رَسولون اَعمال 22 - کتاب مقدس به زبان تالشي - گویش مرکزی

¹ «اَی برا اِن و اَی دَدَاِن، دیفاعی کن اِشتَنکا دارِم، ایسَه بَشِمَه باتیم، گوش آکَرَ.»

² اَیِن وَقتی ویندِشون کن پولوس عِبرانیون زَبانینَه اَوون خِلِه بَکَی، ساکیت تَر آبین. اَموقه پولوس واتِش:

³ «اَز یَهودیَه مِردی هِستیم کن، تارسوسِه کیلیکیَه کا دِنیا دگِنستَه ایمه. ولی اِم شَهریکا یال آبَه ایم. اِشتَن بابا اون شَریعَتی کامیل، گامائیلی وَریکا آموج گَتِمَه و خِدارا غَیرَتمَندیم، هَتَه کن شِمَه گِرد اومروج غَیرَت دارَ.

⁴ اَز اِم ’طریقتی‘ پِیروُون تا مَردِ نِزِک اَیذَت آزار اَکَریمَه و اَوون چِه مِرد و چِه ژِنیکا ویلاخِنیم، و زیندانیکا دَرَفَنیم.

⁵ یالَه کاهِن و یَهودی شورا آدَمِن گِرد بَشانَه اِم موضوع خونه شاهیدی بدَن، اِمی خونه کن اَوونکا نامَه اِنی، برا اونیرا کن دَمِشقیکا اَمونینَه اَگِریمه، تا اَ جِگارا بشوم و اهل طریقتی ویلاخِنِم، و مُجازات کَردِرا اورشَلیمیرا بوعَم.

⁶ «ولی وَقتی راه دِلَکا دَمِشقی نَزِک آرَبیم، ناهاری موقِه، ایکَرَایی یالَه نوری کن آدَمی چَمی اَگِرییَه، آستامونیکا چمن دوور شپَق ژِشه.

⁷ اَز زَمینی سَر بَرگِنِستیم و سَسی دَرَرَسیمَه کن بَمن اَواجی: ”شائول! شائول! چیرا بَمن اَیذَت آزار بَکَشَه؟“

⁸ «دَپَرسِستیم: ”خداوندا، تِه کی ایشَه؟“ «جَواب داشه: ”از هَه عیسایِ ناصری ایمَه کن تِه بَی اَیذَت و آزار بَکشَه.“

⁹ اَیِنی کن بَمِنَه دَرِ بینَه نورِشون ویندَ، ولی بَمنَه گَف اَژَنی، سَسِشون دَنِرَستَه.

¹⁰ «واتِم: ”خِداوَندا: چِبکَرِم؟ “ «خداوند واتِش: ”پِب و دَمِشقیرا بش. اَ جِگاکا هَر چیی کن اِشتِه وظیفَه یَه، بَتِه واتِه بَبی.“

¹¹ چون اَز اَ نوری شَپَق ژِ خونِه، کور آبَه بیمَه و چمن هَمراهِن چمن بالی گَتِشونَه و دشمِشقیرا بَردِشون.

¹² «دَمِشقیکا، حَنانیا نومَه مِردی کن دیندار بَه و شَریعَتی کامیلا اَنجوم اَدَریَه اَمونییَه. اَ گِردِ یَهودیون دلَکا، خوش نام بَه.

¹³ حَنانیا چمن ویندِ را آمَه چمن وریکا پا مندَ و واتِش: ”شائول برا! بینا بِب! “ جَخت، چمن چَمِن سو آرمین و حَنانیام ویندَ.

¹⁴ «حنانیا واتِش: “چَمَه بابااون خدا بَتِه اینتخاب کَردَشونَه تا چَی اِیرادَ بِزنی و اَ صالِحه مِردی بِوینی و گَفِنی چَی گَویکا دَرَسی.

¹⁵ اِمی خونه کن تِه گِردِ آدَمون نَ کا، چَی شاهید بَبیشَه و اَ چیی ایی خونه کن ویندَرَ و درَستَرَ شاهیدی آشَدا.

