رَسولون اَعمال 19 - کتاب مقدس به زبان تالشي - گویش مرکزیپولوس اِفِسُسیکا 1 ولی هَنگومی کن آپولوس شهر قُرنتُسیکا بَه، پولوس اَ ولَتی راه نَه، کن خِشکی بَه، گِذَشَتِه بَه دوملَه، اَفِسُسیرا آرَستَه. اَجِگاکا چَن گِلَه شاگردِش پَیدا کردَ. 2 پولوس اوونکا دَپَرسِستَه: «هَنگومی کن ایمان وَردِرونَه، خدا موقدسَه روح ویگَتِرون؟» اَیِن جواب آداشون: «نِه اَمه حتی دَرَستَمون نی کن خدا موقَدَسه روح هِستَه.» 3 پولوس اَیِنِش واتَه: «پس چِه غسل تَعمیدی گَتِرون؟» اَیِن واتِشون: «یحیا غسل تَعمیدی.» 4 پولوس واتِش: «یحیی غسل تعمید، توبَه تعمید بَه. اَ، آدَمون اَواجییَه، اَ کن بَمنکا بَه دوملَه بومَیَه بَی ایمان بوعَرَ، یعنی عیسی.» 5 اَیِن وَقتی اِمی دَرَستِشون، عیسای خداوندی نومینَه غسل تَعمید گَتِشون. 6 و هَنگومی کن پولوس چَوون سَریکا بال پِناشَه، خدا موقدسَه روح چَوون سَردِرِ ویرمَه، و اَیِن دییَرَ زَبانینَه گَف ژِشون و پیشگویی کَردِشون. 7 اَ مِردِن، گِرد حِدودِ دانرَّ نَفر بینَ. 8 چَی بَه دومله پولوس یَهودیون عیبادَتگارا شَه، اَ جِگاکا سِه ماه جورئَتینه گَف اَژَنیَه و خدا پادیشاهی خونِه گَفَه ژَنِه اَکَری و دَلیل اَوَری و اَوون قانع اَکَریَه. 9 اَمّا بعضی سرسختی اَکَرین و ایمان نَوَرینَه و گِردی نَ کا، اَهل ’طریقتی‘ یعنی ایماندارون بَدی اَواجین. پس پولوس اَوونکا تاک آبَه و اِشتَن شاگِردون پِرَگِری، و هَمَه روج تیرانوسی مَدرَسَکا گَف اَژَنیَه و دلیل اَوَریَه. 10 دِ سال اِنتَرَکِه گِذَشتَه و اِم زَمانیکا، گِردِ آسیا وِلَتی آدَمِن، چِه یَهود و چِه یونانی، خداوندی کَلامِشون درَستَه. اِسکیوایی زوعَه اِن 11 خدا پولوسی بالینَه برکَه عجیبَه موعجیزَ اِنی اَیر آکَردِش، 12 ایی جوری کن آدَمِن دَستَمالِن و پیشبَندونی کن چَی جَندَکی گِنَه بینَه آزاریون را اَبَرین، و چَوون آزار سِی آرَبی و پَلیدَ روحِن اَوونکا بِرِن اَشیَه. 13 پس چَن گِلَه یَهودیَه دورِگَرد کن جِن گیر بین تَقلا کَردِشون تا عیسای خداوندی نومی، کَسِنیرا کن پَلیدَ روح دارین، بوخونِن. اَیِن اَواجینَه: «بَه اَ عیسی کن پولوس کا اییلام کردِ بَشِمَه قَسَم دَرَم! » 14 کَسِنی کن اِنتَرَ اَکَرینَه اِسکیوا هَف گلَه زوعَه بینَ. اِسکیوا یهودی کاهینون، ایلَه یالونکا بَه. 15 ولی پَلیدَ روح چَوون جَوابیکا واتِش: «عیسی آمَزنِست، پولوسی نی آمَزنِست، ولی شِمَه کی اینَه؟» 16 پس مِردی کن پَلیدَ روح داری چَوون سَر وَشتَه و گِردی حریف بَه، و اَدَ اَیَنِش ژِشَه کن لوت و یَرَ آبَه جَندَکینَه اَ کَکا ویریتین. 17 وقتی کن گِردِ اَفسُسی اَمونِن، چِه یَهودی و چِه یونانی، اِم ایتفاقیکا با خبر آبین، تَرس گِردی گَتِشَه، ایی جوری کن اِم ایتفاقی بَه دوملَه خداوند عیسی نومی وِر ایحترام اَکَرینَه. 18 خَیلی آدَمونکا کن ایمان وَردَشون بَه، نَ آمین و اِشتَن کارون آشکارا اییتراف اَکَرینَه. 19 خَیلیِن نی کن چیمی بَه نَه جاودوگَری اَکَرین، اِشتَن کیتاوون وَردِشونَه گِردی نَ کا سوتِشون. وقتی کن کیتاوون پولی حیساب کردِشون، پِنجا هَزار گلَه نِقرَاینَه سکَه بَه. 20 اِنتَرَکِه، خداوندی کَلام هَمَه جِگاکا وِلاخ آرَبی و زِبق اَگِری. 21 اِم ایتفاقون بَه دوملَه، خدا روح پولوسیش هیدایت کردَ کن مَقدونیَه و اَخائیَه منطقَه کا دَیورِ و اورشَلیمیرا بشو. پولوس واتِش: «چمن اَ جِگارا شِه بَه دوملَه، پی شهر رومی نی بِوینِم.» 22 چَی بَه دومله