رَسولون اَعمال 15 - کتاب مقدس به زبان تالشي - گویش مرکزیاورشلیمی شورا 1 ولی چن نفر ولَتِه یَهودیَکا شهر اَنطاکیَه را آمینَه و برا اون آموج اَدَرینَه و اَواجینه: «اَگَم موسی رسمی واتَنَه سِنَت آنِبَه، نینَّشا نیجات گَته.» 2 وَقتی پولوس و برنابا چَتین چَوون زِرَبَرا بَحث اَکَرینَه، قرارِشون نوعه کن اَ دِ، چَن نَفَر دییَرایماندارونَّه شهر اورشَلیمیرا بِشون و اِم مسئَلَه رَسولون وایسبیَه ریشونَّه در میان بِنَن. 3 پس کلیسا اَوون عَندشَه؛ و اَیِن فینقیَه و سامِرَکا دَیوَردِ موقه، جیگیر کردشون کن چِنتَه غَیرِ یَهودییِن ایمان وَردَشونَه و برااِن اِم خبری خونه خَیلی خَش آبین. 4 وَقتی اورشَلیمیرا آرَستین، کلیسا و ایسبیَه ریشِن و رَسولِن اَوونکا ایستقبال کَردِشون. پولوس و برنابا هَر چیی ایی کن خدا چَوون واسیطنه اَنجوم دوعَش بَه، چَوونرا جیگیر کَردِشون. 5 ولی بَعضی فَریسیون فِرقَه عالیمونکا کن ایمانشون وردَ بَه، پِبین، واتِشون: «غَیرِ یَهودیون سِنَت کَردِ واجیبَه و فرمون آداشونَه کن موسی شَریعَتی غَم بَرِن.» 6 رَسولِن و ایسبیَه ریشِن جَم آبینَه تا اِم مَسئَلَه برسی بکَن. 7 وِرَ گَفَه ژَنِه بَه دوملَه، آخیر بَه سَر پِطروس پِبَه و اَیِنِش واتَه: «اَی برا اِن، شِمَه بَموستیرون کن اَوَلَه روجونکا، خدا بَمنِش شِمَه دِلَکا اینتخاب کَردِشَه کن غَیر یَهودییِن چمن زونینَه اِنجیلی پَیغومی دَرَسِن و ایمان بوعَن. 8 و خدایی کن دلیکا باخبرَ چَوونرا شاهیدی آداشَه، اِنتَرَ کن خدا موقدسَه روح اَیِنِش دوعَه، هَتَه کن اَمَش نی آدوعَه. 9 خدا اَمه و اَوون دِلَکا هیچ فَرقی نِناشَه، بَلکَم ایمانی خونه، چَوون دِلی پاجا آکَردِشَه. 10 پس ایسَه چیرا خدا وَرداوَرد بَکَرون و شاگِردون مِلیکا یوغ بَنارون کن نِه اَمه اَشایمونَه اَی پِگَتِه، نِه چَمَه بابااِن؟ 11 ولی اَمه ایمان دارَم کن عیسای خداوندی فیضینَه یَه کن، نیجات گَتِمون، هَتَه کن اِمِن نی نیجات گَتِشون.» 12 چَی بَه دومله جَماعَت گِرد دَمِریستین و بَرنابا و پولوسی گَفِنِشون گوش آکردَ. اَیِن نِشونَه اِن و موعجیزَاِنی کن خدا چَوون واسیطنه غَیرِ یَهودیون دِلَکا اَیر آکَردَش بَه، هنی جیگیر کَردِشون. 13 وَقتی چَوون گَفِن تَمون آبَه، یَعقوب واتِشَه: «اَی برا اِن، بَمن گوش آدَرَ! 14 شَمعونِه پِطروس واتِشَه کن خدا چِنتَه اَوَلین کَرَ غَیر یَهودییون لطف کَردِشَه، و چَوون دِلَکا اِشتَن نومی خونه ایلَه قامِش اینتخاب کردیَه. 15 اِم دِرِست هَیَه کن آموس پَیغَمبری کیتاویکا نوشتَه آبَیه: 16 «”چیمی بَه دوملَه، آمَگَردِست و داوود پادیشا اَوالَه کن ویگِنِستَه یَه، هَنی راست آمَکَرد؛ چَی خَراوَ اون هَنی سِی آمَکَرد، و اَی، چَی اَوّلنَه شیوار بَساستیمَه، 17 تا اَیِنی کن اینسانون اودومیکا مَندَ اینَه، وگِردِ یهودییِنی کن چمن نومی، اِشتَن سَریکا دارِن خداوندی دوملَه بگَردِن. خداوند باتی، خداوندی کن 18 اِم چیی اِنِش گِذَشَتَکا دیار آکَردَشه.