¹⁶ ایسَه چِه چیی مُنتَظیریشَه؟ پِب و چَی نومی خِلِه بِکَ و غسل تعمید بیگِه، و اِشتِه گِناخونکا پاجا آب!“

¹⁷ «وَقتی اورشَلیمیرا ویگَردِستیم، مَعبَدیکا کایبیم دِوا کَردِ کن حالَت خَلسَکا ویشیمَه

¹⁸ و خداوندِم ویندَ کن اَواجیَه: “بِتاو و جخت اورشَلیمیکا بش، اِمی خونِه کن اَیِن اِشتِه شاهیدی کن چمن خونِه اَ، قِبول نینَّکَرد.

¹⁹ «مِن واتَه: “خداوندا، اَیِن بَموستین کن اَز عیبادَتگا بَه عیبادَتگا اَشیمَه و اَیِنی کن بَتِه ایمان دارینَه، زیندانیکا دَرَفَنیمَه و اَژَنیمَه.“

²⁰ و وقتی کن اِشتِه شاهید اِستیفانی خونی ویرَکَرین، اَز اَ جِگاکا پا مَند بیم، و چَوون کارینَه موافقت کردِم و و چَی اَکِشون، شِندِری غَم هَردِمَه.“

²¹ خداوند بَمِنِش واتَه: ”بش؛ چون اَز بَتِه دورَ جِگا اونرا، غَیر یَهودیون وَر رَونَه آمَکَرد.»

²² مردوم تا اِم جِگا پولوسی گَفون گوش آکَرینَه، ولی وَقتی اِمی واتِش، اِشتَن سَسی راست آکَردِشون، و لَسَّه ژِشون: «زَمینی اِنتَرَ آدَمی وِجودیکا پاجا آکَرَ، اِمی خونه کن نِبایَد ایجازَ بدَرَم اِنتَرَ آدَمی زندَ بومونِه!»

²³ اَ حالیکا کن اَیِن جِکَّلَنَه اِشتَن رَدا اون اِشتَن سَریکا وا اَدَرینَه و خاک راست آرَکَرین،

²⁴ فَرماندَ فِرمون آداشَه پولوسی قَلَه دلَرا بِبَن، شَلاق بِژَنِن و بَی باز خواس بِکَرِن تا دیار آبو چِه خونِه اِنتَرَ چَی زِرَبَرا لسَّه بَژَنَه.

²⁵ ولی هَنگومی کن پولوسیشون شَلاق ژِ را آبَستَه، پولوس اَ اَفسَری کن اَجِگاکا پا مَند بَه واتِش: «قانون بَشِمَه ایجازَ دَرِ ایی نَفَر کن رومی شهروندَ بی اِمکن موحاکیمَه بکرَ بَی شَلاق بِژَنَه؟»

²⁶ اَ، افسر وَقتی اِمِش درَستَه، فَرمانَدَ وَر شَه و بَی واتِش: «هیچ بَموستیش چِه بَکشَه؟ اِم مِرد رومی شَهروندَ!»

²⁷ پس فرماندَ پولوسی وَر آمَه و اَیکا دَپَرسِسته: «بِوا بِوینِم، تِه رومی شهروندیشَه؟» پولوس جوابِش دوعَه: «ها»

²⁸ اَموقه فرمانده واتِش: «اَز رومی شهروندی بَدَست وَردِ خونه برکَه بهام دوعَیه.» پولوس چَی جَوابیکا واتِش: «ولی اَز شهروندینَه دِنیا دَگنِستَه ایم!»

²⁹ اَیِنی کن قرار بَه پولوسیکا باز خواس بِکَن، جِخت اِشتَنِشون کَنار دَراکِنیَه. فَرماندَ نی کن فَهمِستَش بَه ایلَه رومیش ویلاخِنیَه یَه، بَرک اَتَرسیه.

پولوس یهودی شورا وریکا

³⁰ سَو سَه را، اِمی خونِه کن فَرمانَدَ اَپیش بَه سَر آگِنِه کن واقییَن چیرا یَهودیِن پولوسی متَهَمِشون کردیَه، بَی زیندانیکا آزاد آکَردِشَه و فِرمون آداشَه سَران کاهِنِن و یَهودی شورا آدَمِن گِرد جَم آبون. چَی بَه دوملَه، پولوسِشون بِنیرا وردَ تا چَوون ناریکا حاضیر آبو.