رَسولون اَعمال 23 - کتاب مقدس به زبان تالشي - گویش مرکزی1 پولوس شورا آدَمون سَر چَم دَشتِشَه و واتِش: «برا اِن، اَز تا اُمروج پاجا اَ ووژدانینَه خدا حِضوریکا زندَگی کَردَمَه.» 2 وَقتی اِمی واتِش، حَنانیا، یالَ کاهِن، بِه اَیِنی کن پولوسی وَر پا مَند بین، فِرمون آداشَه تا چَی گَوی دِلَه بِژَنِن. 3 چَی به دومله پولوس بَی واتِش: «خدا بَتِه بَژَیَه، اَی ایسبی آبَه دیوار! تِه اَ تختی سَر نِشتیشَه تا شَریعَتی واتَنَه بَمن مُحاکیمَه بِکَری، اَمّا شَریعَتی بَر عَسک، چمن ژِ را فِرمون بَداشَه؟» 4 کَسِنی کن پولوسی وَریکا پا مَند بینَه، واتِشون: «تِه، خدا یالَه کاهِنی ایهانَت بَکَشَه؟» 5 پولوس واتِش: «اَی برا اِن، اَز نَزنیمَه یالَه کاهِینه؛ اِمی خونه کن توراتیکا نِوِشتَه آبَه یَه: اِشتَن قامی رهبری بَد مَواج. “ 6 اَموقه پولوس کن اَزنیَه بَعضی اَوونکا صَدوقی فرقه عالیمونکا و بَعضی نی فَریسی فرقَه عالیمونکا اینَه، لَسَّنه شورا کا واتِش: «اَی برا اِن، اَز فَریسی و فَریسی زادَ ایمَه، و اِمی خونه کن مَردَ اون زندَ آبِه کا اومید دارِم، کاینَه بَمن موحاکیمَه کَردِ. » 7 وَقتی پولوس اِمی واتِش، فَریسیِن و صَدوقیون دِلَکا جَرو بَحث بَه و جَماعَت دِ دَستَه آبین، 8 اِمی خونه کن صَدوقییِن اَواجینِه نِه مردَاون زندَ آبِه وجود دارِ نِه فرشَه و نِه روح، ولی فریسیِن گِردِ اِمونکا ایتقاد بَداشتین. 9 یالَه خَرا خِلِه ایی راست آبَه! بَعضی توراتی موعَلیمِ کن فَریسی بینَه، راست آبین و ایتِراضینَه واتِشون: «خَطایی اِم مِردیکا نِمونَه ویند. کِرَم جِگاکا مَعلومَه کن فرشتَه یا روحی بَینَه گَف ژَش مَبو.» 10 ژِژِ اَدَ وِر آبَه کن فَرماندَ تَرسِستَه نِکَرِ پولوسی پِزِرِن آزِرِن بِکَن. پس سَربازون فِرمون آداشَه بِنیرا بِشون و پولوسی چَوون چینگیکا بِرِن بوعَن، و قَلَه دِلَرا بِبَن. 11 هَه شَویکا، خداوند پولوسی وَریکا پا مَندَ و واتِش: «دِلی زِبق غَم بَه! هَتَه کن اورشَلیمیکا مِرا شاهیدی آدارَ، رومیکا نی پی مِرا شَاهیدی بِدَری.» پولوسی کِشتِه توطِعَه 12 دوملَه روجی صِبیرا، یَهودیِن یَندِنَه توطِعَه کَردِشون، قَسَم هَردِشون تا پولوسی مَکِشِن، چیی ایی نَرِن و نِنجِن. 13 چِل نَفَریکا ویشتَر اِم توطِعَه کا دَست دارین. 14 اَیِن سَران کاهِنِن و ایسبیَه ریشون وَر شینَه و واتِشون: «امَه قَسَم هَردَمونَه کن تا پولوسی مَکِشَم، چیی نَرَم. 15 پس ایسَه شِمَه و شورا آدَمِن، رومیَه فَرماندَکا درخواست بکَرَ اَی شِمَه وَر بوعَرِ، اِم رِقی نَه کن اَپیرون دَقیق تَر چَی خونِه تَحقیق بکَرَ. اَمه آمادَ ایمون نار تَر از اِمکن اِم جِگارا آرَسِه اَی بِکِشَم.» 16 پولوسی خوئَرَ زا اِم توطِعه کا سَرآگِنَه و قَلَه را شَه، پولوسیش واته. 17 پولوس ایلَه اَفسَرونکا خِلِه کَردِشَه و واتِش: «اِم جَوانی فَرماندَ وَر بِبَه، اِمی خونِه کن بَپیشَه چیی ایی بَی بواجَه» 18 پس افسر اَی فَرماندَ وَر بَردَ و بَی واتِش: «پولوس کن زیندانیَه بَمن خِلِه کَردِشَه و بَمنکا اَپیش بَه اِم جَوانی شِمَه وَر بوعَرم؛ بَپیشَه چیی بَتِه بِواجِه. » 19 فرمانده جَوانَه مِردی بالی گَتِشَه، بَی قِرَقی را دَراکِنیشَه و دَپَرسِستَه: «چِه چیی اَپیرَ بَمن بِواجی؟» 