رَسولون اَعمال 20 - کتاب مقدس به زبان تالشي - گویش مرکزی

پولوس مقدونیه و یونا نیرا بَشیه

¹ وَقتی کن خِرا خِلِه آلاویستَه، پولوس شاگِردون اِشتَن وَر خِلِه کَردِشَه وچَوون تَشویق کَردِ بَه دوملَه، اَوونکا خدا حافِیظی کَردِشَه و مَقدونیَه منطقَه را شَه.

² پولوس اَ منطقه کا دَیوَردَ و اِشتَن گَفونَّه ایماندارِنِش برکَه دِلگَرمی آداشَه، تا اِم کن یونانیرا آرَستَه.

³ پولوس سه ماه اَ جِگاکا مَندَ. هَنگومی کن اَپیش بَه کَشتینَه سوریَه را بِشو، یَهودیِن چَی زِرَبَرا شون توطِعَه کَردَ. پس تَصمیم گَتِشَه مَقدونیَه راه نَه ویگَردِ.

⁴ اَیِنی کن پولوسینَه دَرِ بین: پیرروسی زوعَه سوپاتِر کن بیریَه آدَمونکا بَه، و آریستارخوس و سِکوندوس کن تَسالونیکی آدَمونکا بین، گایوس و تیموتائوس دِربِه آدَمونکا، و تیخیکوس و تروفیموس کن آسیا آدَمونکا بینَه.

⁵ اَیِن اَمَکا نارتَر شینَه و شهر تروآسیاکا چَمَه مُنتَظیر مَندین.

⁶ ولی اَمه فَطیرَ عیدی بَه دوملَه، کَشتینَه شهر فیلیپیکا رَونَه بیمون و پِنج روجی بَه دوملَه، تروآسیکا چَوون وَر شیمون و هَف روج اَ جِگاکا مَندیمون.

یوتیخوسی زندَ آبِه

⁷ هَفتَه اَوَلین روجیکا، نونی پِزارنِستِه را یَندِ وَر جَم آبیمون. پولوس مَردومینَه گَف اَژَنیَه، و اِمی خونِه کن اَپیش بَه دوملَه روجیرا بِشو، چَی گَفِن تا نیمَه شَویرا دَکَشیستَه.

⁸ بالاخونَه ایکا کن جَم آبَه بیمون، وِرَ چِرا رِشون بَه.

⁹ وقتی کن پولوس هَتَه گَف اَژَنیَه، جوانی یوتیخوس نوم کن پِنجَرَ وَریکا نِشت بَه، تیکَلِه تیکَلِه سَنگینَه خاوی آشَه و ایکَرَ ایی سِوومین طبقَکا ویگِنِستَه و وقتی اَشون راست آکَردَ، ویندِشون کن مردیَه.

¹⁰ پولوس بِنیرا شَه، بَشتَن جَوانَه مِردی سَر ویداشتِشَه و بَی کَشا گَتِش و واتِش: «مَتَرسَه، هَنوزنی نفس دارِ!»

¹¹ چَی بَه دومله کَفارا شَه و نونی پِزارنِستِش و هَردِش. اَ، تا ایسبی رشونیرا اَوونَّه گَف ژِشَه، و چَی بَه دوملَه اَجِگاکا شَه.

¹² مَردوم اَ جَوانی زِندَ، کَرا بَردِشون و بَرکَه تسَلیشون گتَه.

¹³ ولی اَمه اِشتَن سفَریکا، پولوسیکا بَه نَه، ایلَه کَشتیکا دَنِشتیمون، و آسوسی شهریرا رَونَه بیمون تا قراری کن پولوسینَه داریمون، بَی کَشتی دلَرا دَروَرَم، اِمی خونه کن پولوس اَپیش بَه خِشکی راه نَه اَ جِگارا بشو.

¹⁴ پس وَقتی کن پولوسِمون آسوسیکا ویندَ، بَی کَشتی دِلَه دَروَردِمون و شهر میتیلینی را شیمون.

¹⁵ اَ جِگاکا کَشتینَه رَونَه بیمون و سَو سَرا، خیوسی جَزیرَ را آرَستیمون. اَ روجی سَوسَه ساموسی جَزیرَ را شیمون و دوملَه روج شهر میلیتوسیرا آرَستیمون.

¹⁶ پولوس اَپیش بَه دَیرا راه نَه اَفِسُسی کَناریکا دَیوَرِ تا آسیا ولَتیکا اِشتَن وقتی هیچ آنِکَرِ، چون تاویستَه بَه کن اَگَم مُمکن ببو، پِنتیکاستَه روجیرا شهر اورشَلیمیکا ببو.

پولوس اَفِسُسی ایسبیَه ریشونَّه خِداحافظی بَکَی

¹⁷ پولوس ایلَه پیغوم میلیتوسیکا اَفِسُیسیرا عَندِشَه و کِلیسا ایسبیَه ریشون اِشتَن وَر خِلِه کَردِش.

