رَسولون اَعمال 13 - کتاب مقدس به زبان تالشي - گویش مرکزیبَرنابا و شائول اِنجیلی پَیغومی خونه سفَر کردِ 1 اَنطاکیَه کلیسا دلَکا، چَن گِله پَیغَمبَرن و مُعلیمونکا مَند بین: بَرنابا و شَمعونی کن بَی نیجِر خِلِه اَکَرین، قیرَوانیَه لوکیوس، مَنائِن کن، هیرودیسِ حاکیمی اَگیَه برا بَه و شائول. 2 هَنگومی کن اَیِن روجَه بین و خداوندی پرستش اَکَرینَه، خدا موقدسَه روح واتِشَه: «بَرنابا و شائولی، اَ کاری خونه کن، اَز اَیِنِم خِلِه کردیَه مِرا تاکَه آکَرَ.» 3 اَموقه، روجَه و دِوا کردِ بَه دوملَه، اَ دِ نَفَری سَردِرِ بال آناشون و اَیِنِشون سَفَریرا عَندَ. بَرنابا و شائول قِپرسی دلَکا 4 اِنترَکه، اَ دِ کن خدا موقدسَه روح طَرفیکا رَونَه آبَه بینَه، سِلوکیَه بَندَریرا شین و اَجِگاکا دَیرا راه نَه قِپرِسیرا آرَستین. 5 وَقتی کن شهر سَلامیسی دِلَه دَرمین، یَهودیون عیبادَت گا اونکا خداوندی کَلامیشون اییلام کردَ. اَیِن یوحنا نی، کن بَی مرقُس خِلِه اَکَرینَه اِشتَنَه بردِشونَه تا چوونرا آرَسِه. 6 اَیِن جَزیرَ اِم سَر اَ سَریکا دَیَوردین تا شهر پافوسیرا آرَستین. اَ جِگاکا یَهودیَه مِردی باریشوعَ نوم گِنینَه کن جاودوگَر و دِروعَه پَیغَمبَر بَه. 7 اَ سِرگیوس پولُس، رومی فرمانداری رَفِقونکا بَه، فرماندار کن اَلمَندَ مِردی بَه، بَرنابا و شائولی اِشتَن وَر خِلِه کَردِشَه، اِمی خونِه کن اَپیش بَه خدا کَلامی دَرَسِه. 8 ولی اَ جاودوگَر کن چَی نومی معنی عالیم بَه، چَوون زِرَبَرا راست آبَه و تقلاش کردَ تا فرمانداری ایمان وَردِ ناری بیگِرِ. 9 ولی شائول کن بَی پولوس نی خِلِه اَکَرینَه، خدا موقدسَه روح کا پَتلَمَه آبَه، و اَ مِردی چمون دلَکا دیشتِشه و واتِش: 10 «اَی ابلیسی خِردَن، ته کن گردِ دِرِستیون غَنیمیش، اَی کن حیلَه و دِروکا پَتلَمَه ایشَه! چیرا خداوندی راستَه راهون شَت آکَردِکا دَست پِنیشَگت؟ 11 بِزون کن خداوندی بال اِشتِه زِرَبَرایَه. ایسَه کور آشَب و تا چن وقت آختاوی رنگی ویندِ نیشَشا.» جَخت، هَمَه جِگا چَیرا تاریک و ظلَمات آبَه، و اِشتَن دوور اَگَردییَه و کَسی دوملَه بَه کن چَی بالی بیگِرِ و راه بَی آمونِه. 12 چَی به دوملَه وقتی کن فرماندار اِم ایتفاقی ویندِشَه، ایمانِش وردَ، چون اَ آموجیکا کن خداوندی خونِه اَدَرینَه، حَیرون آبَه بَه. پولوس و برنابا اَنطاکیۀ کا 13 پولوس و اَیِنی کن بَینَه دَرِ بین، دَیرا راه نَه شهر پافوسیکا بِرِن بَرشین و پِرجه را شین کن منطقَه اِ پامفیلیَه کا بَه. اَمّا اَ جِگاکا یوحنا اَوونکا تاک آبَه وشهر اورشَلیمیرا ویگَردِستَه. 14 ولی اَیِن پرجَه کا دَیوَردین و شهر اَنطاکیَه را کن منطقه اِ پیسیدیِهَ کا بَه، آرَستین. موقدسَه شَنبَه روجیکا، یَهودیون عیبادَتگا دِلَه دَرمینَه و نِشتین. 15 تورات و پَیغَمبَرون کیتاوی خَندِ بَه دوملَه، عیبادَتگا رَهبَرِن چَوونراشون پَیغوم دوعَه، و واتِشون: «برا اِن، اَگَم آدَمون تشویق کَردِرا گَفی دارَ، بِواجَه.» 16 پولوس پا مَنَد و بالینَه ایشا کَردِشَه، واتِش: «اَی یهودیَه مِردِن و شمه ایی کن خِداکا بَتَرسِستیرون، گوش آکَرَ! 