“ 19 «پس چمن حِکم اِمَه، اَینی کن غَیرِ یَهودییونکا خدا طَرَف آگَردِن، زَمَت نِدَرَم. 20 ولی پی نامَه ای دِلَکا اَوون بِواجَم هَردَ چیی ایکا کن بوتونرا قِربونی آبَه یَه، زینا کا، دَمَردَ خَیوونون گوژدیکا و خونیکا رَت آبون. 21 اِمی خونه کن قَدیمَه دوورَکا موسی هَر شَهریکا آدَمِنی داریَه کن چَی شریعتی اییلام بکَن، هَتَه کن هَر موقدسَه شَنبَه روجون دَلَکا چَی نِوِشتَه اون یَهودیون عیبادَت گااونکا بَخندین.» شورا نامه غیریهودیَه ایماندارونرا 22 پس رَسولِن و ایسبیَه ریشِن گِردِ کلیسا آدَمونَّه تَصمیمِشون گَته، اِشتَن دِلَکا مِردِنی اینتخاب بِکَن واَوون پولوس و بَرنابا نَه شهر اَنطاکیَه را بَینِن. پس یَهودا کن بَی بَرسابا نی خِلِه اَکَرین و سیلاسی کن، برا اون دِلَکا رهبر بین، اینتخابِشون کردَ. 23 چَی به دوملَه ایله نامه چَوون بالینَه عَندِشون، کن چَی دَلکاشون نوشتَه بَه: «اَمه رَسولِن و ایسبیَه ریشِن کن شمِه برا ایمون طَرَفیکا، شِمَه غَیر یَهودیَه برا اِنیرا کن اَنطاکیَه، سوریَه و کیلیکیه کا بَمَندینَه سلام بَر شِمَه! 24 دَرَستَمونَه کن کَسِنی شِمَه دِلَکا، بی اِمکن فِرمونی اَمَکا بِدارِن، آمَه اینَه و اِشتَن گَفونَّه بَشِمَه برضَخ آکَردَشونه و شمَه فکری تَفشیش بِه باعیث آبین. 25 پس اَمه یکدل مَصلَحَطی اِنتَرَ ویندِمونَه کن مِردِنی اینتخاب بِکَرم و اَوون، چَمَه خاجَتیَه برنابا و پولوسینَه، شِمَه وَر بَینَم، 26 اَ مِردونی نَه، کن چَمَه خداوند عیسی مسیح نومی خونِه اِشتَن جانِشون دستَه کَفیکا نوعَیه. 27 پس یَهودا و سیلاسی رَونَه آکَردِمون تا اِشتَن گَفینَه بَشِمَه اِم چییونکا خَبر بِدَرِن. 28 خدا موقدسَه روح و اَمه، مَصلَحَتی اِنتَرَ ویندِمون کن باری شِمَه دوشیکا نِنَرَم، جُز اِمِن، کن واجِبینه: 29 هَر دَ چیی ایکا کن بوتون را قِربونیشون کردَیَه وخونیکا و دَمَردَ خَیوونون گوژد و زینا کا رَت آبَه. اَگَم اِم کارونکا رَت آبَه، چاکَه کاری اَنجوم دوعَرونَه. سلَامت بِبَه.» 30 پس اَیِن رَونَه بین، و شهر اَنطاکیَه را شین و اَجِگاکا کلیسا آدَمون گِرد آکَردِشون، و نامَه آراستِنِستِشون. 31 وَقتی اَیِن نامَشون خَندَ، چَوون، دِل گَرم آکَرَ پَیغومیکا خَش آبین. 32 یَهودا و سیلاس کن پَیغمبَر بینَه، وِرَ گَفینَه، برا اون تَشویقِشون کردَ و زبق آداشون. 33 یهودا و سیلاس چَن وقتی اَجِگاکا مَندین، و چَی بَه دوملَه برا اِن، اَوون سَقه جان رَونَه کَردِشون، تا اِشتَن رَونَه آکَرون وَر ویگَردِن. 34 ولی پولوس و بَرنابا اَنطاکیه کا مَندین 35 اَیِن دییرَ ایماندارونَّه خداوندی کَلامی آموج اَدَرین و اییلام اَکَرین. پولوس و برنابا دلَکا ایختلاف دگنَه 36 ایی مُدَّتی کن گِذَشتَه، پولوس، بَرناباش واتَه: «شَهرِنِیرا کن خداوندی کَلامی چَوون دِلَکا اییلام کَردَمونَه، ویگَردَم و برا اون بوینَم، تا بِزنَم چِه حالیکاینَه.» 37 بَرنابا اَپیش بَه یوحنا کن بَی مَرقُس نی خِلَه اَکَرینَه، اَوونَّه بِشو، 38 ولی پولوس مصلحت نِویندِشَه کَسی کن اَوون پامیفیلیَه کا تاک آهَشتِش و هَمکاری نِکَردِشَه، اِشتَنَه بِبَرِ. 39 بَرنابا و پولوسی وَسطیکا ایختلاف اَدَ وِر آبَه کن یَندِکا تاک آبین. برنابا مَرقُسی پِگَتِشَه و دَیرا رانَه قِپرِسیرا شَه؛ 40 اَمّا پولوس، سیلاسی پِگَتِشَه و برا اِن، اَشون خداوندی فیضینَه عَندِشون. 41 وقتی پولوس سوریَه و کیلیکیَه کا کایبَه دَیوَردِ، کِلیسا اون زبق اَدَریَه. |
@ 2024 Korpu Company