح بِه کا، پَرهیزگاری و آیَندَ دیوون کَردِ خونِه دمندَ گَف ژِ، فِلیکس تَتَه وَسَّه دگِنَه و واتِش: «فیعلا وَسَّه! بَشاش شِه. دییَرَ فِرصَتیکا هَنی بَتِه خِلِه بَکَمَه.»

²⁶ با اِم حال امیدوار بَه پولوس رشوه‌ای بَی بدَرِ. اِمی خاطِر چَن کَرَ بَی خِلِه اَکَریَه و بَینَه گَف اَژَنیَه.

²⁷ دِ سالی دَیوَردِ به دوملَه، پورکیوس فِستوس، فِلیکسی جانِشین آبَه. اَمّا فِلیکس، اِمی خاطِر کن یَهودیون سَر مینَّت بِنَرِ، هَتَه پولوسی زندانیکا غَم هَردِش.