20 پولوسی خوئَرَزا بَش واتَه: «ییَهودیِن همدَست آبینه بَشِمکا بِخوان کن سَوسَه پولوسی شورا وَر بوعَری، اِم رِقینَه کن اَپیشون دَقیقتَر چَی خونِه تحقیق بِکَرِن. 21 ولی مرزن بَتِه اِم کاریرا قانِع بکَرِن، اِمی خونِه کن ویشتَر از چِل نَفَر چَیرا جیخِتَه اینَه. اَیِن قَسَم هَردَشونه کن تا بَی مَکِشِن، چیی نَرِن و نِنجِن. ایسَه آمادَ اینَه، و فقط مُنتَظیرینَه شِمَه، چَوون دَرخواستی قِبول بِکَری.» 22 پس فَرماندَ، جَوانی عَندِشَه و چَیرا قَدغَن کَردِش، واتِش: «اَحَدی را مَواج کن اِم خَبَری بَمن آدوعَرَ.» پولوسی قیصریه را بَبَنه 23 پس اَ، دِ گِلَه اِشتَن اَفسَرون کا خِلِه کَردِش و اَوون واتِش: «دِوییست گِلَه پیادَ سَرباز، هفتاد گِلَه سَوارَ سرباز و دِویست گِلَه نِیزَدار آمادَ آکَرَ و تا شَنا ساعَت نَه را قِیصَریَه را بِشون. 24 پولوسیرا نی اَسبی آمادَ آکَرَ و بَی سَقَه جان فِلیکسِ فرمانداری تَحویل بدَرَ.» 25 نامَه ایی نی نِوِشتِش: 26 « کْلودیوس لیسیاسیکا به عالیجناب فِلیکْسِ فرماندار: سلام بر شمَه، 27 یَهودییِن اِم مِردی گَتِشون و اَپیشون بَه اَی بِکِشِن، ولی اَز و چمن سَربازِن شیمون، اَی بَروازِنیمون، اِمی خونِه کن دَرَستَمون بَه رومی شهروندَ. 28 چون اَپیمبَه سَر آگِنِم چِه خونِه بَی ایتهام بَژَنَه، اَی چَوون شورارا بَردِمَه. 29 سَر آگِنیمَه کن چَی ایتهام چَوون اِشتَن شَریعَتی مربوطَه و اَدَ جُرمی کَردَش نیَه کن چَی سِزا اِعدام یا زیندان ببو. 30 چَی بَه دومله وَقتی فَهمِستِم چَی زِرَبَرا توطِعَه کَردَشونَه، جَخت اَی شِمَه وَر عَندِمَه. چَی شاکیون نی دَستور آدامَه تا شَکایَتی کن اَیکا دارِن شِمَه وَر بو عَرِن.» 31 اِنتَرَکِه آبَه کن سَربازِن چَوون دستوری واتَنه، شَوانَه پولوسی اِشتَنَه تا آنیتیپاتریس بَردِشون. 32 سَو سَرا، پیادَ سربازِن قَلَه طَرَف ویگَردِستین و تاکَه سوارَ سربازِن پولوسیشون همراهی کردَ. 33 وَقتی کن سَوارَ سربازِن شهر قِیصَریَه را آرَستین، اَ نامَه فرمانداری تَحویل آداشون و پولوسی چَی وَر وَردِشون. 34 فرماندار نامه خَندِشَه و پولوسیکا دَپَرسِستَه کِرَم ایالَتی شِنَه. وقتی فَهمِستَه کیلیکیَه ولَتی شِنَه، 35 بَی واتِش: «وقتی اِشتِه شاکییِن اِم جِگارا آرَستین، اِشتِه گَفون گوش آمَکَرد.» پس فِرمون آداشَه تا پولوسی هیرودوسی کاخیکا بَی زیر نظر بیگِن. |
@ 2024 Korpu Company