دِ گِلِه اِشتَن همکارِن، تیموتائوس و اِراستوسی مَقدونیَه را عَنِدِش و اِشتَن ایی مودت آسیا ولَتیکا مَندَ. اِفِسُسیکا خرا خِله بَبی 23 اِم زَمانیکا، یالَه خَرا خِلِه ایی، اَهل ’طریقت‘ یعنی ایماندارون زِرَبَرا راست آبَه. 24 نِقرَ کاری دیمیتریوس نوم کن نِقرَ اییَه چییِ اِنی آرتِمیسی معبدیرا سِی آرَکَری و اِم راه نَه برکَه دَرامَدی چیلینگَرونرا ساختَش به. 25 دیمیتریوس، چیلینگَرِن و اِنتَرَ کارون صاحیبی جَم آکَردش و اَیِنِش واتَه: «سَروَرِن، بَموستیرون کن چَمَه درامد اِم کاسبی نَه رَ. 26 ولی هَتَه کن بَویندین و کاینَه دَرَستِه، اِم پولوس نِه تاکَه اَفِسُسیکا، بَلکَم تقریبا آسیا ولَتیکا، خَیلیِنِش قانع و گُمراه کَردَیَه. اَ باتیَه، خدا اِنی کن اینسانی بالینَه سِی آبَه اینَه خِدااِن نینَّه. 27 پس اِم خَطَر هِستَه کن نِه تاکَه چَمَه کاسبی رونَقیکا بَرگِنِه، بَسکم چَمَه یالَه الهَه آرتِمیسی مَعبَد نی هیچ آبو و اَ الهَه کن آسیا ولَتی اِم سَر اَسَریکا و دِنیاکا بَی بَپَرَستین، اِشتَن یال گیری از دَست بدَرِ.» 28 وَقتی اَیِن اِمِشون درَسته، بَرک آسرَنگِستین، و لَسَّه آداشونَه کن: «یالَه، اَفِسُسیانی آرتمیس!» 29 شَهری گِردِ جِگا اونکا خَرا خِلِه راست آبَه! اَیِن یندِنَه همدَست آبین و موسابقاتی مَیدونیرا هِژما بَردِشون. اَیِن گایوس و آریستارخوسی کن مَقدونیَه آدَمونکا بین و پولوسینَه دَرِ بینَه، دَراکِن دَراکِن اِشتَنَه اَبَرینه. 30 پولوس اَپیش بَه جَماعَتی دلَرا بشو، اَمّا شاگِردِن نَشتِشون. 31 حتی آسیا ولَتی بعضی حاکیمِن کن بَینَه رَفِق بین، چَیرا پَیغوم آداشونَه، و خاشتو خازشون بَه کن موسابقاتی مَیدونیرا نا. 32 جَمعیَتیکا خَرا خِلِه بَه و آدَمِن تَتَه وَسَّکا بین. گِرد لَسَّه اَژَنین و هَر کَم چیی ایی اَواجیَه و ویشتَرِ آدَمِن نَزنینَه چِه خونه جَم آبَه اینَه. 33 بعضییِن گَمون اَکَرینَه اسکندر مسئولَه، اِمی خونه کن یهودییِن اِسکندَرِشون نار دَکردَ به و بَعضیِن نی جَمعیَتی دِلَکا بَی دَستورِنی اَدَرینَه. اِسکندَر اِشتَن بالی تَکان آداشَه، و مَردومیکا اَپیش بَه گَف نِژَنِن و تَقلاش کردَ، بَشتنکا دیفا کردِ خونه چیی ایی بواجه. 34 ولی وَقتی آدَمِن سَر آگِنینَه کن اَ یَهودیَه، گِرد ایلَه سَسینه، حِدود دِ ساعَت لَسَّه ژِشون: «یالَه، اَفِسُسیانی آرتمیس!» 35 آخیر بَسَر شَهری داروغَه مَردومی آلاوِنیشَه و واتِش: «اَفِسُسی مردِن، کیه کن مَزنِه شهر اَفِسُس، یالَه آرتِمیسی مَعبَدی نیگَبانَه؟ کییَه کن مَزنِه شهر اَفِسوس موقدسَه سِه کن آستامونیکا ویگنِستَه یَه نیگَبانَه؟ 36 پس اِمی خاطر کن اِم حَقیقَتون حاشا کَردِ نییَبِن، پی آلاوییَه و تاویستِه نَه کاری نِکَرَ. 37 چون شمَه اِم مِردِن کن اِم جِگارا وَردَرونَه، نِه چَمَه مَعبَدی بی حورمتیشون کردیَه و نِه چَمه الهَه شون کفر واتَه یه. 38 پس اَگَم دیمیتریوس و چَی چِلینگَرَ هَمکارِن کَسیکا شَکایَتی بَداشتینَه، محکمه اون بَرَنگا آجَه و حاکیمِن نی حِاضِرینَه. بَشانَه اِشتَن شَکایَتون اَجِگارا بِبَرِن. 39 ولی اَگَم دیَرَ شَکایتی دارَ، پی اَی شَهری مَجلِسیکا حل و فَصل بکَرَ. 40 اِمی خونه کن بَتَرسِستیمَه کن اُمروجی ایتفاقون خونِه، اَمه شورِش کَردِرا مُتَهَم بِکَن. اَگَم اِنتَرَ ببو، نِمونَه شا اِم خَراخِلِه خونه دلیل بوعَرَم.» 41 وقتی کن داروغَه اِم گَفِش ژَ، جماعَتی ولاخ آکَردِشه. |
@ 2024 Korpu Company