17 قام یهودی خدا، چَمَه بابا اِنِشون اینتخاب کردَ و چَمَه قامی اَموقه کن ولَت مِصریکا خَلک بینَه، اَوون دَوراشتِش و یالَه خِنَرینَه اَوون اَ وِلَتیکا بِرِن بَرَوَردِش، 18 و نِزِک بِه چِل سال چَوون رَفتاری وَیاوونیکا تحمل کَردِش. 19 اَ، هَف گِلَه قامی کن کَنعانیکا بینَه، چَوون نیفیت کَردِ بَه دوملَه، چَوون وِلَتی اِشتَن قامیرا اِرث ناشَه. 20 گِردِ اِمِ ایتفاقِن حِدودِ چارصَدو پِنجا سال دَکَشیستَه. چَی بَه دوملَه، تا سَموئیل پَیغَمبَری دوورَ، خدا داوَرِن اَوون آداشَه. 21 چَی به دوملَه اَیِن ایلَه پادیشا اَپیشون بَه و خدا، بنیامینی قَبیلَکا، قِیسی زوعَه، شائولی اَوون آداشَه، کن چِل سال حِکومَتِش کردَ. 22 شائولی پِگَتِه بَه دوملَه، داوودِش اینتخاب کردَ تا چَوون پادیشا آبو، و چَی خونه اِنتَرَ شاهیدی داشَه و واتِش: ”اَز، یَسا زوعَه داوودی ایلَه مِردی ویندِم کن خَیلی چمن دِلیکا نشتَه؛ اَ چمن پیستَه چییون کامیل اَنجوم آرَدا.“ 23 «هِم مِردی اودومیکا، خدا اِشتَن وَعدَ واتَنَه، ایلَه نیجات اَدَر، یَعنی عیساش، یهودی قامیراعَندِشَه. 24 عیسی آمِه بَه نَ، یحیی توبَه کردِرا غسل تَعمیدی، گِردِ یهودی آدَمونرا اییلام اَکَریَه. 25 وقتی کن یحیی اِشتَن خیدمتی دوورَ تَمون آرَکَری، واتِش: ”شِمَه فکر بَکَرون کن اَز کی ایمَه؟ اَز اَ نیمَه؛ بَلکَم اَ بَمنکا بَه دوملَه بومَیَه و اَز حتی چَی پا غَبون بَندی آکَردِ لَیاقتی نِدارِم.“ 26 «اَی برا اِن، اَی ابراهیم پَیغمبری اودومی خِردَنن، و اَی خدا تَرسِنی کن اِم جِگاکا مَندیرون! اِم نیجات اَدَرَ پَیغوم، چَمَرا رَونَه آبَه یَه. 27 اِمی خونه کن اورشَلیمی آدَمِن و چَوون یالِن عیساشون نِه آزنِستَه، و پَیغبَرون واتَه گَفی کن هَر موقدسَه شَنبه چَوونرا خَندِ بَبی نِفَهمستِشون. اَیِن عیسی محکوم کردِ نَه، پَیغمبَرون گَفی اَنجوم داشون. 28 اَیِن با اِمکن هیچ تقصیری چَی مَحکوم کَردِرا پَیدا نِکَردِشون، پیلاتوسیکا اَپیشون بَه اَی بِکِشِه. 29 و وَقتی گِردِ چییِنی کن چَی خونِه نوشَته آبَه بَه، اَنجومِشون دوعَه، اَشون صَلیبی سَریکا ویروَردِشون و تربَه دلَکا آناشون. 30 اَمّا خدا، عیساش مَردَاونکا زندَ آکَردِش. 31 خَیلی روجونکا، عیسی بَشتن اَیِنیرا کن اَینه جَلیلیکا اورشَلیمیرا آمَه بین اَیر آرَکَرییَه، و ایسَه نی اَیِن چَمَه قامی وَریکا چَی شاهیدینَه. 32 «ایسَه اَمه بَشِمَه خَشَه خَبَری بَدامون کن خدا اَ چیی ایی کن چَمَه بابا اون وَعدَش دوعَه به، 33 عیسی زندَ آکَردِ نَه، چَمَرا کن چَوون خِردَنیمون وَفا کَردِش. هته کن دِوُومین مزموریکا نوشتَه آبَه یَه: ”تِه چمن زوعَه ایشَه؛ اُمروج، اَز بَتِه مولود آکَردِمَه“ 34 «و خدا بَی مَردَاونکا زندَ آکَردِشَه تا هَرگز پوستَه آمَبو، هَتَه کن خدا واتشَه: «”اَز اَ مُطمَئِن و موقدسَه بَرَکَتِنی کن داوود پادیشاراشون وعدَ دوعَیه، بَه شِمَه آمَدا.