رَسولون اَعمال 18 - کتاب مقدس به زبان تالشي - گویش مرکزی

پولوس شهر قُرِنتُسیکا

¹ چَی بَه دوملَه، پولوس آتِنیکا بِرِن برمَه قُرِنتُسیرا شَه.

² اَ جِگا کا ایلَه یَهودیَه مِردی نَه، آکیلا نوم، کن پونتوسی منطقه آدَمونکابه آشنا آبَه، آکیلا اِشتَن ژِن پریسکیلا نَه، بَه تازَگی ایتالیا کا آمَه بَه، اِمی خونِه کن کْلودیوس رومی ایمپراطور فِرمون دوعَش بَه کن گردِ یَهودییِن رومیکا بَرشون. پولوس چَوون ویندِ را شَه،

³ و اِمی خاطِر کن چَی کار نی چَوون شیوار جادِر دَشتِه بَه، چَوون وَر مَندَ و دمندَ کار کردِ.

⁴ پولوس هَر موقدسَه شَنبکا، عیبادَتگا دِلَکا یَهودیون و یونانیونَّه گَف ژِنَه اَکَریَه و تَقلا اَکَری اَوون قانع بکَرِ.

⁵ وقتی سیلاس و تیموتائوس مَقدونیَه منطقه کا آمینَه، پولوس گِردِ اِشتَن وَقتی، خدا کلامیرا آناشَه، و یَهودیون را شاهیدی اَدَریَه کن عیسی، هَه وعدَ آدوعَه مَسیحَه.

⁶ ولی وَقتی یهودییِن چَی زِرَبَرا راست آبین و بَی زَبون دَکَردِشون، پولوس چَوون زِرَبَرا را، اِشتَن شِندِریکا اَ شهری خاکی ویراشِندِش و اَیِنِش واتَه: «شِمَه خون شِمَه مِلیکارَ! اَز تقصیرکار نیمَه. چیمی بَه دوملَه، غَیر یَهودیون وَر بَشیم.»

⁷ چَی بَه دومله عیبادَتگاکا، تیتوس یوستوسی کَرا شَه کن خدا پَرَستَه آدَمی بَه و چَی کَه عیبادَتگا وَریکا به.

⁸ کْریسپوس، کن عیبادَتگا رَئیس به، گِردِ اِشتَن کَه آدَمونَّه بَه خداوند ایمانِشون وردَ. هِنتَرَکِه قُرِنتُسی خَیلی آدَمونکا وَقتی پَیغومشون درَسته، ایمانِشون وردَ، و غسل تَعمیدِشون گتَه.

⁹ ایی شَو خداوند رویا دلَکا پولوسیش واتَه: «مَترس! ساکیت مَمون و گَف بِژَن!

¹⁰ اِمی خونه کن اَز بَتِنَه درِ ایمَه و هیچ کَم نییَشا، اِشتِه سَر بلا وردِ خونه اِشتِه سَردِرِ هِژما بوعَرِ، اِمی خونه کن اِم شَهریکا مِرا برکَه آدَم هِستَه.»

¹¹ پس، پولوس ایی سال و نیم اَجِگاکا مَندَ و خدا کَلامی اَوون آموج آداشَه.

¹² ولی هَنگومی کن گالیو، ولَته اَخائیَه حاکیم بَه، یَهودیِن یَندِنَه هَمدَست آبین، پولوسی سَر ویبین و بَی محکمه را دَراکِنیشونَه،

¹³ اَیِن واتِشون: «اِم آدَم چَمَه آدَمون قانع بَکَی، خدا جوری کن شَریعَی زِرَبَرایَه پرستش بکَرن.»

¹⁴ چَی به دوملَه وقتی کن پولوس اَپیش بَه گَف بِژنِه، گالیو یَهودییِنِش واتَه: «اَی یهودییِن اَگَم جُرم و جِنایتی بِبیستِه، اَز شمَه شیکایَتی گوش آدوعِه را دلیلی داریم.