¹⁸ وَقتی اَیِن آمین، پولوس اَیِنِش واتَه: «شمَه بَموستیرون کن هَه اَوَلَه روجیکا کن آسیا ولَتیرا دَرمیم، چِنتَه گردِ اِشتَن وَقتی شِمَرام نوعَه.

¹⁹ چِنتَه گردِ فروتَنی نَه و بِرَمِستِ نَه خِداوَندیم خیدمت کردَ، سَختیِنی کن یَهودیون توطِعَه خونِه چمن سَر آمَه، تحمل کَردِم.

²⁰ هَته کن بَموستیرون، اَز هَر چیی ایکا کن مومکِن بَه شِمَرا فایدَش ببو، دَریغ نِداشتِمَه، بَلکَم پَیغومی شِمَرا اییلام کَردِم، چِه جَمعیکا و چِه شِمَه کَه اونکا بَشِمَه آموج آدامَه.

²¹ هِم یَهودیون وهِم یونانیونرا، شاهیدی دامَه کن پی توبَه نَه خدا طَرَف آگَردِن و چَمَه خداوند عیسای مَسیح کا ایمان بوعَرن.

²² «و ایسَه، خدا روح هیدایَتینَه، اورشَلیمیرا بَشیم نِمَه موست اَجِگاکا چِه چمن سَر آ؛

²³ جز اِم کن خدا موقدسَه روح بَمن هُشدار دَرِ کن هر شَهریکا زیندان و سَختی چمن مُنتَظیرَ.

²⁴ ولی اَز هِم جان و هِم زندَگی بَشتَنرا بی ارزش بَموستیم، و تاکَه اَگَم بِشام اِشتَن دووری تَمون آکَرم و خیدمَتی کن خَداوَند عیسی کا ویگَتِم کامیل اَنجوم بِدَرم، و خدا فِیضی خَشَه خَبَری شاهیدی بدَرِم.

²⁵ «ایسَه بَموستیم کن هیچ کِرَم شِمَه کا، کن اَز شِمَه دِلَکا گَردِستَمَه و خدا پادیشاهیم اییلام کردَیَه، دِ بَمن نینَّویند.

²⁶ پس اُمروج شِمَرا شاهیدی دَرِم کن، هیچ کِرَم شمَه خونیکا چمن مِلیکا نییَه،

²⁷ اِمی خونه کن اَز کَسی حَقّیکا کوتاهیم کردَ نی، بَسکَم خدا پَیغومی گِردیرا کامیلَا اییلامم کردَیه.

²⁸ شِمَه حواس بَشتَنکا ببو. و رَمَه اِنی کن خدا موقدسَه روح، بَشِمَه اینتخابِش کردیَه تا چَوون سَریکا بِبَه، حواسِرون اَوونکا ببو. خدا کلیسارا کن اَش اِشتَن خونینَه خِرییَه شَه، شونَه گیری بکرَ.

²⁹ بَموستیم چمن شِه بَه دوملَه، بِزارنَه وَرگِن شِمَه دِلَه بومَنَه و رَمَه سَر رحم نینَّکَرد.

³⁰ حتی شِمَه دِلکا نی آدَمِنی راست آنَّب و حَقیقَتی ویگاردِنن تا شاگِردون اِشتَن دوملَه دَراکنن و اَوون گومرا بَکَن.

³¹ پس حَواسِرون ببو و یاد آرَفَنَه کن اَز سِه سال تَمام، شَو و روج، ایی لَحظَه نی اَسِرگینَه بَشِمَه هُشدار دوعِه کا دست پِگتَم نی.

³² «ایسَه بَشِمَه خدا و چَی فیض بخشَه کلامی دَست آمَدا، کن بَشایَه بَشِمَه بَنا بکَرِ و گِردِ اَیِنی دِلَکا کن تَقدیس آبَه اینَه، اِرث آدَرِ.

³³ چمن چَمِن هیچ کَمی طِلِه یا نِقرَ یا شندِری دوملَه نِبَه.

³⁴ شمه اِشتَن بَموستیرون کن اِشتَن بالینَه، چمن و چمن هَمراهون نیازی تَهیه اَکَریمه.

³⁵ اَز هَمَه جورَ بَشِمَه آمونِستَمَه کن پی اِنتَرَ سخت کار بِکَرَم تا بِشاعَم دَس دَریسون بالی بیگِرَم، خداوند عیسی گَفون یادیکا غَم بَرم کن واتِش: ”آدوعِه، ویگَتِه کا بِیتَرَ.“‌»

³⁶ وقتی پولوس اِشتَن گَفونِش تَمون آکَردَ، گِردِ اَوونَّه زِنگ ژِشَه و دِوا کَردِش.

³⁷ گِرد برک بِرَمِستین و بَشون کَشاکا گتَه، و ماچینِه کردِشون.

³⁸ اَ چیی ایی کن گِردیکا ویشتَر اَوون بَرضَخ آرَکَری، پولوسی اِم گَف بَه کن واتِش: «دِ بَمن نینَّویند.» چَی بَه دوملَه تا کَشتی وَر اَشون بَدرَقَه کَردَ.