“ 35 و هِنترَکه دییَرَمزموریکا نی نوشتَه آبَه یه کن: «”تِه نَیشَشت اَ کن اِشتِه موقدسه پوستَه آبو.“ 36 «داوود پادیشا بعد اِمکن خدا ایرادَ نَه اِشتَن زَمونَه آدَمون خیدمَت کَردِشَه، مَردَ و اِشتَن دَدَ اون وَر شَه، و پوستَه آبَه. 37 ولی اَ کن خدا بَی زندَ آکَردِش، پوستَه آنِبَه. 38 «پس، اَی برا اِن، بِزنَه گِناخون بَخشِستِه، هِم عیسی واسیطنه شِمرا اییلام بَیَه. 39 هَر چیی کا کن نِشاستِرون موسی شَریعَتینَه آزاد ببَه، ایسَه هر کَم کن بَه عیسی ایمان بوعَرِ، چَی واسیطنه آزاد آرَبن. 40 پس هواسِرون ببو کن پَیغَمبَرون کیتاوی اِم نِوِشتَه شمَه سَر نا، کن باتینه: 41 «دیَسَه، اَی، دَسپَر چییِن، حَیرون و نیفلَه آبَه، اِمی خونه کن شِمَه زَمونَکا کاری بَکَم، کن هَر چَنَه اَی شِمَرا جیگیر بِکَن هرگز باور نینَّکَرد.“ 42 وَقتی پولوس وبَرنابا عیبادَتگاکا بِرِنیرا اَشینَه، مردوم اَوونکا خاشتو خازِشون بَه کن آیَندَ هفتَه را، موقدسَه شَنبه روجیکا، اِم چییون خونِه اَوونَّه گَف بِژَنِن. 43 جَماعَتی عیبادَتگا کا بِرِن شِه بَه دوملَه، خَیلی یَهودیونکا و خدا پَرستَه آدَمونکا کن یَهودی آبَه بینَه، پولوس و بَرنابا دوملَه را دَگِنِستین. پولوس و بَرنابا اِم کاولَنَه گَف ژِشون و اَیِنِشون تشویق کردَ تا خدا فِیضی دلَکا ایدامَه بِدرِن. 44 آیَندَ هفتَه موقدسَه شنبَه روجیکا، شَهری آدَمِن تقریبا گِرد جَم آبَه بینَه تا خداوندی کَلامی دَرَسِن. 45 ولی یَهودییِن وقتی جمعییَتِشون ویندَ، زِرَ کا پَتلَمَه آبین و بی حُرمَتینَه پولوسی گَفون زِرَبَرا راست آبین. 46 پولوس و بَرنابا جورئَتینه واتِشون: «لازِم بَه خدا کَلام گِردیکا بَه نَه شِمَرا واتِه ببو. ولی اِمی خونِه کن اَی رَد کَردِرون و بَشتَن زَیرونَه زندَگی لایق نِویندِرون، پس ایسَه اَمه غَیرِ یَهودیون طرَف بَشیمون. 47 چون خداوند اَمَش اِنتَرَ فِرمون داشَه کن: ”اَز، بَتِه غَیر یهودیونرا نور سِی آکَردِمَه، تا نیجاتی خبری دِنیا چار گوشه را آرَسونی.“ 48 وقتی غَیر یَهودیِن اِمِشون دَرَستَه، خَش آبین و خداوندی کَلامی حورمَتی غَم هَردِشون؛ و اَیِن کن زَیرونَه زِندَگیرا اینتخاب آبَه بینَه، ایمانِشون وردَ. 49 اِنتَرَکِه خداوندی کَلام اَ منطقه گردِ جگا اونکا پَخش آبَه. 50 ولی یَهودییِن، تعصُّبی و سرشناسَه ژِنون و شَهری مِردون کن رهبَر بین، جیکو ژِشون. اَیِن نی پولوس و برنابا اَیذَت آزار کردِشون و اَ منطقه کا بِرِن برکردِشون. 51 پولوس وبَرنابا نی چَوون زِرَبَرا، اَ شهری خاکی اِشتَن لِنگونکا ویراشِندِشون و شَهر قونیَه را شینَه. 52 شاگِردِن خَشی و خدا موقدسَه روحکا پَتلَمَه بینَه. |
@ 2024 Korpu Company