¹⁵ اَمّا اِمی خونِه کن اِم مَسئله شِمَه شَریعَتی سَر و کلَمه اِن و نومون خونه اَ، پس شمَه اِشتَن بَی حلّو فصل بکَرَ. اَز نَپیمَه اِنتَرَ چییون خونِه دیوون بِکَم.»

¹⁶ پس اَیِنِش محکمه کا بِرن بَرکَردِش.

¹⁷ اَیِن گِرد، عیبادَتگا رَئیس سوستِنِسی سَر هِژما بَردِشون و اَی فرمانداری نَ کا ژِشون. ولی گالیو اَصلا اِشتَنرا نِناشَه.

پولوسی ویگَردِستِه اَنطاکیه را

¹⁸ پولوس خَیلی وَقت قُرِنتُسیکا مَندَ، و برا اونَّه خُداحافیظی کَردِش و دَیرا راه نَه سوریَه را شَه. اِم سَفَریکا، پریسکیلا و آکیلا نی بَینَه دَرِ بین. پولوس کِنِخریَه کا اِشتَن کَلَّه تاشتِش، اِمی خونِه کن اِنتَرَ نَذرِش کَردَ بَه.

¹⁹ وَقتی شهر اَفِسُسیرا آرَستین، اِشتَن هَم سَفَرون آهَشتِش و عیبادَتگارا شَه، و یَهودیونَّه گَف ژِنَه کردِش.

²⁰ اَموقه کن پولوسیکا اَپیشون بَه ایزَرَ ویشتَر اَوونَّه بومونِه، پولوس قِبولِش نِکَردَ

²¹ ولی اَوونَّه خدا حافیظی کَردِ موقه، واتِش: «اَگَم خدا بِخا هَنی شِمَه وَر بومَمَه.» چَی بَه دوملَه کَشتیکا دَنِشتَه و اَفِسُسیکا شَه.

²² وقتی قِیصَریَکا کَشتیکا ویرمَه، کِلیسا آدَمون ویندِرا شه و چَی به دوملَه اَنطاکیَه را رَونَه آبه.

²³ ایی مودت اَجِگاکا مَندَ و هَنی سَفَریرا شَه، اَ گردِ غَلاطیَه و فریجیَه، منطَقه اون اَگَردیَه و گِردِ شاگِردون ایمان داشتِه کا زبق اَدَری.

آپولس، اَفِسُسی شهری کا جرئتی نَه گف ژَنی

²⁴ اَ روجون کا، یَهودیَه مِردی آپولس نوم کن اِسکَندَریَه آدَمونکا به، اَفِسُسیرا آمَه. اَ ماهیرَ گَفَه ژَنی بَه و موقدسَه نوشتَه اونکا خَیلی اَزنیَه؛

²⁵ خَداوَندی راه کا آموج گَتَش بَه و ایشتیاقینَه گَف اَژَنیَه و عیسی خونِه دِرِست، آموج اَدَریَه، هَر چَنَه تاکه یَحیا تَعمیدی کا خَبَر داری.

²⁶ آپولس جورئَتینه، عیبادَ تگاکا گَف ژِ شِرو کَردِشَه. ولی وَقتی کن پریسکیلا و آکیلا چَی گَفون دَرَستِشون، بَی قِرَقیرا بَردِشون و خدا راه، درِست تر بَی آموج داشون.

²⁷ وَقتی کن آپولس اَپیش بَه اَخائیَه منطقَه را بشو، برا اِن بَی تَشویقِشون کردَ و شاگِردونرا نِوِشتِشون کن بَیکا چاکَه ایستقبال بِکَن. وقتی کن آپولوس اَ جِگارا آرَستَه، اَیِنی کن فیضی واسیطنَه ایمانِشون وردَ به، برکَه کاریَری آداشَه.

²⁸ اِمی خونه کن گِردی نَ کا، یَهودیونَّه گَفه ژِنَه اَکَریَه، و چَوون عَقیدَ اون زبقینَه رَد اَکَری، و موقدَسه نوشتَه اونَّه ثابیت اَکَریَه کن عیسی هَه وَعدَ آدوعَه مَسیحَه.